ନୂଆଦିଲ୍ଲୀ:ତେଲେଙ୍ଗାନା ବିଧାନ ପରିଷଦ ସଦସ୍ୟା ତଥା କେସିଆରଙ୍କ ଝିଅ କେ.କବିତାଙ୍କୁ ଆଜି 9 ଘଣ୍ଟା ଜେରା କରିବା ପରେ ଛାଡିଛି ପ୍ରବର୍ତ୍ତନ ନିର୍ଦ୍ଦେଶାଳୟ । ସକାଳୁ ଇଡି ମୁଖ୍ୟାଳୟରେ ହାଜର ହୋଇ ଜେରାର ସମ୍ମୁଖୀନ ହୋଇଥିବା କବିତାଙ୍କୁ ତଦନ୍ତକାରୀ ସଂସ୍ଥା ସଂଧ୍ୟାରେ ଛାଡିଛି । କବିତା ତାଙ୍କ ଦିଲ୍ଲୀ ବାସଭବନକୁ ଫେରିଛନ୍ତି । ଆଜି ପ୍ରଥମ ଦିନରେ 9 ଘଣ୍ଚା ଜେରା ହୋଇଥିବା କବିତାଙ୍କୁ ପୁଣି 16 ତାରିଖରେ ହାଜର ହେବା ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟ ସମନ ଜାରି କରିଛି ।
କେନ୍ଦ୍ରୀୟ ସଂସ୍ଥାର ସମନ ଅନୁସାରେ, କବିତା ଆଜି ତୋଗଲକ ରୋଡରେ ଥିବା ନିଜ ପିତାଙ୍କ ସରକାରୀ ବାସଭବନରୁ ସଂସ୍ଥା ଅଭିମୁଖେ ବାହାରି ଥିଲେ । ପୂର୍ବାହ୍ନ ପ୍ରାୟ 11 ଟାରେ ସେ ମୁଖ୍ୟାଳୟରେ ପହଞ୍ଚିବା ପରେ ତାଙ୍କୁ ଜେରା ଆରମ୍ଭ କରାଯାଇଥିଲା । ପ୍ରାୟ 9 ଘଣ୍ଟା ଜେରା ପରେ ସେ ସଂଧ୍ୟାରେ ମୁଖ୍ୟାଳୟ ଛାଡିଥିଲେ । ସେ ତାଙ୍କ ପିତାଙ୍କ ସରକାରୀ ବାସଭବନରେ ପହଞ୍ଚିବା ପରେ ତାଙ୍କୁ ଦଳୀୟ କର୍ମକର୍ତ୍ତାମାନେ ସ୍ବାଗତ କରୁଥିବା ମଧ୍ୟ ଦେଖିବାକୁ ମିଳିଥିଲା । ତେବେ କବିତାଙ୍କ ମାମଲାରେ ଅଧିକ ତଦନ୍ତର ଆବଶ୍ୟକତା ଅନୁଭବ କରିଛି ତଦନ୍ତକାରୀ ସଂସ୍ଥା । ପୁଣି ଥରେ ସେ 16 ତାରିଖରେ ସଂସ୍ଥାରେ ହାଜର ହେବା ପାଇଁ ସମନ ପାଇଛନ୍ତି ।
ତେବେ ଆଜି ଜେରା ସମୟରେ ତଦନ୍ତକାରୀ ସଂସ୍ଥ କବିତାଙ୍କ ଠାରୁ ଅନେକ କିଛି ସୂଚନା ସଂଗ୍ରହ କରିଥିବା ସୂଚନା ମିଳିଛି । ସେହିପରି ଏହି ଅଭିଯୋଗ ଅବଧି ମଧ୍ୟରେ ସେ ବ୍ୟବହାର କରୁଥିବା ସେଲଫୋନ ଓ ଅନ୍ୟ କିଛି ବୈଦୁତିକ ସାମଗ୍ରୀ ମଧ୍ୟ ସଂସ୍ଥା ନିକଟରେ ଦାଖଲ କରିବାକୁ ତାଙ୍କୁ ନିର୍ଦ୍ଦେଶ ମିଳିଥିବା ନେଇ ମଧ୍ୟ ସୂଚନା ରହିଛି । ଆଜି ମାମଲାର ଅନ୍ୟତମ ଅଭିଯୁକ୍ତ ତଥା ହାଇଦ୍ରାବାଦର ବ୍ୟବସାୟୀ ରାମଚନ୍ଦ୍ର ପିଲ୍ଲାଇ ସହ ମୁହାଁମୁହିଁ ଜେରା କରାଯାଇଥିବା ମଧ୍ୟ ସୂଚନା ମିଳିଛି ।