ପାଟନା:ଜମି ବଦଳରେ ଚାକିରି ଦୁର୍ନୀତି ମାମଲାରେ ଲଗାତାର ଭାବେ କାର୍ଯ୍ୟାନୁଷ୍ଠାନ ଗ୍ରହଣ କରୁଛି ସିବିଆଇ ଓ ଇଡି । ଗୋଟିଏ ପଟେ ସିବିଆଇ ପଚରାଉଚରା କରି ପ୍ରମାଣ ସଂଗ୍ରହ ଲାଗି ଉଦ୍ୟମ କରୁଥିବା ବେଳେ ସେପଟେ ଇଡିର ଅଧିକାରୀ ବ୍ୟୟ ବହିର୍ଭୂତ ସମ୍ପତ୍ତି ଠୁଳ କରିବାରେ ଲାଗିଛି । ଏହାରି ଭିତରେ ଅଣନିଶ୍ବାସୀ ହୋଇପଡ଼ିଛନ୍ତି ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ ଓ ତାଙ୍କ ପରିବାର । ଇଡି ରେଡ୍ ବେଳେ ଲାଲୁଙ୍କ ପରିବାର ନିକଟରୁ ପ୍ରାୟ ୧ କୋଟି ନଗଦ ଟଙ୍କା ଜବତ ହୋଇଥିବା ବେଳେ ୬୦୦ କୋଟି ଟଙ୍କା ଲେଣଦେଣ ହୋଇଥିବାର ପ୍ରମାଣ ମିଳିଛି ।
ଶୁକ୍ରବାର ଲାଲୁ ଓ ତାଙ୍କ ସମ୍ପର୍କୀୟଙ୍କ ଘରେ ରେଡ କରିଥିଲା ଇଡି । ତେବେ ଦେଶର ବିଭିନ୍ନ ସ୍ଥାନରେ ରହୁଥିବା ଲାଲୁଙ୍କ ପରିବାରର ୨୪ଟି ଠିକଣାରେ ଦୀର୍ଘ ୧୨ ଘଣ୍ଟା ଧରି ରେଡ କରାଯାଇଥିଲା । ତଦନ୍ତ ବେଳେ ପ୍ରାୟ ୧ କୋଟି ନଗଦ ଟଙ୍କା ସମେତ ଅନେକ ମୂଲ୍ୟବାନ ପଦାର୍ଥରେ ନିର୍ମିତ ଅଳଙ୍କାରକୁ ଜବତ କରିଛି ଇଡି । ଜମି ବଦଳରେ ଚାକିରି ଦେବା ଦୁର୍ନୀତି ମାମଲାରେ ପ୍ରାୟ ୬୦୦ କୋଟି ଟଙ୍କାର ବେଆଇନ ଭାବେ ଲେଣଦେଣ ହୋଇଛି ବୋଲି କହିଛି ଇଡି । ଲାଲୁଙ୍କ ପରିବାର ଓ ସହଯୋଗୀମାନେ ବିଭିନ୍ନ ସଂସ୍ଥାରେ କରିଥିବା ନିବେଶ ନେଇ ଯାଞ୍ଚ ଚାଲିଥିଲା । ଏଥିରୁ ଏହି ଠକେଇ ସମ୍ପର୍କରେ ଜଣାପଡ଼ିଛି ।
ମିଳିଥିବା ସୂଚନା ଅନୁସାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଲାଲୁ ଯାଦବଙ୍କ ଘନିଷ୍ଠ ବ୍ୟକ୍ତି, ପରିବାର ଓ ସହଯୋଗୀଙ୍କ ଘର ଉପରେ ରେଡ କରିଥିଲା । ଏହି ସମୟରେ ୧ କୋଟି ନଗଦ ଟଙ୍କା ଜବତ ହୋଇଥିଲା । ଏହାସହିତ ପ୍ରାୟ ୧୯୦୦ ଆମେରିକୀୟ ଡଲାର ମଧ୍ୟ ପୋଲିସ ଜବତ କରିଛି । ଖାଲି ସେତିକି ନୁହେଁ ୫୪୦ ଗ୍ରାମ ସୁନାର ବିସ୍କୁଟ, ଦେଢ କେଜି ଓଜନର ସୁନା ଅଳଙ୍କାର ଜବତ ହୋଇଛି । ଏହି ମୂଲ୍ୟବାନ ପଦାର୍ଥ ଓ ଅଳଙ୍କାର ଜବତ ହେବା ପରେ ଇଡି ଟ୍ବିଟ କରି ଏ ନେଇ ସୂଚନା ଦେଇଛି ।
ଏହି ଘୋଟାଲାରେ ବିହାରର ପୂର୍ବତନ ମୁଖ୍ୟମନ୍ତ୍ରୀ ରାବଡି ଦେବିଙ୍କୁ ମଧ୍ୟ ସିବିଆଇ ପଚରାଉଚରା କରିଥିଲା । ଏହାପରେ ସିବିଆଇ ଟିମ ଦିଲ୍ଲୀରେ ଲାଲୁ ଯାଦବଙ୍କୁ ମଧ୍ୟ ପଚରାଉଚରା କରିଥିଲେ । ଏହାପରେ କାର୍ଯ୍ୟାନୁଷ୍ଠାନ ନେଇଥିଲା ସିବିଆଇ । ପାଟନା, ଦିଲ୍ଲୀ, ମୁମ୍ବାଇ, ରାଞ୍ଚି ସମେତ ଦେଶର ପ୍ରାୟ ୨୪ଟି ସ୍ଥାନରେ ଲାଲୁଙ୍କ ଘନିଷ୍ଠ ଓ ପରିବାରଙ୍କ ଘରେ ରେଡ ମାରିଥିଲା । ସିବିଆଇ ରେଡ ପରେ ବିହାର ସମେତ ସାରା ଦେଶରେ ରାଜନୈତିକ ଉଷ୍ମତା ଦେଖିବାକୁ ମିଳିଛି ।