ନୂଆଦିଲ୍ଲୀ: ଦେଶର ଉତ୍ତର ଓ ମଧ୍ୟ ଭାଗରେ ତୃତୀୟ ପର୍ଯ୍ୟାୟ କୋରୋନା ସଂକ୍ରମଣ ଆରମ୍ଭ ହୋଇଛି । ଫଳରେ ଏବେ ଆକ୍ରାନ୍ତଙ୍କ ସଂଖ୍ୟାରେ ବୃଦ୍ଧି ପାଇବାରେ ଲାଗିଛି । ରାଜସ୍ଥାନ ଓ ମଧ୍ୟପ୍ରଦେଶ ଓ ଗୁଜୁରାଟରେ ସ୍ଥିତି ଖରାପ ହେବାରୁ ରାତ୍ରୀକାଳୀନ କର୍ଫ୍ୟୁ ଲାଗୁ କରାଯାଇଛି । ଏପଟେ ଦିଲ୍ଲୀ ଓ ମହାରାଷ୍ଟ୍ରରେ ସଙ୍ଗୀନ ହେଉଛି ସଂକ୍ରମଣ । ଦେଶରେ କିଛି ଦିନର ବ୍ୟବଧାନରେ ପୁଣି ଗୋଟିଏ ଦିନରେ 45 ହଜାରରୁ ଉପରେ କୋରୋନା ସଂକ୍ରମଣ ରେକର୍ଡ ହୋଇଛି । ବର୍ତ୍ତମାନ ସମୟରେ ମହାରାଷ୍ଟ୍ରରେ ସର୍ବାଧିକ ସଂକ୍ରମଣ ଚିହ୍ନଟ ହେଉଥିବାବେଳେ, ଦିଲ୍ଲୀରେ ସର୍ବାଧିକ ମୃତ୍ୟୁ ସଂଖ୍ୟା ସାମ୍ନାକୁ ଆସୁଛି ଯାହା ଏବେ ଚିନ୍ତାର କାରଣ ପାଲଟିଛି ।
କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟର ସୂଚନା ମୁତାବକ, ଗତ 24 ଘଣ୍ଟାରେ 45 ହଜାର 209 ଟି ପଜିଟିଭ ରିପୋର୍ଟ ହୋଇଥିବାବେଳେ, ଏଥିରେ 501 ଜଣଙ୍କର ମୃତ୍ୟୁ ହୋଇଛି । ଯାହାକୁ ମିଶାଇ ଦେଶରେ ମୋଟ ସଂକ୍ରମଣ ସଂଖ୍ୟା 90 ଲକ୍ଷ 95 ହଜାର 807ରେ ପହଞ୍ଚିଛି । ସେଥିମଧ୍ୟରୁ ମୋଟ 1 ଲକ୍ଷ 33 ହଜାର 227 ଜଣ ଆକ୍ରାନ୍ତଙ୍କର ମୃତ୍ୟୁ ହୋଇଛି ।