ନୂଆଦିଲ୍ଲୀ: ସଂସଦରେ ବିିଧିବଦ୍ଧ ଭାବେ କୃଷି ଆଇନ ପ୍ରତ୍ୟାହାର (Farm Laws Repeal ) ହେବା ପରେ ଦୀର୍ଘ ଏକ ବର୍ଷ ଧରି ଆନ୍ଦୋଳନ କରିଆସୁଥିବା କୃଷକମାନେ ଖୁସି ବ୍ୟକ୍ତ କରିଛନ୍ତି । ତେବେ ଏହା ପରେ ମଧ୍ୟ କୃଷକ ଆନ୍ଦୋଳନ ଜାରି ରହିବ ବୋଲି ସୂଚନା ମିଳିଛି । ରାକେଶ ଟିକାୟତଙ୍କ ପରି ବଡ କୃଷକ ନେତାମାନେ MSP ଅର୍ଥାତ ଫସଲର ସର୍ବନିମ୍ନ ସହାୟକ ମୂଲ୍ୟ ଉପରେ ଗ୍ୟାରେଣ୍ଟି ଆଇନ ପରି ଗୁରୁତ୍ୱପୂର୍ଣ୍ଣ ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରଖିବାକୁ ଯୋଜନା କରୁଥିବା ସୂଚନା ମିଳିଛି ।
ବିବାଦୀୟ ଆଇନ ପ୍ରତ୍ୟାହାର ହେବା ପରେ ଆନ୍ଦୋଳନ ବନ୍ଦ କରି ଘରକୁ ଫେରିବାକୁ କୃଷକଙ୍କୁ ପ୍ରଧାନମନ୍ତ୍ରୀ ଓ କୃଷିମନ୍ତ୍ରୀ ନିବେଦନ କରିସାରି ଥିବାବେଳେ କୃଷକମାନେ ଧାରଣା ଜାରି ରଖିବା ସହ ପରବର୍ତ୍ତୀ କାର୍ଯ୍ୟପନ୍ଥା ଉପରେ ନିରନ୍ତର ବିଚାର ମଧ୍ୟ ଜାରି ରଖିଛନ୍ତି । ଆଗାମୀ ରଣନୀତି ସ୍ଥିର କରିବାକୁ ଡିସେମ୍ବର ପହିଲାରେ ସଂଯୁକ୍ତ କିଷାନ ମୋର୍ଚ୍ଚା (SKM)ର ଏକ ବୈଠକ ଅନୁଷ୍ଠିତ ହେବାକୁ ଯାଉଛି । ଆଇନ ପ୍ରତ୍ୟାହାର ହେବା ପରେ ଏହି ବୈଠକରେ କିଷାନ ଆନ୍ଦୋଳନର ଗତି ନେଇ କିଛି ବଡ ନିର୍ଣ୍ଣୟ ଆସିପାରେ ବୋଲି ମଧ୍ୟ ଅନୁମାନ କରାଯାଉଛି । ଆଜି ସଂସଦରେ ଆଇନ ପ୍ରତ୍ୟାହାର ମଧ୍ୟରେ ସିଙ୍ଘୁ ସୀମାରେ ପଞ୍ଜାବର 32ଟି କୃଷକ ସଂଗଠନର କର୍ମକର୍ତ୍ତାଙ୍କ ଏକ ବୈଠକ ଅନୁଷ୍ଠିତ ହୋଇଥିଲା ।
ଏହା ମଧ୍ୟ ପଢନ୍ତୁ:-Farm Laws Repeal Bill passed: ୭୫୦ ଚାଷୀଙ୍କ ପ୍ରତି ଶ୍ରଦ୍ଧାଞ୍ଜଳି କହିଲେ ଟିକାୟତ