ରାୟପୁର:ନିର୍ବାଚନ ପୂର୍ବରୁ ଛତିଶଗଡରେ ଭାଇରାଲ ହେଉଛି ଟଙ୍କା ବଣ୍ଡଲ ସହ ଜଣେ କଂଗ୍ରେସ ବିଧାୟକଙ୍କ ଭିଡିଓ । ଯାହାକୁ ନେଇ ବିରୋଧୀ ବିଜେପି ବ୍ୟାପକ ଦୁର୍ନୀତି ଓ ନିର୍ବାଚନୀ ଟଙ୍କା ବଣ୍ଟା ବୋଲି ଅଭିଯୋଗ କରି CBI ତଦନ୍ତ ପାଇଁ ଦାବି କରିଛି । ଭିଡିଓରେ କଂଗ୍ରେସର ଜଣେ ବିଧାୟକ ନିକଟରେ ଟଙ୍କା ବିଡା ରଖାଯାଇଥିବା ଓ ସେ କିଛି ଲୋକଙ୍କ ସହ କଥା ହେଉଥିବା ଦେଖିବାକୁ ମିଳିଛି । ଯାହାକୁ ନେଇ ରାଜ୍ୟରେ ଶାସନରେ ଥିବା କଂଗ୍ରେସ ସରକାର ଉପରେ ପ୍ରଶ୍ନ ଉଠିଛି ।
ଭାଇରାଲ ହେଉଥିବା ଭିଡିଓକୁ ବିଜେପି ନେତା ଓ.ପି ଚୌଧୁରୀ ତାଙ୍କ ଏକ୍ସ ଆକାଉଣ୍ଟରେ ପୋଷ୍ଟ କରିବା ସହ କଂଗ୍ରେସ ଉପରେ ଭ୍ରଷ୍ଟାଚାରର ଅଭିଯୋଗ ଆଣିଛନ୍ତି । କଂଗ୍ରେସ ଗତ 5ବର୍ଷ ଶାସନରେ ରାଜ୍ୟକୁ ଲୁଟିଛି ବୋଲି ସେ ଅଭିଯୋଗ କରିଛନ୍ତି । ଏହି ବିଧାୟକଙ୍କ ବିରୋଧରେ ସିବିଆଇ ତଦନ୍ତ ହେଲେ ସତ ପଦାକୁ ଆସିବ ବୋଲି ସେ କହିଛନ୍ତି । ଭାଇରାଲ ଭିଡିଓ ଅନୁସାରେ, ଚନ୍ଦ୍ରପୁର ବିଧାନସଭା ଆସନରୁ କଂଗ୍ରେସ ବିଧାୟକ ଥିବା ରାମକୁମାର ଯାଦବ ଏକ ସୋଫାରେ ବସିଛନ୍ତି । ତାଙ୍କ ସମ୍ମୁଖରେ ଏକାଧିକ ଟଙ୍କା ବଣ୍ଡଲ ରଖାଯାଇଛି । ଅନ୍ୟ ଦୁଇଜଣ ମଧ୍ଯ ବିଧାୟକଙ୍କ ସହ ବସିଛନ୍ତି । ସମସ୍ତେ କିଛି ବାର୍ତ୍ତାଳାପ କରୁଛନ୍ତି । ହେଲେ ଭିଡିଓରେ ବାର୍ତ୍ତାଳାପ ସମ୍ପର୍କରେ କିଛି ସ୍ପଷ୍ଟ ଜଣାପଡୁନାହିଁ ।