ନୂଆଦିଲ୍ଲୀ:ଅକ୍ଟୋବର 17ରେ ହେବ କଂଗ୍ରେସ ଅଧ୍ୟକ୍ଷ ପଦ ପାଇଁ ନିର୍ବାଚନ । ଏଥିପାଇଁ ମତଦାନ କରିବା ପାଇଁ ଭୋଟର ତାଲିକା ମଧ୍ୟ ପ୍ରସ୍ତୁତ କରିଛି ଦଳର କେନ୍ଦ୍ରୀୟ ନିର୍ବାଚନ ପ୍ରାଧିକରଣ (Congress President Election 2022)। ପିସିସି କାର୍ଯ୍ୟକର୍ତ୍ତାଙ୍କ ପଞ୍ଜୀକରଣ ଆଧାରରେ ପ୍ରଦେଶୱାରି ଭୋଟର ତାଲିକା ମଧ୍ୟ ପ୍ରସ୍ତୁତ ସରିଛି । ପ୍ରାଧିକରଣ ଅଧ୍ୟକ୍ଷ ମଧୂସୁଧନ ମିସ୍ତ୍ରୀ ସୂଚନା ଦେଇଛନ୍ତି ଏଥିପାଇଁ 9 ହଜାର ମତଦାତାଙ୍କ ତାଲିକା ପ୍ରସ୍ତୁତ ମଧ୍ୟ ଶେଷ ହୋଇଛି ।
ଦଳର ବର୍ତ୍ତମାନର ଅଧ୍ୟକ୍ଷା ସୋନିଆ ଗାନ୍ଧୀ ଓ ପୁଅ ତଥା ସାଂସଦ ରାହୁଲ ଗାନ୍ଧୀ ଉତ୍ତର ପ୍ରଦେଶରୁ ଭୋଟର ଭାବେ ପଞ୍ଜୀକୃତ ହୋଇଛନ୍ତି । ସେହିପରି ଦଳର ବରିଷ୍ଠ ନେତା ତଥା ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ ଓ ଦଳର ମହାସଚିବ ପ୍ରିୟଙ୍କା ଗାନ୍ଧୀ ଦିଲ୍ଲୀ ପିିସିସିରୁ ଭୋଟର ତାଲିକାରେ ସାମିଲ ହୋଇଛନ୍ତି । ସମସ୍ତ ପ୍ରଦେଶ କଂଗ୍ରେସ ଓ କେନ୍ଦ୍ର ଶାସିତ ଅଞ୍ଚଳରେ ସାଙ୍ଗଠନିକ କର୍ମକର୍ତ୍ତାଙ୍କୁ ମିଶାଇ ମୋଟ 9 ହଜାର ଦଳୀୟ କାର୍ଯ୍ୟକର୍ତ୍ତା ଏହି ଭୋଟିଂରେ ଅଂଶଗ୍ରହଣ କରିବା ପାଇଁ ଯାଉଛନ୍ତି ।