କୋଲକାତାରେ ଓଡିଆ ଯବାନଙ୍କ ଗୁଳିମାଡ, ଓଡିଆ ସହକର୍ମୀ ମୃତ

କୋଲକାତା ସ୍ଥିତ ଇଣ୍ଡିଆନ ମ୍ୟୁଜିୟମର ବାରାକରେ ଓଡିଆ ଯବାନଙ୍କ ଗୁଳିମାଡ । ଗୁଳିମାଡରେ ଆଉ ଜଣେ ଓଡିଆ ଏଏସଆଇ ମୃତ । ଅଧିକ ପଢନ୍ତୁ

କୋଲକାତା: ପଶ୍ଚିମବଙ୍ଗ ରାଜଧାନୀ କୋଲକାତାରେ ଓଡିଆ CISF ଯବାନଙ୍କ ନାରକୀୟ କାଣ୍ଡ । ଛୁଟି ନ ମିଳିବାରୁ ନିଜର ସହକର୍ମୀଙ୍କ ଉପରେ ଗୁଳି ଚାଳାଇଲେ ଯବାନ । ଗୁଳିମାଡରେ ଜଣେ ଏଏସଆଇ(ASI)ଙ୍କ ମୃତ୍ୟୁ ଘଟିଥିବା ବେଳେ ଆଉ ଜଣେ ଗୁରୁତର ଆହତ ହୋଇଛନ୍ତି । ତେବେ ମୃତକ ଏଏସଆଇଙ୍କ ନାମ ଆରକେ ଷଡଙ୍ଗୀ ଏବଂ ତାଙ୍କ ଘର ମଧ୍ୟ ଓଡିଶାରେ ହୋଇଥିବା ସୂଚନା ମିଳିଛି । ଶନିବାର ସନ୍ଧ୍ୟାରେ କୋଲକାତା ପାର୍କ ଷ୍ଟ୍ରିଟ ନିକଟରେ ଥିବା ଇଣ୍ଡିଆନ ମ୍ୟୁଜିୟମର ଗୋଟିଏ ବାରାକରେ ଏହି କାଣ୍ଡ ଘଟିଛି । ଅଭିଯୁକ୍ତ ଓଡିଆ CISF ଯବାନ ଅକ୍ଷୟ ମିଶ୍ରଙ୍କୁ ଗିରଫ କରାଯାଇଛି ।

ସୂଚନା ଅନୁଯାୟୀ, ଅକ୍ଷୟ ମିଶ୍ର CISFରେ ହେଡ୍ କନେଷ୍ଟବଳ ଭାବେ କାର୍ଯ୍ୟରତ ଥିଲେ । ତାଙ୍କର ଘର ଓଡିଶାର ଢେଙ୍କାନାଳ ଜିଲ୍ଲାରେ । ତିନି ଦିନ ପୂର୍ବେ ଅକ୍ଷୟଙ୍କ ବାପାଙ୍କ ଦେହାନ୍ତ ହୋଇଥିଲା । ଏଥିପାଇଁ ସେ ଘରକୁ ଯିବାକୁ ଛୁଟି ଚାହୁଁଥିଲେ । କିନ୍ତୁ ଛୁଟି ମିଳିନଥିଲା । ଏଥିରେ ଉତକ୍ଷିପ୍ତ ହୋଇ ସେ ନିଜର AK-47 ବନ୍ଧୁକରୁ ମ୍ୟୁଜିୟମର ସହ ଜଡିତ CISF ବାରାକରେ ଆଖିବୁଜା ଗୁଳିମାଡ କରିଥିଲେ । ଫଳରେ ଏଏସଆଇ ଆରକେ ଷଡଙ୍ଗୀ ପ୍ରାଣ ହରାଇଥିବା ବେଳେ ଜଣେ ଆସିଷ୍ଟାଣ୍ଟ କମାଣ୍ଡଣ୍ଟ ସୁବୀର ଘୋଷ ଗୁରୁତର ଭାବେ ଆହତ ହୋଇଥିଲେ । ଏହାସହିତ ଅନ୍ୟ କିଛି ପୋଲିସ କର୍ମଚାରୀ ମଧ୍ୟ ଆହତ ହୋଇଥିବାର ଖବର ମିଳିଛି ।

ଏନେଇ ଖବର ପାଇବା ପରେ କୋଲକାତା ପୋଲିସ କମିଶନର ଭୀନିତ ଗୋୟଲ ବୁଲେଟ ପ୍ରୁଫ ଜ୍ୟାକେଟ ପିନ୍ଧି ଘଟଣାସ୍ଥଳରେ ପହଞ୍ଚିଥିଲେ ଏବଂ ଅଭିଯୁକ୍ତ ଯବାନଙ୍କୁ ଗିରଫ କରିଥିଲେ । ଶନିବାର ସନ୍ଧ୍ୟା ପ୍ରାୟ ୬ଟା ୩୦ ମିନିଟ ସମୟରେ ଏହି ଅଘଟଣ ଘଟିଛି । ମ୍ୟୁଜିୟମ ବନ୍ଦ ହେବାର ୧୫ ମିନିଟ ପରେ ଯବାନ ଜଣଙ୍କ ଗୁଳିମାଡ କରିଛନ୍ତି । ଏଥିରେ ମ୍ୟୁଜିୟମ କର୍ମଚାରୀ କିମ୍ବା ଅନ୍ୟ କୌଣସି ପର୍ଯ୍ୟଟକ ଆହତ ହୋଇନଥିବା କମିଶନର ସୂଚନା ଦେଇଛନ୍ତି ।