ମୁମ୍ବାଇ: ଶ୍ମଶାନ ପାଲଟିଛି ଭୂସ୍ବର୍ଗ । ଶ୍ମଶାନଘାଟରେ ଭୋଜିଭାତର ଆୟୋଜନ ହେଉଛି, ଜନ୍ମଦିନ ସେଲିବ୍ରେସନ ମଧ୍ୟ ଚାଲିଛି । ବାବା ଭୋଳାନାଥଙ୍କ ଦର୍ଶନ ପାଇଁ ଶ୍ମଶାନକୁ ଆସୁଛନ୍ତି ଶହ ଶହ ପର୍ଯ୍ୟଟକ । ଏକଥା ଶୁଣିବାକୁ ହୁଏତ ଆଶ୍ଟର୍ଯ୍ୟ ଲାଗୁଥାଇ ପାରେ, ହେଲେ ମହାରାଷ୍ଟ୍ର ଅମରାବତୀ ଜିଲ୍ଲାରେ ରହିଛି ଏହିଭଳି ଏକ ଆକର୍ଷଣୀୟ ଶ୍ମଶାନ । ଯେଉଁଠାରେ ଲୋକମାନେ ବୁଲିବାକୁ ଯାଆନ୍ତି ଓ ମଉଜ ମଜଲିସ୍ କରନ୍ତି । ସ୍ଥାନୀୟ ଗ୍ରାମବାସୀ ଓ ଯୁବକଙ୍କ ପରିଶ୍ରମରେ ଗାଁର ଅପରିଷ୍କାର ଶ୍ମଶାନ ଏପରି ସୁନ୍ଦର ପାର୍କରେ ପରିଣତ ହୋଇଛି ।
ଅମରାବତୀ ଜିଲ୍ଲା ତିବସା ତାଲୁକ ଅନ୍ତର୍ଗତ କୁର୍ହା ଗ୍ରାମରେ ରହିଛି ଏହି ଆକର୍ଷଣୀୟ ଶ୍ମଶାନ । ସୂଚନା ମୁତାବକ, ୨୦୧୯ରେ କୁର୍ହା ଗ୍ରାମର ଯୁବକମାନେ ଏକତ୍ରିତ ହୋଇ ପୁରା କଲ୍ୟାଣ ସଂଗଠନ(Pura Welfare Association) ଗଠନ କରିଥିଲେ । ସଂଘର କର୍ମକର୍ତ୍ତାମାନ ପ୍ରଥମେ ଗ୍ରାମରେ ଥିବା ଅଳିଆ ଆବର୍ଜନାରେ ପରିପୂର୍ଣ୍ଣ ଶ୍ମଶାନଘାଟ ସଫାସୁତୁରା କରିବାକୁ ଅଭିଯାନ ଆରମ୍ଭ ଚଳାଇଥିଲେ । ଏହାପରେ ଶ୍ମଶାନର ସୌନ୍ଦର୍ଯ୍ୟକରଣ ପାଇଁ ଅଣ୍ଟା ଭିଡିଥିଲେ ସମସ୍ତେ । ସେମାନଙ୍କ ଏହି ପ୍ରଚେଷ୍ଟାରେ ଗ୍ରାମବାସୀମାନେ ମଧ୍ୟ ସହାୟତା କରିଥିଲେ । ଲକ୍ଡାଉନ ସମୟରେ ଗ୍ରାମବାସୀ ପ୍ରତିଦିନ ମାସ୍କ ପିନ୍ଧି ଏଠାରେ ଅନେକ ବୃକ୍ଷରୋପଣ କରିବା ସାଙ୍ଗକୁ ସଫେଇ କାର୍ଯ୍ୟ କରିଥିଲେ ।