ଚଣ୍ଡିଗଡ଼: ପ୍ରାୟତଃ ଇଞ୍ଜିନିୟର ଛାତ୍ରଛାତ୍ରୀଙ୍କ କ୍ଷେତ୍ରରେ ଚାକିରି ନେଇ ଅନେକ ସମସ୍ୟା ଦେଖାଯାଇଥାଏ । କିନ୍ତୁ ହରିୟାଣାରେ ଦୁଇ ଜଣ ଇଞ୍ଜିନିୟର ଯୁବପିଢ଼ିଙ୍କ ପାଇଁ ନୂଆ ଉଦାହରଣ ସୃଷ୍ଟି କରିଛନ୍ତି । ଇଞ୍ଜିନିୟର ଚାକିରି ଛାଡ଼ି ଦୁହେଁ ବିରିୟାନୀ ଷ୍ଟଲ ଖୋଲିଛନ୍ତି । ଯାହା ଏବେ ଚର୍ଚ୍ଚାର ବିଷୟ ପାଲଟିଛି ।
ହରିୟାଣାର ଦୁଇ ଇଞ୍ଜିନିୟର ରୋହିତ ଓ ସଚିନ ‘ଇଞ୍ଜିନିୟର୍ସ ଭେଜ ବିର୍ୟାନୀ’ ନାମକ ଛୋଟ ଷ୍ଟଲ ଖୋଲିଛନ୍ତି । ରୋହିତ ଜଣେ ପଲିଟେକନିକ ଛାତ୍ର ଏବଂ ସଚିନ ବିଟେକ କରିଛନ୍ତି । କିନ୍ତୁ ଦୁହେଁ ନିଜ ଚାକିରିକୁ ନେଇ ଖୁସି ନ ଥିଲେ । ଚାକିରିରେ ପାଉଥିବା ବେତନ ସେମାନଙ୍କୁ ଆତ୍ମ ସନ୍ତୋଷ ଦେଇନଥିଲା । ତେଣୁ ଉଭୟେ ଚାକିରି ଛାଡ଼ିବା ପାଇଁ ମନସ୍ଥ କରିଥିଲେ । କିଛି ଦିନ ପରେ ନିଜସ୍ବ ଏକ ଛୋଟ ବ୍ୟବସାୟ ଆରମ୍ଭ କଲେ ।