ଡେରାଡୁନ: ପ୍ରେମିକାକୁ ଇମ୍ପ୍ରେସ କରିବା ଲାଗି ନକଲି IPS ସାଜିଥିଲେ ପ୍ରେମିକ । ମୁମ୍ବାଇରୁ ଆସି ଉତ୍ତରାଖଣ୍ଡ ହରିଦ୍ବାରରେ ବୁଲିଥିଲେ ପ୍ରେମୀଯୁଗଳ । ସରକାରୀ ଖର୍ଚ୍ଚରେ ଚାଲିଥିଲା ମଉଜ ମଜଲିସ । IPS ବର୍ଦ୍ଦିର ରୁବାଦ୍ ଦେଖାଇ ପ୍ରେମିକା ଠାରେ ନିଜର ଇମ୍ପ୍ରେସନ ଜମାଉଥିଲେ ନକଲି ଅଫିସର । ସେତିକିରେ ମନ ମାନିଲାନି ଯେ ନିଜର ଅଧିକ ପାୱାର ଦେଖାଇବାକୁ ଯାଇ ତାଙ୍କ ସୁରକ୍ଷା ପାଇଁ ପୋଲିସ ଠାରୁ ସୁରକ୍ଷାକର୍ମୀ ନିୟୋଜିତ କରିବାକୁ ଡିମାଣ୍ଡ କରିଥିଲେ । ହେଲେ ସୁରକ୍ଷାକର୍ମୀ ଡିମାଣ୍ଡ କରିବା ନକଲି IPSଙ୍କ ପାଇଁ ପଡିଗଲା ମହଙ୍ଗା । ଗର୍ଲଫ୍ରେଣ୍ଡକୁ ଇମ୍ପ୍ରେସ କରିବାକୁ ଯାଇ ଏଭଳି ନାଟକ ରଚିଥିବା ଜଣେ ଯୁବକଙ୍କୁ ହରିଦ୍ବାରରୁ ଗିରଫ କରିଛି ପୋଲିସ ।
ଯୁବକଙ୍କ ନାମ ସାଗର ବାଘମାରେ । ସେ ଜଣେ UPSC ଆଶାୟୀ ଅଟନ୍ତି । ଗତ ଦୁଇ ଦିନ ହେଲା ସାଗର ମୁମ୍ବାଇରୁ ହରିଦ୍ବାର ବୁଲିବାକୁ ଆସିଥିଲେ । ହରିଦ୍ବାରରେ ପହଞ୍ଚି ସବୁଠି ନିଜକୁ 2018 ବ୍ୟାଚର IPS ଅଫିସର ବୋଲି ପରିଚୟ ଦେବା ସଙ୍ଗେ ସଙ୍ଗେ IPS ଅନ୍ଦାଜରେ ସରକାରୀ ସେବାର ବ୍ୟବହାର କରିଥିଲେ । ନିଜକୁ IPS କହି ବନ୍ଧୁଙ୍କ ପାଇଁ ଗେଷ୍ଟ ହାଉସର ବନ୍ଦୋବସ୍ତ କରିବାକୁ ମଧ୍ୟ କହିଥିଲେ ଏବଂ ଥାନାରୁ ଏକ କନେଷ୍ଟବଳ ପଠାଇବାକୁ ନିର୍ଦ୍ଦେଶ ଦେଇଥିଲେ ।