ନୂଆଦିଲ୍ଲୀ: ଜାତୀୟ ସୁରକ୍ଷା ପରାମର୍ଶଦାତା (National Security Advisor ଅଜିତ ଡୋଭାଲ (Ajit Doval) ଙ୍କ ସୁରକ୍ଷାରେ ତ୍ରୁଟି ପାଇଁ କେନ୍ଦ୍ର ଗୃହ ମନ୍ତ୍ରଣାଳୟର ବଡ କାର୍ଯ୍ୟାନୁଷ୍ଠାନ । ଚାକିରୀରୁ ବହିଷ୍କୃତ ହେଲେ 3 କମାଣ୍ଡୋ । ଏହାସହ ଭିଭିଆଇପିଙ୍କ ସୁରକ୍ଷା ସମ୍ବନ୍ଧୀୟ ଦାୟିତ୍ବରେ ଥିବା ଜଣେ DIG ପାହ୍ୟାହର ଅଧିକାରୀ ଓ ଅନ୍ୟ ଜଣେ କମାଣ୍ଡେଣ୍ଟଙ୍କୁ ମଧ୍ୟ ଅନ୍ୟତ୍ର ବଦଳି କରାଯାଇଛି । ଏନେଇ ଗୃହମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି ।
ଗତ ଫେବୃୟାରୀ ମାସରେ ଜଣେ ଅଜଣା ବ୍ୟକ୍ତି କାର ଯୋଗେ ସକାଳୁ ସକାଳୁ ଜାତୀୟ ସୁରକ୍ଷା ପରାମର୍ଶଦାତା (National Security Advisor) ଅଜିତ ଡୋଭାଲ (Ajit Doval) ଙ୍କ ବାସଭବନକୁ ପ୍ରବେଶ ପାଇଁ ଉଦ୍ୟମ କରିଥିଲେ । ହେଲେ ତୁରନ୍ତ ସୁରକ୍ଷାକର୍ମୀ ତାଙ୍କ ଧରିବା ସହ ନିଜ ହେପାଜତକୁ ନେଇ ଯାଞ୍ଚ କରିଥିଲେ । ବ୍ୟକ୍ତି ଜଣକ ନିଜ ଦେହରେ କେହି ଚିପ ଲଗାଇ ଦେଇଥିବା କହିବା ସହ ବାହାରେ ଥାଇ ତାଙ୍କୁ ନିୟନ୍ତ୍ରଣ କରୁଛି ବୋଲି ପୋଲିସକୁ କହିଥିଲା । ପୋଲିସ ମେଡିକାଲ ଯାଞ୍ଚ କରିବା ପରେ କୌଣସି ଚିପ ପାଇନଥିଲା ।