ଲକ୍ଷ୍ନୌ:ଉତ୍ତରପ୍ରଦେଶର ଲଖିମପୁର ଖେରୀରେ ଘଟିଥିବା ହିଂସା ପ୍ରତିବାଦରେ ଦେଶବ୍ୟାପୀ ଭିନ୍ନ ଢଙ୍ଗରେ ପ୍ରତିବାଦ କରିବ କଂଗ୍ରେସ । ପ୍ରତି ରାଜ୍ୟ ମୁଖ୍ୟାଳୟରେ ସୋମବାର ମୌନବ୍ରତ ପାଳନ କରିବକୁ ଦଳ ନିଷ୍ପତ୍ତି ନେଇଛି । ଏନେଇ ଅଖିଳ ଭାରତୀୟ କଂଗ୍ରେସ କମିଟି ଏକ ପ୍ରେସବାର୍ତ୍ତା ଜାରି କରି ସୂଚନା ଦେଇଥିବା ଦେଖିବାକୁ ମିଳିଛି ।
ଦଳ ପକ୍ଷରୁ ହୋଇଥିବା ନିଷ୍ପତ୍ତି ଆଧାରରେ,୧୧ ତାରିଖ ସୋମବାର ପ୍ରତ୍ୟେକ ରାଜ୍ୟ କଂଗ୍ରେସ କର୍ମକର୍ତ୍ତା ରାଜଭବନ କିମ୍ବା କେନ୍ଦ୍ର ସରକାରଙ୍କ ଯେକୌଣସି କାର୍ଯ୍ୟାଳୟ ସାମ୍ନାରେ ପୂର୍ବାହ୍ନ ୧୦ ଟାରୁ ଅପରାହ୍ନ ୧ ଯାଏ ମୌନବ୍ରତ ପାଳନ କରିବା ସହ ଘଟଣାରେ ସମ୍ପୃକ୍ତ କେନ୍ଦ୍ର ଗୃହରାଷ୍ଟ୍ର ମନ୍ତ୍ରୀ ଅଜୟ ମିଶ୍ରା ଓ ତାଙ୍କ ପୁଅ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିବେ । ଦଳର ରାଜ୍ୟ କାର୍ଯ୍ୟକାରିଣୀ ସଦସ୍ୟ, ବିଧାୟକ ସାଂସଦ ଓ ରାଜ୍ୟ କଂଗ୍ରେସର ବରିଷ୍ଠ କର୍ମକର୍ତ୍ତାଙ୍କୁ ଏହି ମୌନ ପ୍ରତିବାଦରେ ସାମିଲ ହୋଇ ଅଂଶ ଗ୍ରହଣ କରିବା ପାଇଁ ନିର୍ଦ୍ଦେଶ ଦେଇଛି AICC ।