ନୂଆଦିଲ୍ଲୀ:ଏବେ ଇଣ୍ଡିଆ-ଭାରତ ନାମ ପରିବର୍ତ୍ତନ ପ୍ରସଙ୍ଗ ଜାତୀୟ ରାଜନୀତିକୁ ସରଗମର କରିବା ଆରମ୍ଭ କରିଛି । ଗତକାଲି ପର୍ଯ୍ୟନ୍ତ ଏକକ ନିର୍ବାଚନ ପ୍ରସଙ୍ଗରେ ଭାରତୀୟ ଜନତା ପାର୍ଟିକୁ ଟାର୍ଗେଟ କରିବା ଜାରି ରଖିଥିବା ବିରୋଧୀ ଦଳମାନେ ଏବେ ଦେଶର ନାମ ପରିବର୍ତ୍ତନ ସମ୍ଭାବିତ ଚର୍ଚ୍ଚାକୁ ନେଇ ପୁଣି ସରକାରକୁ ଘେରିବାରେ ଲାଗିଛନ୍ତି । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଏହି ପ୍ରସଙ୍ଗକୁ ସିଧା ବିରୋଧୀ ମେଣ୍ଟ ‘ଇଣ୍ଡିଆ’ର ନାମକରଣ ସହ ଯୋଡିଛନ୍ତି । ବିରୋଧୀ ମେଣ୍ଟର ନାମ ‘ଇଣ୍ଡିଆ’ ରଖାଯାଇଥିବାରୁ କେନ୍ଦ୍ର ଏପରି ବିଚାର ଆରମ୍ଭ କରିଥିବା ସେ ଅଭିଯୋଗ କରିଛନ୍ତି ।
ଆଜି ପ୍ରେସମିଟ କରି କେଜ୍ରିଓ୍ବାଲ କହିଛନ୍ତି, ‘ଇଣ୍ଡିଆ’ ମେଣ୍ଟ ଗଠନ ହେବା ପରେ ବିଜେପି ସରକାର ଭୟଭୀତ ହୋଇପଡିଛି । ଦେଶର ନାମ ପରିବର୍ତ୍ତନ ନେଇ କୌଣସି ବିଧିବଦ୍ଧ ସୂଚନା ଏପର୍ଯ୍ୟନ୍ତ ମିଳିନାହିଁ । ଅନେକ ପାର୍ଟି ମିଶି ବିଜେପି ବିରୋଧରେ ‘ଇଣ୍ଡିଆ’ ମେଣ୍ଟ ଗଠନ କରିଛନ୍ତି । ସେମାନଙ୍କ ଭୋଟ କମିଯିବ ବୋଲି ଭାବି ବିଜେପି ଭୟଭୀତ ହୋଇପଡିଛି । ଯଦି ବିରୋଧୀ ମେଣ୍ଟ ଇଣ୍ଡିଆ ନାମ ରଖିଲେ, ତେବେ ଆମେ ଦେଶର ନାମ ପରିବର୍ତ୍ତନ କରିଦେବୁ ବୋଲି ସେମାନେ ଭାବୁଛନ୍ତି । ଦେଶ 140 କୋଟି ନାଗରିକଙ୍କର, କୌଣସି ରାଜନୈତିକ ପାର୍ଟିର ନୁହେଁ ।
ଯଦି ବିରୋଧୀ ମେଣ୍ଟ ତାର ନାମ ପରିବର୍ତ୍ତନ କରି ଇଣ୍ଡିଆ ପରିବର୍ତ୍ତେ ‘ଭାରତ’ ସ୍ଥିର କରେ, ତେବେ ସେମାନେ କ’ଣ ଦେଶର ଭାରତର ନାମକୁ ପରିବର୍ତ୍ତନ କରିଦେବେ କି ବୋଲି ପ୍ରଶ୍ନ କରିଛନ୍ତି । ଯଦି ସେମାନେ ଏପରି କରନ୍ତି ତେବେ ଭାରତର ନାମ କ’ଣ ରଖିବେ । କ’ଣ ଏମତି କରି ସେମାନେ ଥଟ୍ଟା କରୁଛନ୍ତି । ଦେଶ ହଜାର ବର୍ଷ ପୁରଣା । ତାର ସଂସ୍କୃତି ମଧ୍ୟ ସେତିକି ପୁରୁଣା । ହେଲେ ଏବେ କେବଳ ବିରୋଧୀ ଦଳମାନେ ‘ଇଣ୍ଡିଆ’ ମେଣ୍ଟ ନାମ ରଖିଲେ ବୋଲି ଦେଶର ନାମ ଇଣ୍ଡିଆରୁ ବାଦ ଦେବାକୁ ଯୋଜନା ହେଉଛି । ଏହା ପୂର୍ବରୁ ଏକାଧିକ କଂଗ୍ରେସ ନେତା ମଧ୍ୟ ଏହି ପ୍ରସଙ୍ଗରେ ନିଜର ଆପତ୍ତି ଦର୍ଶାଇ ସାରିଲେଣି ।