ଲକ୍ଷ୍ନୌ:ଉତ୍ତର ପ୍ରଦେଶ ବିଧାନସଭା ନିର୍ବାଚନର ଫଳାଫଳା ଏକ ପ୍ରକାର ସ୍ପଷ୍ଟ ହୋଇଗଲାଣି । ବିଜେପି ଲଗାତାର ସ୍ପଷ୍ଟ ବହୁମତ ସହ କ୍ଷମତା ବଜାୟ ରଖିଛି। ଏହାସହ ଦଳର ବମ୍ପର ବିଜୟକୁ ନେଇ ବିଜେପି ବିଜୟ ଉତ୍ସବ ପାଳନ ଆରମ୍ଭ କରିଦେଇଛି ।
ଏହି ଅବସରରେ ସନ୍ଧ୍ୟାରେ ବିଜେପି ଲକ୍ଷ୍ନୌ ବିଜେପି କାର୍ଯ୍ୟାଳୟରେ ମଧ୍ୟ ଏକ ମେଗା ବିଜୟ ଉତ୍ସବ ପାଳନ କରିଛି । ଯେଉଁଥିରେ ଖୋଦ ବିଜେପିର ଫାୟାରବ୍ରାଣ୍ଡ ନେତା ତଥା ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସାମିଲ ହୋଇଥିଲେ । ଦଳୀୟ କାର୍ଯ୍ୟାଳୟକୁ ଆସି ଯୋଗୀ ଦଳୀୟ ନେତା, କର୍ମୀ ଓ ୟୁପି ଜନତାଙ୍କୁ ସମ୍ବୋଧିତ କରିଛନ୍ତି ।
ସମ୍ବୋଧିତ କରି ଯୋଗୀ ପ୍ରଥମେ ୟୁପି ଜନତାଙ୍କୁ ଧନ୍ୟବାଦ ଦେବା ସହ ବିକାଶ ମୂଳକ କାର୍ଯ୍ୟ ଓ ରାଷ୍ଟ୍ରବାଦକୁ ଗ୍ରହଣ କରିଥିବାରୁ କୃତଜ୍ଞତା କରିଛନ୍ତି । ଏହାସହ ଦଳର ନେତା, କର୍ମୀ ପଦାଧିକାରୀଙ୍କୁ ମଧ୍ୟ କଠୋର ପରିଶ୍ରମ ପାଇଁ ଧନ୍ୟବାଦ ଦେଇ କହିଛନ୍ତି ପ୍ରଧାନମନ୍ତ୍ରୀ ମୋଦିଙ୍କ ମାର୍ଗ ଦର୍ଶନରେ ଉତ୍ତର ପ୍ରଦେଶରେ ବିକାଶ ଦୃତ ଗତିରେ ଜାରି ରହିଛି । ଦଳ ଆଜି ଯେଉଁ ସଫଳତା ପାଇଛି ତାରି ପଛରେ ବିକାଶବାଦ ସହ ରାଷ୍ଟ୍ରବାଦ ରହିଛି । ବିଜେପି କ୍ଷମତା ପାଇଁ କେବେ ଭେଦଭାବ କରିନାହିଁ । କେବେ ରାଷ୍ଟ୍ରବାଦ ସହ ବୁଝାମଣା କରିନାହିଁ । ବିଜେପି କେବେ କ୍ଷମତା ପାଇଁ କୌଣସି ଆଇନର ଉଲ୍ଲଙ୍ଘନ କରିନାହିଁ । ବିଜେପି ସବୁବେଳେ ବିକାଶବାଦ, ରାଷ୍ଟ୍ରବାଦ ଓ ବିଚାରଧାରାକୁ ଦେଶବାସୀଙ୍କ ସମ୍ମୁଖରେ ରଖିଛି । ଯାହାକୁ ଦେଶବାସୀ ଗ୍ରହଣ କରିଛନ୍ତି ।