ଶ୍ରୀନଗର:ଆସନ୍ତାକାଲି ଦେଶ 76ତମ ସ୍ବାଧୀନତା ଦିବସ ପାଳନ କରିବାକୁ ସମସ୍ତ ପ୍ରସ୍ତୁତି ସରିଥିବା ବେଳେ ଘାଟିରେ ଆରମ୍ଭ ହୋଇଛି ଏନକାଉଣ୍ଟର । ଶ୍ରୀନଗର ଉପକଣ୍ଠ ନୋହଟାରେ ଆତଙ୍କବାଦୀଙ୍କ ଉପସ୍ଥିତି ନେଇ ଇନପୁଟ ସୂଚନା ମିଳିବା ପରେ ପ୍ରଥମେ ସର୍ଚ୍ଚ ଅପରେସନ ଓ ପରେ ଏନକାଉଣ୍ଟର ଜାରି ରହିଛି । ସ୍ଥାନୀୟ ପୋଲିସ ଓ ସିଆରପିଏଫର ମିଳିତ ଟିମ ଏହି ଏନକାଣ୍ଟର ଜାରି ରଖିଛନ୍ତି । ବର୍ତ୍ତମାନ ସୁଦ୍ଧା ଜଣେ ସୁରକ୍ଷାକର୍ମୀ ଓ ଜଣେ ଆତଙ୍କବାଦୀ ଆହତ ହୋଇଥିବାର ସୂଚନା ମିଳିଛି ।
ଆହତ ହୋଇଥିବା ସୁରକ୍ଷାକର୍ମୀଙ୍କ ନାମ କ୍ୟାପଟେନ ସର୍ଫରାଜ ଅହମ୍ମଦ ବୋଲି ସ୍ପଷ୍ଟ ହୋଇଛି । ଗୁଳି ଲାଗିବା ପରେ ତାଙ୍କୁ ତୁରନ୍ତ ଉଦ୍ଧାର କରି ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ସେହିପରି ଆହତ ହୋଇଥିବା ଆତଙ୍କୀ ସମ୍ପର୍କରେ ପୋଲିସ ସ୍ପଷ୍ଟ କରିନାହିଁ । ଏବେ ମଧ୍ୟ ଗୁଳି ବିନିମୟ ଜାରି ରହିଛି । ଏକାଧିକ ଆତଙ୍କୀ ଉକ୍ତ ସ୍ଥାନରେ ଆତ୍ମଗୋପନ କରିଥିବା ସନ୍ଦେହରେ ଏନକାଉଣ୍ଟର ଜାରି ରହିଛି । ସମ୍ପୂର୍ଣ୍ଣ ଅଞ୍ଚଳକୁ ଘେରାବନ୍ଦୀ କରି ରଖିଛି ସୁରକ୍ଷାବଳର ଯବାନ ।