ନୂଆଦିଲ୍ଲୀ: ତିହାର ଜେଲରେ ଗ୍ୟାଙ୍ଗଷ୍ଟାର ଟିଲୁକୁ ହତ୍ୟା । ଆଜି (ମଙ୍ଗଳବାର) ସକାଳେ ତିହାର ଜେଲ ଭିତରେ ରୋହିଣୀ କୋର୍ଟ ଗୁଳିକାଣ୍ଡର ମାଷ୍ଟର ମାଇଣ୍ଡ ଟିଲୁ ତାଜପୁରିୟାକୁ ହତ୍ୟା କରାଯାଇଛି । ଜେଲ ଭିତରେ ଟିଲୁର ବିପକ୍ଷ ଗୋଷ୍ଠୀର ସଦସ୍ୟ ତାକୁ ଲୁହା ରଡରେ ପିଟିପିଟି ହତ୍ୟା କରିଛନ୍ତି । ଯାହା ସୂଚନା ମିଳିଛି, ଜେଲ୍ରେ ଥିବା ଜିତେନ୍ଦ୍ର ଗୋଗି ଗ୍ୟାଙ୍ଗର ସୁଟର ଯୋଗେଶ ଓ ତାର ସହଯୋଗୀ ଟିଲୁକୁ ଲୁହା ରଡରେ ଆକ୍ରମଣ କରିଥିଲେ । ଗୁରୁତର ଅବସ୍ଥାରେ ତାକୁ ଦୀନ ଦୟାଲ ଉପାଧ୍ୟାୟ ହସ୍ପିଟାଲକୁ ନିଆଯାଇଥିଲା । ସେଠାରେ ଡାକ୍ତର ଏହି ଗ୍ୟାଙ୍ଗଷ୍ଟାରକୁ ମୃତ ଘୋଷଣା କରିଛନ୍ତି । ଏନେଇ ତିହାର୍ ଜେଲ୍ ଅଧିକାରୀଙ୍କ ପକ୍ଷରୁ ସୂଚନା ଦିଆଯାଇଛି ।
ଏହାମଧ୍ୟ ପଢନ୍ତୁ: ଚାକିରିରୁ ବିଦା ହେବେ ମେଦବହୁଳ ଓ ମଦ୍ୟପ ପୋଲିସ ବାବୁ: ସରକାର ଆଣିଲେ ନିୟମ
ଅତିରିକ୍ତ ଡିସିପି ଅକ୍ଷତ କୌଶଲ କହିଛନ୍ତି ଯେ, ଆଜି ସକାଳ ୭ଟା ସମୟରେ ଦୀନ ଦୟାଲ ହସ୍ପିଟାଲରେ ତିହାର ଜେଲରୁ ଦୁଇ ଜଣ ବିଚାରଧୀନ କଏଦୀ ଭର୍ତ୍ତି ହୋଇଥିବାର ସୂଚନା ମିଳିଥିଲା । ସେମାନଙ୍କ ମଧ୍ୟରୁ ଜଣଙ୍କୁ ଡାକ୍ତର ମୃତ ଘୋଷଣା କରିଥିଲେ । ମୃତ କଏଦୀ ଗ୍ୟାଙ୍ଗଷ୍ଟାର ଟିଲୁ ଓରଫ ସୁନୀଲ ବୋଲି ପରିଚୟ ମିଳିଛି । ଚିକିତ୍ସାଧୀନ ଥିବା ରୋହିତ ନାମକ ଅନ୍ୟ ଜଣେ କଏଦୀର ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ରହିଛି ।