ପାଟନା: ମଦ ବ୍ଯାନ ଘୋଷିତ ରାଜ୍ୟ ବିହାରରେ ମଦ ମାଫିଆଙ୍କ ଆତଙ୍କରାଜ । ସେମାନଙ୍କ ଆତଙ୍କରୁ ବର୍ତ୍ତିନାହାନ୍ତି ପୋଲିସ କର୍ମୀ । ପୂର୍ବ ଚମ୍ପାରନ୍ ଜିଲ୍ଲାର ଝାରଖର ପୋଲିସ ଷ୍ଟେସନ ଅଞ୍ଚଳରେ ଜଣେ ପୋଲିସ ହୋମଗାର୍ଡଙ୍କୁ ଥାନାଠାରୁ ମାତ୍ର 5ଶହ ମିଟର ଦୂରରେ ପିଟି ପିଟି ହତ୍ଯା କରାଯାଇଛି । ଏହି ହୋମଗାର୍ଡ ଜଣଙ୍କ ଅବକାରୀ ବିଭାଗର ଟିମ ସଦସ୍ୟ ଭାବେ ଏକ ଗ୍ରାମରେ ଚୋରା ମଦଭାଟି ଉପରେ ଚଢାଉ ପାଇଁ ଯାଇଥିଲେ । ହେଲେ ଏହି ଗ୍ରାମରେ ବେଆଇନ ମଦ ପ୍ରସ୍ତୁତ କରୁଥିବା ମାଫିଆଙ୍କ ଏକ ଗୋଷ୍ଠୀ ଏହି ଅବକାରୀ ଟିମକୁ ଅତର୍କିତ ଆକ୍ରମଣ କରିଥିଲେ । ଏଥିରେ ଅନ୍ୟ ସଦସ୍ୟମାନେ ଅଳ୍ପକେ ପ୍ରାଣ ବଞ୍ଚାଇବାରେ ସଫଳ ହୋଇଥିବା ବେଳେ ଜଣେ ହୋମଗାର୍ଡଙ୍କୁ ପିଟି ପିଟି ହତ୍ୟା କରିଛନ୍ତି ମାଫିଆ ଗୋଷ୍ଠୀ ।
ସୂଚନା ଅନୁସାରେ, ମଦଭାଟି ଉପରେ ଚଢାଉ ପାଇଁ ଯାଇଥିବା ଅଧିକାରୀଙ୍କ ଟିମ୍ରେ ଦୁଇଜଣ ASI ପାହ୍ୟାର ଅଧିକାରୀ ଏବଂ 6ଜଣ ହୋମଗାର୍ଡ କର୍ମଚାରୀ ଥିଲେ । ଉକ୍ତ ଅଞ୍ଚଳରେ ଜଣେ ବ୍ୟକ୍ତିଙ୍କ ନିକଟରୁ ମଦ ଜବତ କରିବା ପରେ ତାଙ୍କୁ ଗିରଫ କରି ଥାନାକୁ ଆଣୁଥିଲା ଏହି ଟିମ । ଏହି ଖବର ମିଲିବା ପରେ ଗୋଷ୍ଠୀର ଅନ୍ୟ ସଦସ୍ୟମାନେ ଏହି ଟିମ ଉପରେ ଅତର୍କିତ ଅକ୍ରମଣ କରିଥିଲେ ।
ଏଥିରେ ଅନ୍ୟ ସଦସ୍ୟମାନେ ଧାଇଁ ପଳାଇ ପ୍ରାଣ ବଞ୍ଚାଇଥିବା ବେଳେ 55 ବର୍ଷୀୟ ହୋମଗାର୍ଡ ହୃଦୟ ନାରାୟଣ ରାୟ ମାଫିଆଙ୍କ ଗୋଷ୍ଠୀ ଦ୍ବାରା ସଂଘବଦ୍ଧ ଆକ୍ରମଣର ଶିକାର ହୋଇଥିଲା । ନିସ୍ତୁକ ପିଟିବା ପରେ ତାଙ୍କୁ ରାସ୍ତାରେ ଫିଙ୍ଗିଦେଇ ମାଫିଆ ଗୋଷ୍ଠୀ ଫେରାର ହୋଇଯାଇଥିଲେ । ତାଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଥିଲେ ସୁଦ୍ଧା ତାଙ୍କର ମୃତ୍ୟୁ ହୋଇସାରିଥିବା ଡାକ୍ତର ଘୋଷଣା କରିଥିଲେ ।