ନୂଆଦିଲ୍ଲୀ:ବରିଷ୍ଠ କଂଗ୍ରେସ ନେତା ତଥା ଦଳର ପ୍ରବକ୍ତା ପବନ ଖେଡା ଗିରଫ । ଦିଲ୍ଲୀ ବିମାନବନ୍ଦରରୁ ଆସାମ ପୋଲିସ ତାଙ୍କୁ ଗିରଫ କରିଥିବା ସୂଚନା ମିଳିଛି । ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମ୍ପର୍କରେ ଦେଇଥିବା ତ୍ରୁଟିପୂର୍ଣ୍ଣ ମନ୍ତବ୍ୟ ମାମଲାରେ ତାଙ୍କ ନାମରେ ଆସାମ ସମେତ ଏକାଧିକ ସ୍ଥାନରେ ମାମଲା ରୁଜୁ କରାଯାଇଥିଲା । ଆସାମ ପୋଲିସ ଆଜି ତାଙ୍କୁ ନାଟକୀୟ ଢଙ୍ଗରେ ବିମାନରୁ ଓହ୍ଲାଇ ଗିରଫ କରିଛି ।
ବରିଷ୍ଠ କଂଗ୍ରେସ ନେତାଙ୍କ ଏକ ଟିମ ସମେତ ପବନ ରାୟପୁରରେ ହେବାକୁ ଥିବା ଦଳୀୟ ମହାଧିବେଶନରେ ସାମିଲ ହେବା ପାଇଁ ଯାତ୍ରା କରୁଥିଲେ । ଆସାମ ପୋଲିସର ଅନୁରୋଧ କ୍ରମେ ଦିଲ୍ଲୀ ପୋଲିସ ପକ୍ଷରୁ ଉଡାଣ ଭରିବାକୁ ଥିବା ବିମାନକୁ ରୋକାଯାଇଥିଲା । ପରେ ତାଙ୍କୁ ଗିରଫ କରାଯାଇଛି । ଆଉ କିଛି ସମୟ ମଧ୍ୟରେ ତାଙ୍କୁ ଦିଲ୍ଲୀର ଦ୍ବାରକା କୋର୍ଟରେ ଆସାମ ପୋଲିସ ହାଜର କରିବ । ଜାରି ମାମଲାରେ ତାଙ୍କୁ ଟ୍ରାଂଜିଟ ରିମାଣ୍ଡରେ ଆସାମ ନେବା ପାଇଁ ନିବେଦନ ମଧ୍ୟ କରିବା ନେଇ ସୂଚନା ରହିଛି ।