ରାୟପୁର:ରାମ ମନ୍ଦିର ପ୍ରତିଷ୍ଠା ଉତ୍ସବ ପ୍ରସଙ୍ଗରେ ମହାରାଷ୍ଟ୍ର ଚର୍ଚ୍ଚିତ ତଥା ବିବାଦୀୟ ସନ୍ଥ କାଳିଚରଣ ପୁଣି ଏକ ଚରମ ବିବାଦୀୟ ବୟାନ ଦେଇଛନ୍ତି । ସେ ରାମ ମନ୍ଦିର ପ୍ରତିଷ୍ଠା ଉତ୍ସବକୁ ବର୍ଜନ କରିବା ପ୍ରସଙ୍ଗରେ କଂଗ୍ରେସକୁ ଟାର୍ଗେଟ କରିଛନ୍ତି । ଏପରିକି ସେ କଂଗ୍ରେସକୁ ଭୂତ, ପିସାଚ ଓ ରାକ୍ଷସଙ୍କ ସହ ତୂଳନା କରିଛନ୍ତି । ଭୂତ-ପ୍ରେତ ମନ୍ଦିରରେ ପ୍ରବେଶ କରିପାରନ୍ତି ନାହିଁ । ତେଣୁ କଂଗ୍ରେସ ମଧ୍ୟ ପ୍ରତିଷ୍ଠା ଉତ୍ସବରେ ସାମିଲ ହୋଇପାରିବ ନାହିଁ ବୋଲି କାଳିଚରଣ କହିଛନ୍ତି । ଏହା ବ୍ୟତୀତ ସେ ପୁଣି ମହାତ୍ମା ଗାନ୍ଧୀଙ୍କ ହତ୍ୟାକାରୀ ନାଥୁରାମ ଗଡସେଙ୍କ ସମର୍ଥନରେ ବୟାନ ଦେଇଛନ୍ତି ।
ଆଜି ରାୟପୁରରେ ଏକ ପ୍ରେସବାର୍ତ୍ତା ବେଳେ ଏହି ପ୍ରସଙ୍ଗରେ କାଳିଚରଣଙ୍କର ଏପରି ମନ୍ତବ୍ୟ ସାମ୍ନାକୁ ଆସିଛି । ସେ ଗାନ୍ଧୀ ହତ୍ୟାକାରୀ ନାଥୁରାମ ଗଡେସଙ୍କୁ ପ୍ରଣାମ ବୋଲି କହିବା ସହ ନାଥୁରାମ ଦେଶ ବଞ୍ଚାଇ ଦେଇଥିବା ମଧ୍ୟ କହିଛନ୍ତି । ଅଯୋଧ୍ୟା ପରେ ଏବେ କାଶୀ, ମଥୁରା ଓ ଦେଶର 5 ଲକ୍ଷ ମନ୍ଦିର ବାକି ଅଛି ବୋଲି ସେ କହିଥିଲେ । ସେହିପରି ସେ ଶଙ୍କରାଚାର୍ଯ୍ୟଙ୍କ ନାମ ନନେଇ ପରୋକ୍ଷରେ ଏହି ପ୍ରସଙ୍ଗରେ କଡା ସମାଲୋଚନା କରିଛନ୍ତି । ସମସ୍ତ ସାଧୁସନ୍ଥ ଅହଂକାର ପରିତ୍ୟାଗ କରି କାର୍ଯ୍ୟକ୍ରମରେ ସାମିଲ ହେବା ପାଇଁ ମଧ୍ୟ କହିଛନ୍ତି । ଯିଏ ରାମ ମନ୍ଦିର ସପକ୍ଷରେ ରହିଛି ସେ ହିଁ ସନାତନୀ ଓ ଯେଉଁମାନେ ବିଘ୍ନ ସୃଷ୍ଟି କାରିବାକୁ ପ୍ରୟାସ କରୁଛନ୍ତି, ସେମାନେ ଅସନାତନୀ ବୋଲି କାଳିଚରଣ କହିଛନ୍ତି ।
ରାମ ମନ୍ଦିର ପ୍ରସଙ୍ଗରେ ସେ କଂଗ୍ରେସ ଶାସନ ଉପରେ ଟାର୍ଗେଟ କରିଛନ୍ତି । ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ସରକାର ଯଦି ସେତେବେଳେ ରାମ ମନ୍ଦିର ନିର୍ମାଣ କରିବାକୁ ଚାହୁଁଥିଲା, ତେବେ ନ୍ୟାୟପାଳିକା ଉପରେ କାହିଁକି ଚାପ ସୃଷ୍ଟି କରି ମନ୍ଦିର ନିର୍ମାଣ ନିଶ୍ଚିତ କଲେ ନାହିଁ ବୋଲି କାଳିଚରଣ କହିଛନ୍ତି । ସେହିପରି ସେ ପ୍ରଧାନମନନ୍ତ୍ରୀ ମୋଦିଙ୍କୁ ନାମ ନନେଇ ପରୋକ୍ଷରେ ଜଣେ ଉତ୍ତମ ରାଜା ବୋଲି କହିଛନ୍ତି, ଯେଉଁ ରାଜା ହିନ୍ଦୁ ମନ୍ଦିର ନିର୍ମାଣ କରୁଛନ୍ତି, ସମସ୍ତେ ତାଙ୍କୁ ସହଯୋଗ କରିବା ଆବଶ୍ୟକ ବୋଲି କାଳିଚରଣ କହିଛନ୍ତି ।