ସୁଶୀଲ କୁମାରଙ୍କ ସମେତ ୧୮ ଜଣଙ୍କ ବଢ଼ିଲା ଅଡ଼ୁଆ, କୁସ୍ତିଯୋଦ୍ଧା ସାଗର ଧନକର ମୃତ୍ୟୁ ମାମଲାରେ ଚାର୍ଜ ଫ୍ରେମ୍‌

ସାଗର ଧନକର ମୃତ୍ୟୁ ମାମଲାରେ ଅଲମ୍ପିକ ପଦକ ବିଜେତା ସୁଶୀଲ କୁମାରଙ୍କ ଅଡ଼ୁଆ । ତାଙ୍କ ବିରୋଧରେ ଦାଖଲ ହୋଇଥିବା ଚାର୍ଜସିଟ ଅନୁଯାୟୀ ସମସ୍ତ ଦଫାରେ ଚାର୍ଜ ଫ୍ରେମ କରିଛନ୍ତି ଦିଲ୍ଲୀର ଏକ କୋର୍ଟ । ଅଧିକ ପଢ଼ନ୍ତୁ

ନୂଆଦିଲ୍ଲୀ:କୁସ୍ତିଯୋଦ୍ଧା ସାଗର ଧନକର ମୃତ୍ୟୁ ମାମଲା । ସାଗର ଧନକର ମୃତ୍ୟୁ ମାମଲାରେ ଅଲମ୍ପିକ ପଦକ ବିଜେତା ସୁଶୀଲ କୁମାରଙ୍କ ଅଡ଼ୁଆ । ତାଙ୍କ ବିରୋଧରେ ଦାଖଲ ହୋଇଥିବା ଚାର୍ଜସିଟ ଅନୁଯାୟୀ ସମସ୍ତ ଦଫାରେ ଚାର୍ଜ ଫ୍ରେମ କରିଛନ୍ତି ଦିଲ୍ଲୀର ଏକ କୋର୍ଟ । ତାଙ୍କ ସହ ଅନ୍ୟ ୧୭ ଜଣଙ୍କ ବିରୋଧରେ ମଧ୍ୟ କୋର୍ଟ ଲାଗିଥିବା ଦଫାରେ ଚାର୍ଜ ଫ୍ରେମ୍‌ କରିଛନ୍ତି । ଏହି ଘଟଣାରେ ଏବେ ବି ଦୁଇ ଅଭିଯୁକ୍ତ ଫେରାର ରହିଛନ୍ତି, ସେମାନଙ୍କ ବିରୋଧରେ ମଧ୍ୟ ରାୟ ଦେବେ ଦିଲ୍ଲୀର କୋର୍ଟ ।

2021ମସିହା ମେ ୪ ତାରିଖରେ ଦିଲ୍ଲୀର ଛତ୍ରଶାଳ ଷ୍ଟାଡିୟମରେ ଜୁନିୟର କୁସ୍ତି ଯୋଦ୍ଧା ସାଗର ଧନକରଙ୍କ ଉପରେ ସଂଘବଦ୍ଧ ଆକ୍ରମଣ ହୋଇଥିଲା । ପରବର୍ତ୍ତୀ ସମୟରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । ଏହି ମାମଲାରେ ସୁଶୀଲ କୁମାରଙ୍କ ସହ ଅନ୍ୟ ୧୭ ଜଣଙ୍କୁ ଗିରଫ କରିଥିଲା ପୋଲିସ । ଏମାନଙ୍କ ବିରୋଧରେ ପ୍ରାଣାନ୍ତକ ଆକ୍ରମଣ, ହିଂସାକାଣ୍ଡ ଘଟାଇବା, ବେଆଇନ ଭାବରେ ସଂଗଠିତ ହେବା ଓ ଅନ୍ୟାନ ଧାରରେ ଚାର୍ଜ୍‌ସିଟ୍‌ ପ୍ରସ୍ତୁତ କରିଥିଲା ପୋଲିସ । ବୁଧବାର ଚାର୍ଜସିଟ୍‌ ଅନୁଯାୟୀ ଚାର୍ଜ ଫ୍ରେମ୍‌ କରିଛନ୍ତି ଦିଲ୍ଲୀର ଏକ କୋର୍ଟ ।

ଏହି ମାମଲାର ଆଗାମୀ ଶୁଣାଣିରେ କୋର୍ଟରେ ସମସ୍ତ ପ୍ରମାଣ ସହ ତଦନ୍ତ ରିପୋର୍ଟ ଦାଖଲ କରିବ ପୋଲିସ । ତାସହିତ ସମସ୍ତ ସାକ୍ଷୀଙ୍କ ସାକ୍ଷ୍ୟ ଶୁଣିବେ କୋର୍ଟ । ଏହାପରେ ଦୋଷୀଙ୍କ ବିରୋଧରେ ଦଣ୍ଡ ବିଧାନ କରିବେ । 2021ମସିହା ମେ ୪ ତାରିଖରେ ଛତ୍ରଶାଳା ଷ୍ଟାଡିୟମରେ ଘଟିଥିବା ମାଡପିଟରେ କୁସ୍ତିଯୋଦ୍ଧା ସାଗର ଧନକରଙ୍କ ମୃତ୍ୟୁ ହୋଇଥିଲା । ଘଟଣାର 18ଦିନ ପରେ ଅଭିଯୁକ୍ତ ସୁଶୀଲ କୁମାର ଓ ତାଙ୍କ ସାଥୀଙ୍କୁ ଦିଲ୍ଲୀ ପୋଲିସ ଗିରଫ କରିବାରେ ସଫଳ ହୋଇଥିଲା ।

ଏହା ପୂର୍ବରୁ ସୁଶୀଲ କୁମାର ଗିରଫ ଭୟରେ ଦିଲ୍ଲୀର ରୋହୀଣି କୋର୍ଟରେ ଆଗୁଆ ଜାମିନ ଆବେଦନ କରିଥିଲେ । କିନ୍ତୁ କୋର୍ଟ ବୁଧବାର ତାଙ୍କ ଜାମିନ ଖାରଜ କରିଥିଲେ । ସୁଶୀଲଙ୍କୁ ଧରିବା ପାଇଁ 1 ଲକ୍ଷ ଟଙ୍କା ଓ ତାଙ୍କ ସାଥୀ ପାଇଁ 50 ହଜାର ଟଙ୍କାର ପୁରସ୍କାର ରାଶି ଘୋଷଣା କରିଥିଲା ଦିଲ୍ଲୀ ପୋଲିସ । ପୋଲିସର ଏକ ସ୍ବତନ୍ତ୍ର ଦଳ ଦିଲ୍ଲୀର ମୁଣ୍ଡକା ଅଞ୍ଚଳରୁ ରବିବାର ସୁଶୀଲଙ୍କୁ ଗିରଫ କରିବାରେ ସଫଳ ହୋଇଥିଲା ।