ନୂଆଦିଲ୍ଲୀ: ନ୍ୟାସନାଲ ହେରାଲ୍ଡ ମାମଲାରେ ଆଜି ଦ୍ବିତୀୟ ଦିନରେ 10 ଘଣ୍ଟା ଜେରାର ସମ୍ମୁଖୀନ ହୋଇଥିବା ରାହୁଲ ଗାନ୍ଧୀ ପୁଣି ଥରେ ଆସନ୍ତାକାଲି କ୍ରମାଗତ ତୃତୀୟ ଥର ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟରେ ହାଜର ହେବେ । ନ୍ୟାସନାଲ ହେରାଲ୍ଡ ପେପର ଦୂର୍ନୀତି ମାମଲାରେ ରାହୁଲଙ୍କୁ ମାରାଥାନ ଜେରା ଜାରି ରଖିଛି ତଦନ୍ତକାରୀ ସଂସ୍ଥା । ଗତକାଲି ଦୁଇ ପର୍ଯ୍ୟାୟରେ ଜେରା ପରେ ଆଜି ପୂର୍ବାହ୍ନରେ ପୁଣି ରାହୁଲ ହାଜର ହୋଇଥିଲେ । ଆଜି ଦୀର୍ଘ 10 ଘଣ୍ଟାର ଜେରା ହୋଇଛନ୍ତି ରାହୁଲ ।
ଆଜି ରାହୁଲ ଭଉଣୀ ତଥା କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀଙ୍କ ସହ ଇଡି କାର୍ଯ୍ୟାଳୟରେ ପହଞ୍ଚିଥିଲେ । ଗତକାଲି କଂଗ୍ରେସର ଶୋଭଯାତ୍ରା ପରେ ଆଜି ରାହୁଲ ଗାନ୍ଧୀଙ୍କ ବାସଭନରୁ ଇଡି କାର୍ଯ୍ୟାଳୟ ପର୍ଯ୍ୟନ୍ତ ବ୍ୟାପକ ପୋଲିସ ମଧ୍ୟ ମୁତୟନ ହୋଇଥିଲେ । ଏହି ସମୟରେ ନାରାବାଜି ଓ ପ୍ରଦର୍ଶନ କରି ଏକାଧିକ ବରିଷ୍ଠ କଂଗ୍ରେସ ନେତା ମଧ୍ୟ ଥାନାରେ ଅଟକ ରହିଛନ୍ତି । ଗତକାଲି ମଧ୍ୟ ଜେରାର ପ୍ରଥମ ଦିନରେ ରାହୁଲଙ୍କ ସହ ଅନେକ ବରିଷ୍ଠ ନେତା ଓ ଶତାଧିକ ସମର୍ଥକ ମଧ୍ୟ ରାହୁଲଙ୍କ ସହ ଇଡି କାର୍ଯ୍ୟାଳୟ ଅଭିମୁଖେ ପଦଯାତ୍ରା କରିଥିଲେ ।