ହ୍ରାଇଦ୍ରାବାଦ: ତେଲେଙ୍ଗାନା ବିଧାନସଭା ନିର୍ବାଚନ ଟ୍ରେଣ୍ଡକୁ ନେଇ ଆକ୍ଟିଭ ମୋଡରେ କଂଗ୍ରେସ ହାଇକମାଣ୍ଡ । ତେଲେଙ୍ଗାନା ଷ୍ଟ୍ରାଟେଜି ପଡ଼ୋଶୀ ଓଡ଼ିଶାରେ ପ୍ରୟୋଗ କରିବାକୁ ବିଚାର କରୁଛି ଗ୍ରାଣ୍ଡ ଓଲ୍ଡ ପାର୍ଟି। ଓଡ଼ିଶାରେ ତୃତୀୟ ସ୍ଥାନରେ ରହିଛି କଂଗ୍ରେସ । ଦଳକୁ ତୃଣମୂଳ ସ୍ତରରୁ ମଜଭୁତ କରିବାକୁ ବଡ଼ ଯୋଜନା କରୁଛନ୍ତି କେନ୍ଦ୍ରୀୟ ନେତୃତ୍ବ । ମିଳିଥିବା ସୂଚନା ଅନୁସାରେ ପଶ୍ଚିମ ଓଡ଼ିଶାରୁ ପ୍ରଚାର ଅଭିଯାନ ଆରମ୍ଭ କରିବ ଦଳ । ଚଳିତ ମାସ ଓଡ଼ିଶା ଆସିବେ କଂଗ୍ରେସ ଯୁବରାଜ ରାହୁଲ ଗାନ୍ଧି, ଭଉଣୀ ପ୍ରିୟଙ୍କା ଗାନ୍ଧି ଭଦ୍ରା ଏବଂ କଂଗ୍ରେସ ହାଇକମାଣ୍ଡ ମଲିକାର୍ଜୁନ ଖଡ଼ଗେ । ଏହି ସୂଚନା ଦେଇଛନ୍ତି ଓଡ଼ିଶା କଂଗ୍ରେସ ପ୍ରଭାରୀ ଚେଲ୍ଲା କୁମାର ।
ଚେଲ୍ଲା କୁମାର ସୂଚନା ଦେଇଛନ୍ତି ଯେ, ତେଲେଙ୍ଗାନାରେ କଂଗ୍ରେସ ପାଇଁ ପ୍ରଚାର ମୈଦାନକୁ ଓହ୍ଲାଇଥିଲେ ରାହୁଲ, ପ୍ରିୟଙ୍କା ଏବଂ ଖଡ଼ଗେ । ସେମାନଙ୍କ କ୍ୟାମ୍ପେନ ପ୍ରଭାବରେ ତେଲେଙ୍ଗାନାରେ ଦଳ ଭଲ ପ୍ରଦର୍ଶନ ସହ କ୍ଷମତାକୁ ଫେରିବାର ଯଥେଷ୍ଟ ସମ୍ଭାବନା ରହିଛି। ଯଦି କଂଗ୍ରେସ ପାର୍ଟି ତେଲେଙ୍ଗାନାରେ କ୍ଷମତାକୁ ଫେରେ, ଏହାର ସୁଦୂରପ୍ରସାରୀ ପ୍ରଭାବ ପଡ଼ୋଶୀ ଓଡ଼ିଶା ସମେତ ବିଭିନ୍ନ ରାଜ୍ୟରେ ପଡ଼ିବ । ଓଡ଼ିଶାରେ କଂଗ୍ରେସ ସଂଠନ ସଶକ୍ତ ହେବା ସହ ଶକ୍ତିଶାଳୀ ହେବ । ଆମେ ଅଧିକ ପରିଶ୍ରମ ଏବଂ ଆକ୍ରମଣାତ୍ମକ ଅଭିଯାନ ଆରମ୍ଭ କରିପାରିଲେ, ଓଡ଼ିଶାରେ କଂଗ୍ରେସ ଭବିଷ୍ୟତ ନିଶ୍ଚିତ ଭାବେ ଉଜ୍ଜ୍ବଳ ହେବ।
ଚେଲ୍ଲା କୁମାରଙ୍କ ସୂଚନା ଅନୁସାରେ, ଚଳିତ ଡିସେମ୍ବରରେ ପଶ୍ଚିମ ଓଡ଼ିଶାରେ କଂଗ୍ରେସ ପାର୍ଟି ମେଗା ର୍ୟାଲି ଏବଂ ଜନସଭା କରିବ । ରାହୁଲ ଗାନ୍ଧି ଏହି ର୍ୟାଲିକୁ ସମ୍ବୋଧିତ କରିବେ । ରାହୁଲଙ୍କ ଜନସଭା କୋରାପୁଟ କିମ୍ବା ପାଖାପାଖି ଅଞ୍ଚଳରେ ଆୟୋଜନ କରାଯିବ । ସେହିପରି କଂଗ୍ରେସ ହାଇକମାଣ୍ଡ ମଲିକାର୍ଜୁନ ଖଡ଼ଗେ ଏବଂ ପ୍ରିୟଙ୍କା ଗାନ୍ଧି ଭଦ୍ରା ପୃଥକ ର୍ୟାଲି କରିବା ପାଇଁ ସେମାନଙ୍କୁ ଅନୁରୋଧ କରାଯାଇଛି । ଚଳିତ ମାସରେ କଂଗ୍ରେସର ଏହି ତିନି ଜଣ ଷ୍ଟାର୍ ପ୍ରଚାରକ ଓଡ଼ିଶା ଆସିବାର କାର୍ଯ୍ୟକ୍ରମ ରହିଛି। ଆଉ ଏହା ଓଡ଼ିଶାରେ କଂଗ୍ରେସ ପାର୍ଟି ପକ୍ଷରୁ ବଡ଼ ଶୁଭାରମ୍ଭ ହେବ ବୋଲି ଚେଲ୍ଲା କୁମାର କହିଛନ୍ତି ।