ନୂଆଦିଲ୍ଲୀ: ବିଶ ବଳୟରେ ଦିଲ୍ଲୀ ଏନ୍ସିଆର୍ । ଜାତୀୟ ରାଜଧାନୀ ଦିଲ୍ଲୀରେ ସ୍ଥିତି ଦିନକୁ ଦିନ ସଙ୍ଗୀନ ହେବାରେ ଲାଗିଛି । ବାୟୁ ପ୍ରଦୂଷଣ ସଙ୍କଟ ସୃଷ୍ଟି କରିଛି । ଦିଲ୍ଲୀ ଏନସିଆରର ବାୟୁ ଲଗାତାର ବିଷାକ୍ତ ହୋଇ ଚାଲିଛି । ଅଣନିଶ୍ବାନୀ ହୋଇଛନ୍ତି ରାଜଧାନୀବାସୀ । କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ସୂଚନା ଅନୁସାରେ ଦିଲ୍ଲୀ ଏନସିଆରରେ ବାୟୁ ଗୁଣବତ୍ତା ସ୍ତର ଗମ୍ଭୀର ବିଭାଗରେ ରହିଛି । ଏୟାର କ୍ବାଲିଟି ଇଣ୍ଡେକ୍ସ ବା ବାୟୁ ଗୁଣବତ୍ତା ସୂଚକାଙ୍କ (ଏକ୍ୟୁଆଇ) 500 ରହିଛି । ବଢୁଥିବା ପ୍ରଦୂଷଣକୁ ଦୃଷ୍ଟିରେ ରଖି ଆସନ୍ତା 10 ତାରିଖ ଯାଏଁ ଦିଲ୍ଲୀରେ ସ୍କୁଲ ଛୁଟି ଘୋଷଣା ହୋଇଛି ।
ଉଦବେଗଜନକ ସ୍ଥିତିରେ ରହିଛି ଦିଲ୍ଲୀରେ ବାୟୁ ପ୍ରଦୂଷଣ ସ୍ଥିତି । ଧୂଆଁମୟ ହୋଇଛି ରାଜଧାନୀ । ଗୋଟିଏ ମିଟର ଦୂର ଯାଏଁ କିଛି ଦେଖା ଯାଉନାହିଁ । ପ୍ରଦୂଷଣର ଏକ ଆସ୍ତରଣ ଜମିଛି । ନିଶ୍ବାସ ପ୍ରଶ୍ବାସ ନେଇ ପାରୁ ନାହାନ୍ତି ରାଜଧାନୀବାସୀ । ଘରୁ ବାହାରିବା ଏକ ପ୍ରକାର ମସ୍କିଲ ହୋଇଛି । ଚର୍ମ, ଆଖି, ନାକରେ ଜ୍ବଳନ ହେଉଛି । ସ୍ଥିତିକୁ ନଜରରେ ରଖି ସ୍କୁଲ ବନ୍ଦ ରଖିବାକୁ ନିଷ୍ପତ୍ତି ନେଇଛନ୍ତି ସରକାର । ଆସନ୍ତା 10 ତାରିଖ ଯାଏଁ ଦିଲ୍ଲୀରେ ପ୍ରାଥମିକ ସ୍କୁଲ ବନ୍ଦ ରହିବ । ଷଷ୍ଠରୁ ଦ୍ବାଦଶ ଶ୍ରେଶୀ ଛାତ୍ରଛାତ୍ରୀଙ୍କ ପାଇଁ ବିକଳ୍ପ ବ୍ୟବସ୍ଥା ହୋଇଛି । ଅନଲାଇନ ପାଠପଢା ପାଇଁ ନେଇ ବିକଳ୍ପ ବ୍ୟବସ୍ଥା କରାଯାଇଛି । ପୂର୍ବରୁ ଶୁକ୍ରବାର ଓ ଶନିବାର ସ୍କୁଲ ବନ୍ଦ ଘୋଷଣା କରିଥିଲେ ସରକାର । ଆସନ୍ତା 10 ତାରିଖ ଯାଏଁ ପ୍ରାଥମିକ ସ୍କୁଲ୍ ଛୁଟି ନେଇ ଟ୍ବିଟ୍ କରି ସୂଚନା ଦେଇଛନ୍ତି ଦିଲ୍ଲୀ ଶିକ୍ଷା ମନ୍ତ୍ରୀ ଅତିଶି ।