ନୂଆଦିଲ୍ଲୀ:ଖୁବ୍ କମ୍ ସମୟରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ଙ୍କୁ ମଜାକ ମୁଡ୍ରେ ଦେଖିବାକୁ ମିଳେ । ତେବେ ଗୁରବାର ସେ ଦିଲ୍ଲୀ ରାଜ୍ୟପାଳଙ୍କ ସହ ମଜାକ୍ କରି ବିବାଦରେ ଛନ୍ଦି ହୋଇଯାଇଛନ୍ତି । ଟ୍ବିଟ୍ କରି କେଜ୍ରିୱାଲ ଲେଖିଥିଲେ, "LG ସାର୍ ମୋତେ ଯେତିକି ଗାଳି ଦେଉଛନ୍ତି, ସେତିକି ମୋର ପତ୍ନୀ ମଧ୍ୟ ମୋତେ ଗାଳି କରନ୍ତି ନାହିଁ ।" ଏଭଳି ବୟାନ ପରେ କେଜ୍ରିୱାଲ୍ଙ୍କୁ ବିଜେପି ନେତା ସମାଲୋଚନା କରିବାରେ ଲାଗିଛନ୍ତି ।
ଗତ କିଛି ଦିନ ହେଲା ଦିଲ୍ଲୀ ମଖ୍ୟମନ୍ତ୍ରୀ ଓ ଉପ ରାଜ୍ୟପାଳଙ୍କ ମଧ୍ୟରେ ଆରୋପ ପ୍ରତ୍ୟାରୋପ ଲାଗି ରହିଛି । ବର୍ତ୍ତମାନ ଟ୍ବିଟର ସାହାରା ନେଇ ମଜା ଆଳରେ ଦୁଃଖ ଜାହିର କରିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ସେ କହିଛନ୍ତି, "LG ସାର୍ ମୋତେ ଯେତିକି ଗାଳି ଦେଉଛନ୍ତି, ସେତିକି ମୋର ପତ୍ନୀ ମଧ୍ୟ ମୋତେ ଗାଳି କରନ୍ତି ନାହିଁ । ଗତ ୬ ମାସ ମଧ୍ୟରେ ଏତେ ପ୍ରେମ ପତ୍ର ଲେଖିଛନ୍ତି ଯେ, ଜୀବନରେ ମୋର ପତ୍ନୀ ଏତେ ଲେଟର କେବେ ଲେଖିନାହାନ୍ତି । LG ସାର୍ ଟିକେ ଚିଲ୍ କରନ୍ତୁ, ଆପଣଙ୍କ ସୁପର ବସ୍ଙ୍କୁ ମଧ୍ୟ କୁହନ୍ତୁ ସେ ମଧ୍ୟ ଚିଲ୍ କରିବେ ।"
ବିଗତ ଦିନରେ ଦିଲ୍ଲୀ ସରକାର ନେଇଥିବା ଅଧିକାଂଶ ଯୋଜନା ବା ଆଦେଶକୁ ନେଇ ଉପରାଜ୍ୟପାଳ ପ୍ରଶ୍ନ କରିଛନ୍ତି । ଏଭଳି କଣ୍ଟକିତ ପ୍ରଶ୍ନ ନେଇ ଚିନ୍ତାରେ ପଡିଛନ୍ତି ଅରବିନ୍ଦ କେଜ୍ରିୱାଲ । ମଦ ବିକ୍ରି ଲାଇସେନ୍ସ, ଡିଟିସି ବସ୍ ଘୋଟାଲା, ସ୍କୁଲ୍ ଗୃହ ନିର୍ମାଣ ଆଦିର ସିବିଆଇ ଯାଞ୍ଚ ପାଇଁ ସୁପାରିସ କରିଛନ୍ତି ଦିଲ୍ଲୀ ଉପରାଜ୍ୟପାଳ । ଉଭୟଙ୍କ ମଧ୍ୟରେ ବିବାଦ ଘନାଉଥବାରୁ, ଦୁହିଁଙ୍କ ମଧ୍ୟରେ ହେଉଥିବା ସାପ୍ତାହିକ ବୈଠକରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଛି । ଗତ ଦୁଇ ମାସ ମଧ୍ୟରେ ହୋଇଥିବା ବୈଠକରେ ଦୁହିଁଙ୍କ ମଧ୍ୟରେ କୌଣସି କଥାବାର୍ତ୍ତା ହୋଇନାହିଁ ।