ନୂଆଦିଲ୍ଲୀ:କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କୁ ନୋଟିସ ଜାରି କରିଛି ଦିଲ୍ଲୀ ପୋଲିସ । ଭାରତ ଯୋଡୋ ଯାତ୍ରା ସମୟରେ ରାହୁଲ ଦେଇଥିବା ମହିଳା ଯୌନ ନିର୍ଯାତନାର ଶିକାର ହେଉଥିବା ସମ୍ପର୍କିତ ବୟାନକୁ ନେଇ ପୋଲିସ ଏହି ନୋଟିସ ଜାରି କରିଛି । ଭାରତ ଯୋଡୋ ଯାତ୍ରା ସମୟରେ ରାହୁଲ ଏକ ସାଧାରଣ ସଭାକୁ ସମ୍ବୋଧିତ କରି ଦେଶରେ ନାରୀମାନେ ଏବେ ମଧ୍ୟ ଯୌନ ନିର୍ଯାତନାର ଶିକାର ହେଉଛନ୍ତି ବୋଲି କହିଥିଲେ ।
ତେବେ ଏହାକୁ ନେଇ ଦିଲ୍ଲୀ ପୋଲିସ ରାହୁଲଙ୍କୁ ଜାରି କରିଥିବା ନୋଟିସରେ କହିଛି, ମହିଳାମାନେ କେଉଁଠି ଏପରି ଯୌନ ନିର୍ଯାତନାର ଶିକାର ହେଉଛନ୍ତି ରାହୁଲ ସେ ସମ୍ପର୍କରେ ପୋଲିସ ନିକଟରେ ତଥ୍ୟ ରଖନ୍ତୁ । ପୋଲିସ ଏ ଦିଗରେ କାର୍ଯ୍ୟାନୁଷ୍ଠାନ ଗ୍ରହଣ କରିବ । ଯଦି କେହି ମହିଳା ରାହୁଲଙ୍କ ନିକଟରେ ଏନେଇ ଅଭିଯୋଗ କରିଥାନ୍ତି, ସେ ଏ ସମ୍ପର୍କରେ ପୋଲିସକୁ ଜଣାଇଲେ କାର୍ଯ୍ୟାନୁଷ୍ଠାନ ସଫଳ ହୋଇପାରନ୍ତା ବୋଲି ଦିଲ୍ଲୀ ପୋଲିସ ନୋଟିସରେ କହିଛି । ଭାରତ ଯୋଡୋ ଯାତ୍ରା ସମୟର ଏକାଧିକ ପ୍ରସଙ୍ଗରେ ରାହୁଲ ବିଜେପି ସରକାରକୁ ସମାଲୋଚନା କରିଥିଲେ । ଯାତ୍ରାର ଶେଷ ଭାଗରେ ଶ୍ରୀନଗରର ଆୟୋଜିତ ଏକ କାର୍ଯ୍ୟକ୍ରମରେ ରାହୁଲ କହିଥିଲେ, ଏବେ ମଧ୍ୟ ଦେଶରେ ମହିଳାମାନେ ଯୌନ ଶୋଷଣର ଶିକାର ହେଉଛନ୍ତି ।
ଏହା ମଧ୍ୟ ପଢନ୍ତୁ:-Rahul on London remark: ‘ସରକାର ତମାସା କରୁଛନ୍ତି, ମୁଁ ସଂସଦରେ କହିବି’
ନିକଟରେ ରାହୁଲ ଲଣ୍ଡନର ଏକାଧିକ କାର୍ଯ୍ୟକ୍ରମରେ ଅଂଶଗ୍ରହଣ କରି ସ୍ବଦେଶ ଫେରିଛନ୍ତି । ତାଙ୍କ ଲଣ୍ଡନ ବୟାନକୁ ନେଇ ମଧ୍ୟ ବିବାଦ ଲାଗି ରହିଛି । ସେ ଦେଇଥିବା ମନ୍ତବ୍ୟକୁ ସିଧା ଦେଶ ବିରୋଧୀ ମନ୍ତବ୍ୟ ବୋଲି କହିଥିଲା ଶାସକ ଭାରତୀୟ ଜନତା ପାର୍ଟି । ମୋଦି ସରକାରର ଏକାଧିକ ମନ୍ତ୍ରୀ ରାହୁଲ ଓ କଂଗ୍ରେସକୁ ଟାର୍ଗେଟ କରିବା ଏପରି ଦେଶ ବିରୋଧୀ ମନ୍ତବ୍ୟ ପାଇଁ କ୍ଷମା ପ୍ରାର୍ଥନା ଦାବି କରିଥିଲେ । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ରାହୁଲଙ୍କୁ ଗୃହରେ କ୍ଷମା ମାଗିବା ପାଇଁ ବାଚସ୍ପତି ନିର୍ଦ୍ଦେଶ ଜାରି କରନ୍ତୁ ବୋଲି ଦାବି କରିଥିଲେ । କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ମଧ୍ୟ ରାହୁଲ ଦେଶବାସୀଙ୍କୁ କ୍ଷମା ମାଗନ୍ତୁ ବୋଲି ଦାବି କରିଥିଲେ । କଂଗ୍ରେସ ରାହୁଲଙ୍କ ସମର୍ଥନରେ ବାହାରିଥିଲା । ଏହା କୌଣସି ଦେଶ ବିରୋଧୀ ମନ୍ତବ୍ୟ ନୁହେଁ କିମ୍ବା କ୍ଷମା ମାଗିବାର କୌଣସି ଆବଶ୍ୟକତା ନାହିଁ ବୋଲି କହିଥିଲା ।
ଏହି ବିବାଦ ମଧ୍ୟରେ ଆଜି ରାହୁଲ ସଂସଦରେ ପହଞ୍ଚିଥିଲେ । ପରେ ସେ ପ୍ରେସମିଟ୍ କରି ଏହି ଅଭିଯୋଗରେ ଗୃହରେ ଉତ୍ତର ରଖିବା ପାଇଁ ବାଚସ୍ପତି ବିର୍ଲାଙ୍କୁ ଅବଗତ ମଧ୍ୟ କରିଛନ୍ତି । ହେଲେ ତାଙ୍କୁ ଗୃହରେ କହିବାକୁ ଦିଆଯିବନି ବୋଲି ସେ ଆଶଙ୍କା ବ୍ୟକ୍ତ କରିଛନ୍ତି । ଆସନ୍ତାକାଲି ସେ ଗୃହରେ ସେ ଲଣ୍ଡନରେ ଦେଇଥିବା ମନ୍ତବ୍ୟ ନେଇ ଉତ୍ତର ରଖିପାରନ୍ତି । ଅନ୍ୟପଟେ ଦିଲ୍ଲୀ ପୋଲିସର ନୋଟିସରେ ରାହୁଲ ଗାନ୍ଧୀ କଣ ପ୍ରତିକ୍ରିୟା ରଖୁଛନ୍ତି ତାହା ଦେଖିବାର କଥା ।
ବ୍ୟୁରୋ ରିପୋର୍ଟ, ଇଟିଭି ଭାରତ
