ଆଜି ବସିବ କଂଗ୍ରେସ CWC ବୈଠକ, ପରାଜୟର କାରଣ ଖୋଜିବ ଦଳ

ଆଜି (ରବିବାର) ଅପରାହ୍ନରେ ବସିବ କଂଗ୍ରେସ କେନ୍ଦ୍ରୀୟ କାର୍ଯ୍ୟକାରିଣୀ (CWC) ବୈଠକ । ୫ ବିଧାନସଭା ନିର୍ବାଚନରେ ଶୋଚନୀୟ ପରାଜୟର କାରଣ ଖୋଜିବ ଦଳ । ଅଧିକ ପଢନ୍ତୁ

ନୂଆଦିଲ୍ଲୀ:୫ ରାଜ୍ୟର ବିଧାନସଭା ନିର୍ବାଚନରେ ଶୋଚନୀୟ ଭାବେ ପରାଜିତ ହେବା ପରେ ଦଳୀୟ ସମୀକ୍ଷା ବୈଠକ ଆରମ୍ଭ କରିବାକୁ ଯାଉଛି କଂଗ୍ରେସ । ଆସନ୍ତାକାଲି ଏହି ସଂକ୍ରାନ୍ତରେ ଦଳର କେନ୍ଦ୍ରୀୟ କାର୍ଯ୍ୟକାରିଣୀ ବୈଠକ (CWC) ଅନୁଷ୍ଠିତ ହେବାକୁ ଯାଉଛି । ଏଥିରେ ଦଳର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀ, ରାହୁଲ ଗାନ୍ଧୀଙ୍କ ସମେତ ଅନ୍ୟ କିଛି ବରିଷ୍ଠ ନେତା ମଧ୍ୟ ସାମିଲ ହେବେ । ଅପରାହ୍ନ ପ୍ରାୟ ୪ ଟାରେ ଦଳୀୟ ମୁଖ୍ୟାଳୟରେ ଏହି ବୈଠକ ବସିବା ନେଇ ସୂଚନା ମିଳିଛି ।

୫ ରାଜ୍ୟରେ ଦଳ ଅତ୍ୟନ୍ତ ନୈରାଶ୍ୟଜନକ ପ୍ରଦର୍ଶନ କରିଛି । ଏପରିକି କ୍ଷମତାରେ ଥିବା ପଞ୍ଜାବକୁ ମଧ୍ୟ ହାତଛଡା କରିଛି ଦଳ । ତେବେ ଜନାଦେଶକୁ ବିନମ୍ରତାର ସହ ସ୍ବୀକାର କରୁୁଛୁ ବୋଲି କଂଗ୍ରେସ ନେତା ରାହୁଲ ଗାନ୍ଧୀ କହିସାରିଥିଲେ । ଏପରି ସ୍ଥଳେ ଦଳର ଶୋଚନୀୟ ପରାଜୟ ପାଇଁ କାରଣ ଖୋଜା ପର୍ବ ମଧ୍ୟ ଆରମ୍ଭ ହୋଇଛି । ଆସନ୍ତାକାଲି ବୈଠକରେ ଏନେଇ ହାଇକମାଣ୍ଡ ବରିଷ୍ଠ ନେତାଙ୍କ ସହ ଆଲୋଚନା କରିବେ ।

ଚଳିତ ବିଧାନସଭା ନିର୍ବାଚନରେ କଂଗ୍ରେସ ପ୍ରାୟ ସମସ୍ତ ୫ ରାଜ୍ୟରୁ ମୂଳପୋଛ ହୋଇଯାଇଛି । ଉତ୍ତର ପ୍ରଦେଶର 403 ଆସନ ମଧ୍ୟରୁ ମାତ୍ର ୨ଟି , କ୍ଷମତାରେ ଥିବା ସତ୍ତ୍ବେ ମଧ୍ଯ ପଞ୍ଜାବର 117 ଟି ଆସନରୁ ମାତ୍ର 18ଟି, ଉତ୍ତରାଖଣ୍ଡରେ 70ରୁ 18 ଟି,ଗୋଆର 40 ସିଟ୍ ମଧ୍ୟରୁ 12ଟି ଓ ମଣିପୁରର 60 ଆସନ ମଧ୍ୟରୁ ମାତ୍ର 6ଟି ବିଜୟ ହୋଇଛନ୍ତି କଂଗ୍ରେସ ପ୍ରାର୍ଥୀ । ଏପରି ସ୍ଥଳେ ବିଭିନ୍ନ ରାଜନୈତିକ ଦଳମାନେ ମଧ୍ୟ କଂଗ୍ରେସର ଏପରି ନୈରାଶ୍ୟଜନକ ପ୍ରଦର୍ଶନ ନେଇ ଅଟ୍ଟହାସ୍ୟ ଆରମ୍ଭ କରିଥିବା ଦେଖିବାକୁ ମିଳିଲାଣି ।

ବ୍ୟୁରୋ ରିପୋର୍ଟ, ଇଟିଭି ଭାରତ