ଥିରୁଅନନ୍ତପୁରମ: କେରଳରେ ଦେଖିବାକୁ ମିଳିଛି ହୃଦୟବିଦାରକ ଘଟଣା । ମଲ୍ଲପୁରମ ଜିଲ୍ଲା ସ୍ଥିତ ଇଡକ୍କରାରୁ ସାମନାକୁ ଆସିଛି ଏଭଳି ଏକ ଛାତିଥରା ଦୃଶ୍ୟ । ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହୋଇଛି । ଭାଇରାଲ ହେଉଥିବା ଏଭଳି ଭିଡିଓରେ ଦେଖିବାକୁ ମିଳିଛି ଯେ, ଗୋଟିଏ କୁକୁରକୁ ଅତି ନୃଶଂସ ଭାବେ ମୋଟରସାଇକେଲ ପଛରେ ବନ୍ଧାଯାଇ ଘୋଷାଡ଼ି ଘୋଷାଡ଼ି ନିଆଯାଇଛି । କୁକୁରଟିକୁ ୧ କିଲୋମିଟରରୁ ଊର୍ଦ୍ଧ୍ବ ବାଟ ଘୋଷାଡ଼ି ନେଇଥିବା ମୋଟରସାଇକେଲ ଚାଳକଙ୍କୁ ଶେଷରେ କାବୁ କରିଥିଲେ ସ୍ଥାନୀୟଲୋକେ ।
ଭିଡିଓ କଏଦ କରିଥିବା ପ୍ରତ୍ୟକ୍ଷଦର୍ଶୀଙ୍କ କହିବା ମୁତାବକ, ଉକ୍ତ ବ୍ୟକ୍ତିଙ୍କୁ ଘଟଣା ସମ୍ପର୍କରେ ପଚରାଯାଇଥିଲା । ତେବେ କୁକୁରଟି ମୃତ ଥିବାରୁ ବ୍ୟକ୍ତି ଜଣଙ୍କ ମୋଟରସାଇକେଲରେ ଏଭଳି ଘୋଷାଡି ନେଇଥିବା କହି ଅଜବ ସଫେଇ ଦେଇଛନ୍ତି । ସେ କୁକୁରଟିର ମୃତଦେହ ରାସ୍ତାରେ ପଡ଼ିଥିବା ଦେଖିବାକୁ ପାଇଥିଲେ । ବ୍ୟକ୍ତି ଜଣକ କୁକୁରକୁ ଛୁଇଁବାକୁ ଚାହୁଁ ନଥିଲେ ତେଣୁ ମୃତଦେହକୁ ନିର୍ଦ୍ଦିଷ୍ଟ ସ୍ଥାନରେ ପହଞ୍ଚାଇବା ପାଇଁ ସେପରି କରିଥିବା କହିଛନ୍ତି । ଅପରପକ୍ଷେ ଏହି ଦୃଶ୍ୟ ଦେଖିବା ପରେ ମାନବିକତା ହଜିଯାଇଥିବା କହି ଘଟଣାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ପ୍ରତ୍ୟକ୍ଷଦର୍ଶୀ । ଅନ୍ୟ ଉପାୟରେ କୁକୁରଟିକୁ ନଆଣି ଏଭଳି ଘୋଷାଡ଼ି ଆଣିବା ଘଟଣାକୁ ତୀବ୍ର ନିନ୍ଦା କରାଯାଇଛି ।