ଲକ୍ଷ୍ନୌ: ଦୋଷୀ ସାବ୍ୟସ୍ତ ହୋଇ ଜେଲରେ ଥିବା ମାଫିଆ-ରାଜନେତା ମୁଖତାର ଅନସାରୀର ଅପରାଧିକ ସହଯୋଗୀ ଅମିତ ରୟକୁ ପୋଲିସ ଗିରଫ କରିଛି । ଶୁକ୍ରବାର ରାତିରେ ଗାଜିପୁର ଜିଲ୍ଲା ପୋଲିସ ଅନସାରୀର ସହଯୋଗୀ ତଥା ଜିଲ୍ଲା ପୋଲିସ ରେକର୍ଡରେ ମୋଷ୍ଟ ଓ୍ବାଣ୍ଟେଡ ତାଲିକାରେ ଥିବା ଅପରାଧୀ ଅମିତ ରାୟଙ୍କୁ ଗିରଫ କରିଛି । ଅମିତ ନାମରେ ଏକାଧିକ ସଙ୍ଗୀନ ଅପରାଧିକ ମାମଲା ରହିଛି ।
ସେ ଗତ କିଛି ମାସ ହେଲା ଫେରାର ରହି ଅପରାଧିକ କାର୍ଯ୍ୟକଳାପ ଜାରି ରଖିଥିଲା । ଗତକାଲି ରାତିରେ ତା' ସମ୍ପର୍କରେ ସୂଚନା ମିଳିବା ପରେ ସ୍ଥାନୀୟ କରିମୁଦ୍ଦିନପୁର ପୋଲିସ ତାକୁ ଗିରଫ କରି ଥାନାକୁ ଆଣିଥିଲା । ହେଲେ ତା'ର ଗିରଫ ଖବର ମିଳିବା ପରେ ଶତାଧିକ ପୁରୁଷ ଓ ମହିଳା ଥାନାରେ ପହଞ୍ଚି ପୋଲିସକୁ ଆକ୍ରମଣ କରି ତାକୁ ଛଡାଇ ନେବାକୁ ଉଦ୍ୟମ କରିଥିଲେ । ପୋଲିସ ମଧ୍ୟ ପାଲଟା କାର୍ଯ୍ୟାନୁଷ୍ଠାନରେ ଲାଠିଚାର୍ଜ କରିବା ପରେ ସମର୍ଥକଙ୍କ ଭିଡ ଛତ୍ରଭଙ୍ଗ ଦେଇଥିବା ସୂଚନା ମିଳିଛି ।
ସୂଚନା ଅନୁସାରେ, ଗତକାଲି ରାତିରେ କରିମୁଦ୍ଦିନପୁର ପୋଲିସ କୌଣସି ସୂତ୍ରରୁ ସୂଚନା ପାଇ ଅମିତ ରାୟକୁ ଗିରଫ କରିଥିଲା । ହେଲେ ଅଭିଯୁକ୍ତ ଅମିତର ବାପା ସ୍ଥାନୀୟ ଗ୍ରାମର ମୁଖିଆ ହୋଇଥିବାରୁ ଶତାଧିକ ପୁରୁଷ ମହିଳା ପୋଲିସ ବିରୋଧରେ ନାରାବାଜି କରିଥିଲେ । ସେମାନେ ଏକାଠି ହୋଇ ଥାନାକୁ ଘେରାଉ କରିବାକୁ ଉଦ୍ୟମ ମଧ୍ୟ କରିଥିଲେ । ଯାହାର ଭିଡିଓ ଭାଇରାଲ ହେବାରେ ଲାଗିଛି । ଫଳରେ ପୋଲିସ ମଧ୍ୟ ବଳ ପ୍ରୟୋଗ କରିବାକୁ ବାଧ୍ୟ ହୋଇଥିଲା ।