ଲକ୍ଷ୍ନୌ: ଉତ୍ତର ପ୍ରଦେଶରେ ଯୋଗୀ ସରକାରଙ୍କ ବଡ଼ ନିଷ୍ପତ୍ତି । ଏଣିକି ଗାଡି଼ରେ ଲେଖି ପାରିବେନି ଜାତିସୂଚକ ଶବ୍ଦ । ଏହାକୁ ନେଇ ରାଜ୍ୟରେ କଡ଼ାକଡ଼ି ଯାଞ୍ଚ କରାଯିବ । ଏହି ନିୟମ ନମାନିଲେ ନିଆଯିବ କଠୋର କାର୍ଯ୍ୟାନୁଷ୍ଠାନ। ଏଭଳି ନିର୍ଦ୍ଦେଶ ଦେଇଛନ୍ତି ଉତ୍ତର ପ୍ରଦେଶରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।
ସୂଚନା ଅନୁସାରେ, ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଦୁଇ ଦିନିଆ ବାରଣାସୀ ଗସ୍ତ ବେଳେ ଶୁକ୍ରବାର ଏକ ବଡ଼ ନିଷ୍ପତ୍ତି ନେଇଛନ୍ତି । ଏଣିକି ରାଜ୍ୟରେ କୌଣସି ବ୍ୟକ୍ତି ନିଜ ଗାଡ଼ିରେ କୌଣସି ଜାତିସୂଚକ ଶବ୍ଦକୁ ଲେଖିପାରିବେ ନାହିଁ । ଏହାସହ ନିଜ ଗାଡ଼ିରେ ଜାତି ସୂଚକ ବୋର୍ଡ ଲଗାଇବା ପାଇଁ କାହାକୁ ମଧ୍ୟ ଅନୁମତି ଦିଆଯିବ ନାହିଁ । ଏହାକୁ ରାଜ୍ୟରେ ସମ୍ପୂର୍ଣ୍ଣ ଭାବରେ ବ୍ୟାନ କରାଯିବ । ଯଦି କୌଣସି ବ୍ୟକ୍ତି ଏହି ନିୟମର ଅବମାନନା କରନ୍ତି ତେବେ ତାଙ୍କ ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ।
ତେବେ ରାଜ୍ୟରେ ନିୟମିତ ପୋଲିସ ପାଟ୍ରୋଲିଂ କରିବା ପାଇଁ ମଧ୍ୟ ପୋଲିସମାନଙ୍କୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ । ଏହାସହ ବେଆଇନ ଭାବରେ ଗାଡ଼ି ପାର୍କିଂ କରୁଥିବା ବ୍ୟକ୍ତିମାନେ ମଧ୍ୟ ଏବେ ଏହା କରି ପାରିବେ ନାହିଁ । ଶୃଙ୍ଖଳା ଭଙ୍ଗ କରିବା ଠାରୁ ଆରମ୍ଭ କରି ସମସ୍ତ ଛୋଟ ଛୋଟ ଘଟଣାର ତଦନ୍ତ କରି ତୁରନ୍ତ କାର୍ଯ୍ୟାନୁଷ୍ଠାନ ନେବା ପାଇଁ ଅଫିସରମାନଙ୍କୁ କଡ଼ା ନିର୍ଦ୍ଦେଶ ଦେଇଛନ୍ତି ।