ନୂଆଦିଲ୍ଲୀ: ଆମାଜନ ଇଣ୍ଡିଆକୁ ଇଡି ସମନ(ED summons Amazon India) । Future Group ସହ ଏକ ବିବାଦୀୟ ଚୁକ୍ତି ସମ୍ପର୍କରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଆମାଜନ ଇଣ୍ଡିଆର ଦେଶ ମୁଖ୍ୟ ଅମିତ ଅଗ୍ରଓ୍ବାଲ ଏବଂ ଅନ୍ୟ ଅଧିକାରୀଙ୍କ ସମେତ Future Group ମୁଖ୍ୟ କିଶୋର ବିୟାନୀଙ୍କୁ ହାଜର ହୋଇ ପକ୍ଷ ରଖିବାକୁ ନୋଟିସ ଜାରି କରିଛି । ଫ୍ୟୁଚର କୁପନ୍ସ ପ୍ରାଇଭେଟ ଲିମିଟେଡ୍ (FCPL) ସହିତ Amazonର କରିଥିବା ଚୁକ୍ତିରେ ବୈଦେଶିକ ବିନିମୟ ପରିଚାଳନା ଆଇନ (Foreign Exchange Management Act,FEMA) ସମ୍ପର୍କିତ ସର୍ତ୍ତାବଳୀ ଖିଲାପ କରାଯାଇଥିବା ସନ୍ଦେହରେ ତଦନ୍ତ କରୁଛି ପ୍ରବର୍ତ୍ତନ ନିର୍ଦ୍ଦେଶାଳୟ ।
ସୂଚନାନୁସାରେ, ଉଭୟ ସଂସ୍ଥାର ଅଧିକାରୀଙ୍କୁ ଡିସେମ୍ବର 6 ତାରିଖରେ ଦିଲ୍ଲୀରେ କେନ୍ଦ୍ରୀୟ ଏଜେନ୍ସି (ED) ମୁଖ୍ୟାଳୟରେ ହାଜର ହେବାକୁ ନୋଟିସରେ ଦର୍ଶାଯାଇଛି । ସେହପରି ଉଭୟ ସଂସ୍ଥା ମଧ୍ୟରେ ହୋଇଥିବା ରାଜିନାମା ସମ୍ପର୍କିତ କାଗଜପତ୍ର ମଧ୍ୟ ଦାଖଲ କରିବାକୁ କୁହାଯାଇଛି । ସେହିପରି 2019 ମସିହାରେ FCPLର 49% ଅଂଶଧନ କିଣିବା ପାଇଁ ଆମାଜନ FEMA ସର୍ତ୍ତାବଳୀ ଉଲ୍ଲଂଘନ କରିଛି କି ନାହିଁ ତାହାର ତଦନ୍ତ କରୁଛି ପ୍ରବର୍ତ୍ତନ ନିର୍ଦ୍ଦେଶାଳୟ ।