କୋଲକାତା:ପଶ୍ଚିମବଙ୍ଗରେ ପ୍ରବର୍ତ୍ତନ ନିର୍ଦ୍ଦେଶାଳୟ ଜାରି ରଖିଥିବା ଶିକ୍ଷକ ନିଯୁକ୍ତି ପ୍ରକ୍ରିୟାରେ ଦୁର୍ନିତୀରେ ମମତାଙ୍କ ଆଉ ଜଣେ ବିଧାୟକଙ୍କୁ ସମନ ଜାରି କରାଯାଇଛି । ତୃଣମୂଳ କଂଗ୍ରେସ ବିଧାୟକ ମାନିକ ଭଟ୍ଟାଚାର୍ଯ୍ୟଙ୍କୁ ହାଜର ହୋଇ ତଦନ୍ତରେ ସହଯୋଗ କରିବା ପାଇଁ ସମନ ଜାରି କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ପୂର୍ବରୁ ଏହି ମାମଲାରେ ମମତା ସରକାରଙ୍କ ବିଭାଗୀୟ ମନ୍ତ୍ରୀ ପ୍ରାର୍ଥ ଚାଟାର୍ଜୀଙ୍କୁ ଗିରଫ କରି ସାରିଛି ତଦନ୍ତକାରୀ ସଂସ୍ଥା ।
କେବଳ ପ୍ରାର୍ଥ ନୁହନ୍ତି, ତାଙ୍କ ଘନିଷ୍ଠ ସହଯୋଗୀ କୁହାଯାଉଥିବା ଅଭିନେତ୍ରୀ ଅର୍ପିତା ମୁଖାର୍ଜୀ ମଧ୍ୟ ଇଡି ଦ୍ବାରା ଗିରଫ ହୋଇଛନ୍ତି । ଅର୍ପିତାଙ୍କ ଘରୁ 20 କୋଟି ନଗଦ ଟଙ୍କା ଜବତ କରାଯାଇଥିଲା । ଏହି ଘଟଣାର ତଦନ୍ତ ଜାରି ରହିଥିବା ବେଳେ ଆଉ ଜଣେ ବିଧାୟକ ମଧ୍ୟ ତଦନ୍ତ ପରିସରକୁ ଆସିଛନ୍ତି । ସମନ ପାଇଥିବା ନଦିଆ ବିଧାୟକ ଭଟ୍ଟାଚାର୍ଯ୍ୟ ରାଜ୍ୟ ମାଧ୍ୟମିକ ଶିକ୍ଷା ପରିଷଦର ପୂର୍ବତନ ଅଧ୍ୟକ୍ଷ ମଧ୍ୟ ରହିସାରିଛନ୍ତି । ତେବେ ସେ ମଧ୍ୟ ଏହି ଦୁର୍ନିତୀରେ ସାମିଲ ଥିବା ନେଇ ଅନୁମାନ କରାଯାଉଛି ।