ଚଣ୍ଡିଗଡ: 3 ନାବାଳିକା ଝିଅଙ୍କୁ ହତ୍ୟା କଲା ମଦ୍ୟପ ବାପା । ପଞ୍ଜାବ ଜଳନ୍ଧର ସହରରେ ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ତିନି ନାବାଳିକା ଗତକାଲିଠାରୁ ନିଖୋଜ ଥିଲେ । ଆଜି ପଠାନକୋଟ ହାଇଓ୍ବେ ନିକଟରେ ସେମାନଙ୍କର ମୃତଦେହ ଜବତ କରିଛି ପୋଲିସ । ସମସ୍ତ 3 ଜଣଙ୍କୁ ସେମାନଙ୍କ ବାପା ହିଁ ହତ୍ୟା କରିଥିବା ପ୍ରାଥମିକ ତଦନ୍ତ ଆଧାରରେ ପୋଲିସ ସ୍ପଷ୍ଟ କରିଛି । ପୋଲିସ ଅଭିଯୁକ୍ତକୁ ଗିରଫ ମଧ୍ୟ କରିଛି ।
ସ୍ଥାନୀୟ ଏସଏସପି ମୁଖବିନ୍ଦର ସିଂ ଘଟଣା ସମ୍ପର୍କରେ ଗଣମାଧ୍ୟମରେ ସୂଚନା ଦେଇ କହିଛନ୍ତି, ଅଭିଯୁକ୍ତ ହେଉଛି ସୁଶୀଲ ମଣ୍ଡଳ । ସୁଶୀଲ, ପତ୍ନୀ ମଞ୍ଜୁ ମଣ୍ଡଳ ଓ ନିଜର 5 ସନ୍ତାନଙ୍କ ସହ ଜଳନ୍ଧର ସହରର ପଠାନକୋଟ ହାଇଓ୍ବେ ନିକଟରେ ରହୁଥିଲା । ଅଭିଯୁକ୍ତ ସର୍ବଦା ମଦ୍ୟପାନ କରି ଘରେ ବିଶୃଙ୍ଖଳା ମଧ୍ୟ ସୃଷ୍ଟି କରୁଥିଲା । ଆର୍ଥିକ ଅଭାବ ଓ ଅଭିଯୁକ୍ତର ନିୟମିତ ନିଶାସେବନ କାରଣରୁ ଘରେ କଳହ ଲାଗି ରହୁଥିଲା । ଏହି କାରଣରୁ ଅଭିଯୁକ୍ତ ସୁଶୀଲ ନିଜର ଉତ୍ତେଜିତ ହୋଇ 3 ନାବାଳିକା କନ୍ୟା ଅମୃତା କୁମାରୀ (9), କାଞ୍ଚନ କୁମାରୀ (7) ଓ ବାସୁ (3)କୁ ହତ୍ୟା କରିଛି । ଗତକାଲି ଅଭିଯୁକ୍ତ ସୁଶୀଲ ସମସ୍ତ 3 ନାବାଳିକା ଝିଅଙ୍କୁ ବିଷାକ୍ତ ଔଷଧ ଖାଇବାକୁ ଦେଇ ଏକ ଲୁହା ଟ୍ରଙ୍କରେ ବନ୍ଦ କରିଦେଇଥିଲା । ପରେ ନିଜ ପତ୍ନୀ ସହ କାମକୁ ଚାଲିଯାଇଥିଲା ।