ନୂଆଦିଲ୍ଲୀ: ଡିୱାଇ ଚନ୍ଦ୍ରଚୂଡ଼ ଦେଶର 50 ତମ ପ୍ରଧାନ ବିଚାରପତି ଭାବେ ଦାୟିତ୍ବରେ ରହିବା ଦିନଠାରୁ ଚର୍ଚ୍ଚାରେ ରହିଛନ୍ତି । ଦିଲ୍ଲୀ ବାର କାଉନସିଲ ଦ୍ବାରା ଆୟୋଜିତ ଏକ କାର୍ଯ୍ୟକ୍ରମରେ ତାଙ୍କର ଏକ ଭିଡ଼ିଓ ସାମ୍ନାକୁ ଆସିଛି । ଯେଉଁଥିରେ ସେ କେନ୍ଦ୍ର ଆଇନ ମନ୍ତ୍ରୀଙ୍କ ବୟସକୁ ନେଇ ମନ୍ତବ୍ୟ ଦେଇଛନ୍ତି ।
ଦେଶର ପ୍ରଧାନ ବିଚାରପତିଙ୍କ ସମ୍ନାନାର୍ଥେ ଦିଲ୍ଲୀ ବାର କାଉନସିଲ ଏକ କାର୍ଯ୍ୟକ୍ରମ ଅନୁଷ୍ଠିତ କହିଥିଲା । ଏଥିରେ କେନ୍ଦ୍ର ଆଇନମନ୍ତ୍ରୀ କିରେନ ରିଜିଜୁ ମଧ୍ୟ ଉପସ୍ଥିତ ଥିଲେ । ଏହି କାର୍ଯ୍ୟକ୍ରମରେ ପ୍ରଧାନ ବିଚାରପତି ଏବଂ ଆଇନ ମନ୍ତ୍ରୀ ଉଭୟଙ୍କ ବୟସକୁ ନେଇ ମନ୍ତବ୍ୟ ରଖିଥିଲେ । ଯାହାର ଭିଡ଼ିଓ ମନ୍ତ୍ରୀ କିରେନ ରିଜିଜୁ ନିଜ ଟ୍ବିଟରରେ ସେୟାର କରିଛନ୍ତି । କେନ୍ଦ୍ର ଆଇନମନ୍ତ୍ରୀ କିରେନ ରିଜିଜୁ ଏହି ଭିଡ଼ିଓଟିକୁ ସେୟାର କରି ଲେଖିଛନ୍ତି, " ମୁଁ ନିଶ୍ଚିତ ଯେ, ଭାରତର ପ୍ରଧାନ ବିଚାରପତିଙ୍କ ଫିଟନେସ ନେଇ କେହି ବିବାଦ ଉଠାଇବେ ନାହିଁ ।" ମନ୍ତ୍ରୀ ଜାରି କରିଥିବା ଭିଡ଼ିଓରେ ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ କହିଛନ୍ତି, ଆଇନ ମନ୍ତ୍ରୀଙ୍କ ଫିଟ୍ ଲୁକ ସହ ମୋ ନିଜକୁ ତୁଳନା କରିବାକୁ ଧନ୍ୟମନେ କରୁଛି । ଏଠାରେ ସ୍ପଷ୍ଟ କରିବାକୁ ଚାହୁଁଛି ଯେ ଆଇନ ମନ୍ତ୍ରୀ ବାସ୍ତବରେ ଜଣେ ଯୁବକ । କିନ୍ତୁ ମୋ ଚେହେରା କେବଳ ଲୋକ ଦେଖାଣିଆ ।"