ଶ୍ରୀନଗର: ସେନାର ଗୁଳିରେ ଆକାଶ ମାର୍ଗରୁ ଖସିଲା ଡ୍ରୋନ । ଜମ୍ମୁ କାଶ୍ମୀରର କାଞ୍ଚକ ଅଞ୍ଚଳରୁ ଏକ ଡ୍ରୋନ ଜବତ କରାଯାଇଛି । ଡ୍ରୋନ ମଧ୍ୟରୁ ବିସ୍ଫୋରକ ସାମଗ୍ରୀକୁ ଜବତ କରିଛି ଶ୍ରୀନଗର ପୋଲିସ । ଏନେଇ ସ୍ଥାନୀୟ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ ବଢାଇ ଦିଆଯାଇଛି ।
ଗତ ଜୁଲାଇ 16ରେ ଜମ୍ମୁ ଏୟାର ବେସର ଚାରିପାଖରେ କାର୍ଯ୍ୟ କରୁଥିବା ଏକ ଡ୍ରୋନ ଉଡୁଥିବାର ସୂଚନା ମିଳିଥିଲା । ଜମ୍ମୁ ଏୟାର ବେସରେ ଡ୍ରୋନ ଆକ୍ରମଣ ପରେ ନ୍ୟାସନାଲ ସିକ୍ୟୁରିଟି ଗାର୍ଡ (ଏନଏସଜି) ଦ୍ବାରା ଆଣ୍ଟି ଡ୍ରୋନ ସିଷ୍ଟମର ରାଡାର ଲଗାଯାଇଥିଲା ।
ଗତ ମାସରେ ଜମ୍ମୁ ଏୟାରବେସରେ ଡ୍ରୋନ୍ ଆକ୍ରମଣ ପର ଠାରୁ କେନ୍ଦ୍ର ଶାସିତ ଅଞ୍ଚଳରେ ଡ୍ରୋନ ଉଡାଣ ଅଧିକ ଦେଖିବାକୁ ମିଳୁଛି । ବିଏସ୍ଏଫର ତଥ୍ୟ ଅନୁଯାୟୀ, ଜୁଲାଇ 13 ଓ 14ର ମଧ୍ୟବର୍ତ୍ତୀ ରାତିରେ ଆର୍ନିଆ ସେକ୍ଟରରେ ସୁରକ୍ଷା ବାହିନୀ 200 ମିଟର ଉଚ୍ଚରେ ଏକ ଡ୍ରୋନ ଉଡିବା ସମୟରେ ଲାଲବତୀ ଜଳୁଥିବା ଦେଖିଥିଲେ । ପରେ ସୁରକ୍ଷା ବାହିନୀ ଆରମ୍ଭ କରିଥିଲେ ଅପରେସନ । ଡ୍ରୋନ ଉପରେ ଗୁଳି ଚଳାଇବାରୁ ତାହା ଫେରିଯାଇଥିଲା ।