ନୂଆଦିଲ୍ଲୀ:ଏବେ ବିମାନର ପାଇଲଟଙ୍କ ସମେତ କ୍ୟାବିନ କ୍ର୍ୟୁ ସଦସ୍ୟମାନେ ପରଫ୍ୟୁମ ସମେତ ଏକାଧିକ ସାମଗ୍ରୀ ବ୍ୟବହାର କରିପାରିବେ ନାହିଁ । ବେସାମରିକ ବିମାନ ଉଡାଣ ନିର୍ଦ୍ଦେଶାଳୟ (ଡିଜିସିଏ) ଜାରି କରିଥିବା ସଂଶୋଧିତ ନିୟମାବଳିରେ ପରଫ୍ୟୁମ, ଟୁଥଜେଲ,ମେଡିକେସନ ଓ ମାଉଥଓ୍ବାସ ପରି ଏକାଧିକ ସାମଗ୍ରୀର ବ୍ୟବହାରକୁ ବାଦ ଦିଆଯାଇଛି । ଏହି ସବୁ ସାମଗ୍ରୀର କମ୍ପୋଜିସନରେ ଆଲକୋହଲର ବ୍ୟବହାର ହେଉଥିବାରୁ ଏହାକୁ ନିଷେଧ ଶ୍ରେଣୀଭୁକ୍ତ କରାଯାଇଛି । ସମସ୍ତ ସରକାରୀ ଫ୍ଲାଇଁ ସ୍କୁଲ ଓ ସଂସ୍ଥା ସମେତ ଘରୋଇ ଏୟାରଲାଇନ୍ସ କର୍ମଚାରୀଙ୍କ କ୍ଷେତ୍ରରେ ଏହି ନିୟମାବଳି ଲାଗୁ କରାଯିବା ।
ବିମାନ ଉଡାଣ ପୂର୍ବରୁ ଓ ପରେ କରାଯାଉଥିବା ଶ୍ବାସକ୍ରିୟା ପରୀକ୍ଷାରେ ମିଳିଥିବା ତଥ୍ୟ ଅନୁସାରେ ଏହି ସାମଗ୍ରୀରେ ଆଲକୋହଲର ବ୍ୟବହାର ଓ ଏହାର ପ୍ରଭାବ ମଧ୍ୟ ସ୍ପଷ୍ଟ ହୋଇଛି । ତେଣୁ ଆଲକୋହଲ କଣ୍ଟେଣ୍ଟ ଥିବା ଏପରି ସାମଗ୍ରୀ ବ୍ୟବହାର କରିବା କିମ୍ବା ସାଙ୍ଗରେ ନେବା ଉପରେ ସଂଶୋଧିତ ନିୟମାବଳିରେ ରୋକ ଲଗାଯାଇଛି । ଏପରିକି ଏହି ବିମାନ କମ୍ପାନୀ ସଦସ୍ୟମାନେ କୌଣସି ଉଡାଣ କାର୍ଯ୍ୟକଳାପ ପୂର୍ବରୁ ବ୍ରିଥ-ଆନାଲାଇସରରେ ସେମାନଙ୍କ ସ୍ବାଶକ୍ରିୟାର ମାତ୍ରା ମଧ୍ୟ ପରୀକ୍ଷା କରିବା ବାଧ୍ୟତାମୂଳକ ହେବ ।
ଡିଜିସିଏ ରିପୋର୍ଟ ଅନୁସାରେ, ଚଳିତବର୍ଷ ମଧ୍ୟ ସୁଦ୍ଧା 33 ଜଣ ପାଇଲଟ ଓ 97 କ୍ୟାବିନ କ୍ର୍ୟୁ ସଦସ୍ୟ ବାଧ୍ୟତାମୂଳକ ଆଲକୋହଲ ଟେଷ୍ଟିଂରେ ଧରା ପଡିଥିଲେ । ସେହିପରି ଗତବର୍ଷ ସମାନ ଅବଧି ମଧ୍ୟରେ 14 ଜଣ ପାଇଲଟ ଓ 54 ଜଣ କ୍ର୍ୟୁ ସଦସ୍ୟ ଏହି ଟେଷ୍ଟିଂରେ ବିଫଳ ହୋଇଥିଲେ । ଏମାନେ ନିଶାସକ୍ତ ଥିବା ଜଣାପଡିଥିଲା । ଏହି ବିମାନ କର୍ମଚାରୀମାନେ ବିଭିନ୍ନ ଏୟାରଲାଇନ୍ସରୁ ଥିଲେ । ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରିଥିଲା ଉଡାଣ ନିର୍ଦ୍ଦେଶାଳୟ । ଆଜି ଜାରି କରାଯାଇଥିବା ସଂଶୋଧିତ ନିୟମାବଳିରେ ଅନ୍ୟ କିଛି ଆଲକୋହଲିକ କଣ୍ଟେଣ୍ଟ ଥିବା ସାମଗ୍ରୀକୁ ମଧ୍ୟ ଏମାନଙ୍କ ବ୍ୟବହାରରୁ ବାଦ ଦିଆଯାଇଛି ।