ନୂଆଦିଲ୍ଲୀ: ହାଇକୋର୍ଟରୁ ନିରାଶ ହେଲା ଆପ୍ ନେତା ମନୀଷ ସିସୋଦିଆ । ଅବକାରୀ ନୀତି ଦୁର୍ନୀତି ମାମଲାରେ ଜାମିନ ଦେବାକୁ ମନା କଲେ କୋର୍ଟ । ଆଜି ଦିଲ୍ଲୀ ହାଇକୋର୍ଟରେ ପୂର୍ବତନ ଉପମୁଖ୍ୟମନ୍ତ୍ରୀ ସିସୋଦିଆଙ୍କ ଜାମିନ ଆବଦେନ ଖାରଜ ହୋଇଯାଇଛି । ଜଷ୍ଟିସ ଦିନେଶ କୁମାର ଶର୍ମାଙ୍କ ଖଣ୍ଡପୀଠ ଆବେଦନ ଖାରଜ କରି କହିଛନ୍ତି, ସିସୋଦିଆ ଜଣେ ପ୍ରଭାବଶାଳୀ ବ୍ୟକ୍ତିବିଶେଷ ହୋଇଥିବାରୁ ପ୍ରମାଣ ପ୍ରଭାବିତ ହେବାର ଆଶଙ୍କା ରହିଛି ।
ସିବିଆଇ ଏହି ବହୁଚର୍ଚ୍ଚିତ ଦିଲ୍ଲୀ ଅବକାରୀ ଦୁର୍ନୀତି ମାମଲାର ତଦନ୍ତ କରୁଛି । ଏହି ମାମଲାରେ ତିହାର ଜେଲ୍ରେ ବନ୍ଦ ଥିବା ସିସୋଦିଆ ପ୍ରଥମେ ଜାମିନ ପାଇଁ ଦିଲ୍ଲୀ ରାଉଜ ଆଭିନ୍ୟୁ କୋର୍ଟର ଦ୍ବାରସ୍ଥ ହୋଇଥିଲେ । ସେଠାରେ ଜାମିନ୍ ଆବେଦନ ଅଗ୍ରାହ୍ୟ ହେବା ପରେ ସେ ହାଇକୋର୍ଟକୁ ଯାଇଥିଲେ । ହାଇକୋର୍ଟ ବିଚାରପତି ଦିନେଶ କୁମାରଙ୍କ ଖଣ୍ଡପୀଠ ଉଭୟ ସିବିଆଇ ଓ ସିସୋଦିଆଙ୍କ ଓକିଲଙ୍କ ପକ୍ଷ ଶୁଣିବା ପରେ ମେ' ୧୧ରେ ଜାମିନ ଆବେଦନ ଉପରେ ରାୟ ସଂରକ୍ଷିତ ରଖିଥିଲେ । ମାମଲାର ଶୁଣାଣି ସମୟରେ ସିବିଆଇ ଜାମିନ ଆବେଦନକୁ ବିରୋଧ କରି ଯୁକ୍ତି କରିଥିଲା ଯେ, ଆବେଦନକାରୀଙ୍କ(ସିସୋଦିଆ) ଦବଦବା ରହିଛି । ବଡ଼ ବଡ଼ ଅଧିକାରୀ ଓ ଅମଲାମାନଙ୍କ ସହ ଘନିଷ୍ଠ ସମ୍ପର୍କ ଅଛି । ତାଙ୍କର ଦଳୀୟ ସହଯୋଗୀ ମଧ୍ୟ ଉଚ୍ଚ ପଦବୀରେ ଥିବାରୁ ତଦନ୍ତ ପ୍ରଭାବିତ ହେବାର ଯଥେଷ୍ଟ ସମ୍ଭାବନା ଅଛି ।