ନୂଆଦିଲ୍ଲୀ:କାଲି ଦିଲ୍ଲୀରେ ବସିବାକୁ ଥିବା ବିରୋଧୀ ‘ଇଣ୍ଡିଆ’ ମେଣ୍ଟର ବୈଠକ ଶେଷ ପର୍ଯ୍ୟାୟରେ ସ୍ଥଗିତ ରଖାଯାଇଛି । ଏକାଧିକ ବରିଷ୍ଠ ନେତା ସାମିଲ ହେବାକୁ ମନା କରିବା ପରେ କଂଗ୍ରେସ ଆସନ୍ତାକାଲିର ବୈଠକକୁ ସ୍ଥଗିତ ରଖିଥିବା ଜଣାପଡିଛି । ପ୍ରଥମେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ ସୁପ୍ରିମୋ ମମତା ବାନାର୍ଜୀ ବୈଠକ ହେଉଥିବା ଜାଣିନଥିବା ଦର୍ଶାଇ ସାମିଲ ହେବା ନେଇ ଅନିଚ୍ଛା ପ୍ରକାଶ କରିଥିଲେ । ଏହା ପରେ ଆଜି ମେଣ୍ଟର ଅନ୍ୟତମ ବରିଷ୍ଠ ନେତା ବିହାର ମୁଖ୍ୟମନ୍ତ୍ରୀ ନୀତିଶ କୁମାର ମଧ୍ୟ ଏହି ବୈଠକରେ ସାମିଲ ନହେବା ନେଇ ସୂଚନା ଦେଇଥିଲେ । ପରେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ମଧ୍ୟ ସାମିଲ ହେବେ ନାହିଁ ବୋଲି ଜଣାପଡିଥିଲା ।
ଏହି ନେତାମାନେ ସାମିଲ ନହେବା ନେଇ ଭିନ୍ନ ଭିନ୍ନ କାରଣ ଦର୍ଶାଇଥିଲେ । ବୈଠକ ଡାକିଥିବା ମୁଖ୍ୟ ବିରୋଧୀ ଦଳ କଂଗ୍ରେସ ବୈଠକ ସ୍ଥଗିତ ରଖିଥିବା ଜଣାପଡିଛି । ପରବର୍ତ୍ତୀ ବୈଠକ ପାଇଁ କୌଣସି ତାରିଖ ଧାର୍ଯ୍ୟ ହୋଇନଥିବା ବେଳେ ଚଳିତ ମାସ ତୃତୀୟ ସପ୍ତାହରେ ହେବା ନେଇ ସୂତ୍ରରୁ ସୂଚନା ମିଳିଛି । ତେବେ ଏମାନଙ୍କ ବ୍ୟତୀତ ତାମିଲନାଡୁ ମୁଖ୍ୟମନ୍ତ୍ରୀ ଷ୍ଟାଲିନ ମଧ୍ୟ ଦିଲ୍ଲୀରେ ବୈଠକରେ ସାମିଲ ହେବା ନେଇ ଅନିଚ୍ଛା ପ୍ରକାଶ କରିଥିଲେ । ରାଜ୍ୟରେ ଏବେ ବନ୍ୟା ସ୍ଥିତି ଜାରି ରହିଛି । ସେହି କାରଣରୁ ସେ ଏହି ବୈଠକରେ ସାମିଲ ହେବେ ନାହିଁ ବୋଲି ସୂଚନା ମିଳିଛି । ତେଣୁ ଏବେ ଏହି ବୈଠକ ସ୍ଥଗିତ ରଖାଯାଇଥିବା କଂଗ୍ରେସ ସୂତ୍ରରୁ ସୂଚନା ମିଳିଛି ।
3 ତାରିଖରେ 4 ରାଜ୍ୟର ବିଧାନସଭା ନିର୍ବାଚନ ଫଳଫଳରେ କଂଗ୍ରେସର ନୈରାଶ୍ୟଜନକ ପ୍ରଦର୍ଶନ ସାମ୍ନାକୁ ଆସିଥିଲା । ଏହା ପରେ କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖଡଗେ ‘ଇଣ୍ଡିଆ’ ମେଣ୍ଟର ବୈଠକ ଡାକିଥିଲେ । 6 ତାରିଖ (ଆସନ୍ତାକାଲି) ଏହି ବୈଠକ ଦିଲ୍ଲୀରେ ଆୟୋଜିତ ହେବାକୁ ପ୍ରାଥମିକ ଭାବେ ସ୍ଥିର କରାଯାଇଥିଲା । ସହଯୋଗୀ ଦଳର ଏକାଧିକ ବରିଷ୍ଠ ନେତାଙ୍କ ସାମିଲ ହେବାକୁ ଅନିଚ୍ଛା ପ୍ରକାଶ କରିବା ପରେ ଘୋଷିତ ସୂଚୀର ମାତ୍ର 24 ଘଣ୍ଟା ପୂର୍ବରୁ ଏହି ବୈଠକକୁ କଂଗ୍ରେସ ସ୍ଥଗିତ ରଖିଛି ।