ସକାଳୁ ରାହୁଲ ଗାନ୍ଧୀଙ୍କ ଘରେ ପହଞ୍ଚିଲା ଦିଲ୍ଲୀ ପୋଲିସ

ଗଣଦୁଷ୍କର୍ମ ପୀଡିତାଙ୍କ ସଂକ୍ରାନ୍ତରେ ଜାଣିବା ପାଇଁ ରାହୁଲ ଗାନ୍ଧୀଙ୍କ ବାସଭବନରେ ପହଞ୍ଚିଲା ଦିଲ୍ଲୀ ପୋଲିସ । ଅଧିକ ପଢନ୍ତୁ

ନୂଆଦିଲ୍ଲୀ:ଆଜି ସକାଳୁ ଦିଲ୍ଲୀ ପୋଲିସ କଂଗ୍ରେସ ନେତା ରାହୁଲ ଗାନ୍ଧୀଙ୍କ ବାସଭବନରେ ପହଞ୍ଚିଛି । ଭାରତ ଯୋଡ ଯାତ୍ରା ସମୟରେ କଂଗ୍ରେସ ନେତା ଭେଟିଥିବା ଗଣଦୁଷ୍କର୍ମ ପୀଡିତାଙ୍କ ସଂକ୍ରାନ୍ତରେ ଅଧିକ ଜାଣିବା ପାଇଁ ପୋଲିସ ତାଙ୍କ ଘରକୁ ଯାଇଛି । ଏହି ପରିପ୍ରେକ୍ଷୀରେ ପୂର୍ବରୁ ପୋଲିସ ରାହୁଲଙ୍କୁ ନୋଟିସ ମଧ୍ୟ ପଠାଇଥିଲା । ସେ ପୀଡିତାଙ୍କ ସମ୍ପର୍କରେ ତଥ୍ୟ ରଖନ୍ତୁ ବୋଲି କୁହାଯାଇଥିଲା । ଯଦ୍ବାରା ପୋଲିସ ସମ୍ପୃକ୍ତ ଦୁଷ୍କର୍ମ ପୀଡିତାଙ୍କ ସମ୍ପର୍କରେ ଜାଣି ଅପରାଧୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେଇପାରିବେ ।

ସେଥିପାଇଁ ଆଜି ସକାଳୁ ଦିଲ୍ଲୀର ସ୍ପେଶାଲ ପୋଲିସ କମିଶନର (Law and Order) ସାଗର ପ୍ରୀତ ହୁଡା କିଛି ପୋଲିସ କର୍ମୀଙ୍କ ସହ ୱାୟନାଡ ସାଂସଦ ରାହୁଲଙ୍କ ବାସଭବନରେ ପହଞ୍ଚିଥିଲେ । ରାହୁଲ ନିଜ ବୟାନରେ କହିଥିବା ଦୁଷ୍କର୍ମ ପୀଡିତାଙ୍କ ସମ୍ପର୍କରେ ଜାଣିବାକୁ ସେ ତାଙ୍କ ସହ ଆଲୋଚନା ପାଇଁ ଯାଇଥିଲେ । ଏନେଇ ଗଣମାଧ୍ୟମ ଆଗରେ ସ୍ପେଶାଲ ସିପି ହୁଡା କହିଛନ୍ତି, ''ଆମେ ରାହୁଲ ଗାନ୍ଧୀଙ୍କ ସହ କଥା ହେବାକୁ ଏଠାକୁ ଆସିଛୁ । ଜାନୁୟାରୀ ୩୦ ତାରିଖ ଦିନ ଭାରତ ଯୋଡ ଯାତ୍ରା ସମୟରେ ଗଣଦୁଷ୍କର୍ମ ପୀଡିତାଙ୍କ ସମ୍ପର୍କରେ ସେ ଯେଉଁ କଥା କହିଥିଲେ ସେହି ବିଷୟରେ ତାଙ୍କଠାରୁ ଅଧିକ ଜାଣିବା ପାଇଁ ଚାହୁଁଛୁ । ଯାହାଦ୍ବାରା ଅଭିଯୁକ୍ତଙ୍କ ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ନେଇ ପୀଡିତାଙ୍କୁ ନ୍ୟାୟ ଦିଆଯାଇପାରିବ ।''

ପ୍ରକାଶଥାଉ କି, କଂଗ୍ରେସ ନେତା ରାହୁଲ ଗାନ୍ଧୀ ଏକ ସାଧାରଣ ସଭାକୁ ସମ୍ବୋଧିତ କରି କହିଥିଲେ ଯେ, ଦେଶରେ ମହିଳାମାନେ ଏବେ ବି ଯୌନ ନିର୍ଯାତନାର ଶିକାର ହେଉଛନ୍ତି । ଭାରତ ଯୋଡ ଯାତ୍ରା ସମୟରେ ସେ ଦୁଇ ଜଣ ଗଣଦୁଷ୍କର୍ମ ପୀଡିତାଙ୍କୁ ଭେଟିଥିଲେ ଯେଉଁମାନେ ଥାନାରେ ଅଭିଯୋଗ କରିବାକୁ ମନା କରିଥିଲେ । କିଛି ଦିନ ତଳେ ନିଜ ଲଣ୍ଡନ ଯାତ୍ରାକୁ ନେଇ ମଧ୍ୟ ରାହୁଲ ବେଶ୍ ବିବାଦରେ ରହିଛନ୍ତି । ଲଣ୍ଡନରେ ଗଣତନ୍ତ୍ର ବିପଦରେ ଥିବା କହି ସେ ଶାସକ ଦଳ ନେତାଙ୍କ ସମାଲୋଚନାର ସରବ୍ୟ ପାଲଟିଛନ୍ତି । ଗଣତନ୍ତ୍ରକୁ ଅପମାନ କରିବା ରାହୁଲଙ୍କ ଅଭ୍ୟାସ ବୋଲି ବିଜେପି କହୁଥିବାବେଳେ ଏହାକୁ ନେଇ ସଂସଦରେ ମଧ୍ୟ ଝଡ ଉଠିଛି ।

ଏହାମଧ୍ୟ ପଢନ୍ତୁ: ପ୍ରେମିକ ସହ ମିଶି ଭାଇକୁ କାଟି ଫିଙ୍ଗିଦେଲା ଭଉଣୀ, ୮ ବର୍ଷ ପରେ ଦୁଇ ହତ୍ୟାକାରୀ ଗିରଫ

ବ୍ୟୁରୋ ରିପୋର୍ଟ, ଇଟିଭି ଭାରତ