ନୂଆଦିଲ୍ଲୀ: ଆଜି ରାଷ୍ଟ୍ରପତି ରାମନାଥ କୋବିନ୍ଦ ଭାରତବର୍ଷର ଚତୁର୍ଦ୍ଦଶ ରାଷ୍ଟ୍ରପତି ଭାବେ ନିଜ କାର୍ଯ୍ୟକାଳର ଶେଷ ଦିନ ପୂରଣ କରିଛନ୍ତି । ଯଦିଓ ଆସନ୍ତାକାଲି ପର୍ଯ୍ୟନ୍ତ ଦାୟିତ୍ବରେ ରହିବେ । କିନ୍ତୁ ଆସନ୍ତାକାଲି (ରବିବାର) ଥିବାରୁ ଆଜି ରାଷ୍ଟ୍ରପତି ଭାବେ କୋବିନ୍ଦଙ୍କ ଶେଷ କାର୍ଯ୍ୟ ଦିବସ ଥିଲା । ଫଳରେ ଆଜି ରାମନାଥ କୋବିନ୍ଦଙ୍କୁ ଦେଶ ବିଦାୟ ସମ୍ବର୍ଦ୍ଧନା ଦେଇଛି । ଏଥିପାଇଁ ସଂସଦର ସେଣ୍ଟ୍ରାଲ ହଲରେ ଏକ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜିତ ହୋଇଥିଲା । ଏଥିରେ ରାଷ୍ଟ୍ରପତି ରାମନାଥ କୋବିନ୍ଦ, ଉପରାଷ୍ଟ୍ରପତି ଏମ ଭେଙ୍କେୟା ନାଇଡୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଲୋକସଭା ଅଧ୍ୟକ୍ଷ ଓମ ବିର୍ଲା, ବିରୋଧୀ ଦଳନେତା ଅଧୀର ରଞ୍ଜନ ଚୌଧୁରୀ କେନ୍ଦ୍ରମନ୍ତ୍ରୀ ମଣ୍ଡଳ, ଉଭୟ ସଦନର ସାଂସଦଗଣ ଓ ଅଧିକାରୀ କର୍ମଚାରୀ ଏହି ସମ୍ବର୍ଦ୍ଧନା ସଭାରେ ସାମିଲ ହୋଇଥିଲେ ।
ସଂସଦର ସେଣ୍ଟ୍ରାଲ ହଲରେ ଆୟୋଜିତ ବିଦାୟୀ ସଭାକୁ ସମ୍ବୋଧିତ କରି ରାଷ୍ଟ୍ରପତି ରାମନାଥ କୋବିନ୍ଦ କହିଥିଲେ ଆଜି ମୁଁ ରାଷ୍ଟ୍ରପତି ପଦରୁ ବିଦାୟ ନେଉଛି । ୫ ବର୍ଷ ତଳେ ଏହି ସେଣ୍ଟ୍ରାଲ ହଲରେ ରାଷ୍ଟ୍ରପତି ଭାବେ ଶପଥ ଗ୍ରହଣ କରିଥିଲି । ରାଷ୍ଟ୍ରପତି ଭାବେ ଦେଶର ସେବା କରିବାକୁ ସୁଯୋଗ ଦେଇଥିବାରୁ ସେ ଦେଶବାସୀଙ୍କୁ ଧନ୍ୟବାଦ । କୋବିନ୍ଦ ଆହୁରି କହିଛନ୍ତି ସଂସଦ ହେଉଛି ଗଣତନ୍ତ୍ରର ମନ୍ଦିର । ସାଂସଦମାନେ ବିତର୍କ ଓ ବିରୋଧ କରିବାର ଅଧିକାର ପ୍ରଦର୍ଶନ କଲାବେଳେ ଗାନ୍ଧିବାଦୀ ନୀତି ପାଳନ କରନ୍ତୁ ।