Covid Scare: ଦେଶରେ ୨୪ ଘଣ୍ଟାରେ ୩୭ ହଜାର ନୂଆ ଆକ୍ରାନ୍ତ, ୨ହଜାର ମୁହାଁ ଓମିକ୍ରନ

ଦେଶରେ ପୁଣି ଚିନ୍ତା ବଢାଉଛି କୋରୋନା । ନୂଆ ଭ୍ୟାରିଏଣ୍ଟ ସହ ବଢୁଛି ସଂକ୍ରମଣ । ଗତ ୨୪ ଘଣ୍ଟାରେ ୩୭ ହଜାର ନୂଆ ଆକ୍ରାନ୍ତ ଚିହ୍ନଟ ନେଇ ସୂଚନା ଦେଲା ସ୍ବାସ୍ଥ୍ଯ ମନ୍ତ୍ରଣାଳୟ । ଅଧିକାଂଶ ରାଜ୍ୟରେ ଜାରି ହେବାରେ ଲାଗିଛି କଟକଣା । ଅଧିକ ପଢନ୍ତୁ

ନୂଆଦିଲ୍ଲୀ:ଦେଶରେ ପୁଣିଥରେ କୋଭିଡ ସଂକ୍ରମଣ ବିସ୍ଫୋରକ ସ୍ଥିତି ଆଡକୁ ମୁହାଁଇଲାଣି ।ଗତ 24 ଘଣ୍ଟା ମଧ୍ୟରେ ଦେଶରେ 37,379 ନୂତନ ସଂକ୍ରମଣ ରିପୋର୍ଟ ହୋଇଥିବାବେଳେ ନୂଆ ପ୍ରଜାତି ଓମିକ୍ରନ ସଂକ୍ରମଣ ମଧ୍ୟ ୨ ହଜାରର ନିକଟବର୍ତ୍ତୀ ହେବାକୁ ବସିଲାଣି । ତେବେ କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ପ୍ରଦତ୍ତ ତଥ୍ୟ ଅନୁସାରେ, ଦେଶର ମୋଟ କୋଭିଡ ମାମଲା 3,48,08,886କୁ ବୃଦ୍ଧି ପାଇଛି । ଏପରି ସ୍ଥିତି ପୁଣି ଚିନ୍ତାଜନକ ହେବାରେ ଲାଗିଲାଣି ।

Covid scare: ଦେଶରେ ୨୪ ଘଣ୍ଟାରେ ୩୭ ହଜାର ନୂଆ ଆକ୍ରାନ୍ତ, ୨ହଜାର ମୁହାଁ ଓମିକ୍ରନ

ସରକାରୀ ସୂଚନା ଅନୁସାରେ, ଗତ 24 ଘଣ୍ଟା ମଧ୍ୟରେ ଦେଶରେ ଓମିକ୍ରନ ସଂକ୍ରମଣର 192ଟି ମାମଲା ଚିହ୍ନଟ ହେବା ସହ ମୋଟ ଓମିକ୍ରନ ଆକ୍ରାନ୍ତ ସଂଖ୍ୟା 1892କୁ ବୃଦ୍ଧି ପାଇଛି । ମୋଟ ନୂଆ ଭ୍ଯାରିଏଣ୍ଟ ଆକ୍ରାନ୍ତଙ୍କ ମଧ୍ୟରୁ 766 ଜଣ ସୁସ୍ଥ ହୋଇ ସାରିଥିବା ବେଳେ ଅବଶିଷ୍ଟ ଆକ୍ରାନ୍ତ ଚିକିତ୍ସିତ ହେଉଛନ୍ତି । ରାଜ୍ଯଓ୍ବାରୀ ତଥ୍ୟ ଆଧାରରେ ମହାରାଷ୍ଟ୍ରରେ ସର୍ବାଧିକ 568 ଓମିକ୍ରନ୍ ମାମଲା ରହିଥିବା ବେଳେ ଦ୍ବିତୀୟ ସ୍ଥାନରେ 382 ଆକ୍ରାନ୍ତଙ୍କ ସହ ଦିଲ୍ଲୀ ରହିଛି । ସେହିପରି କ୍ରମାନ୍ବୟ ଭାବେ କେରଳରେ 185 ରାଜସ୍ଥାନରେ 174, ଗୁଜୁରାଟରେ 152 ଏବଂ ତାମିଲନାଡୁରେ 121 ନୂଆ ଭ୍ୟାରିଏଣ୍ଚ ମାମଲା ସାମ୍ନାକୁ ଆସିଛି ।

ସେହିପରି ଦେଶରେ ସକ୍ରିୟ କୋଭିଡ ସଂକ୍ରମଣ 1,71,830ରେ ଅଛି, ଯାହା ଦେଶର ମୋଟ ମାମଲାର 1 ପ୍ରତିଶତ ଅଟେ । ସାପ୍ତାହିକ ସଂକ୍ରମଣ ହାର 2.05 ପ୍ରତିଶତରେ ଥିବାବେଳେ ଦୈନିକ ସଂକ୍ରମଣ 3.24 ପ୍ରତିଶତରେ ରହିଛି । ଗତ 24 ଘଣ୍ଟା ମଧ୍ୟରେ 11,007 ଆକ୍ରାନ୍ତ ସୁସ୍ଥ ହୋଇଛନ୍ତି । ଏହି ସଂଖ୍ୟାକୁ ମିଶାଇ ମୋଟ ସୁସ୍ଥ ସଂଖ୍ୟା 3,43,06,414 କୁ ବୃଦ୍ଧି ପାଇଛି । ସେହିପରି ବର୍ତ୍ତମାନର ମୋଟ ସୁସ୍ଥ ହାର 98.13 ପ୍ରତିଶତରେ ଅଛି । ଗତ 24 ଘଣ୍ଟା ମଧ୍ୟରେ ଦେଶରେ 124ଟି ନୂତନ କୋଭିଡ ମୃତ୍ୟୁ ସହ ମୋଟ ମୃତ୍ୟୁ ସଂଖ୍ୟା 4,82,017 ରେ ପହଞ୍ଚିଥିବା ସ୍ବାସ୍ଥ୍ୟ ମନ୍ତ୍ରଣାଳୟ କହିଛି ।

ବ୍ୟୁରୋ ରିପୋର୍ଟ, ଇଟିଭି ଭାରତ