ଅମରାବତୀ:ଆନ୍ଧ୍ର ପ୍ରଦେଶ ଦକ୍ଷତା ବିକାଶ ଘୋଟାଲା ମାମଲାରେ ପୂର୍ବତନ ମୁଖ୍ୟମନ୍ତ୍ରୀ ତଥା ଗିରଫ ହୋଇ ଜେଲରେ ଥିବା ଚନ୍ଦ୍ରବାବୁ ନାଇଡୁଙ୍କ ପୁଅ ନାରା ଲୋକେଶଙ୍କୁ ନୋଟିସ ଜାରି କରିଛି ତଦନ୍ତକାରୀ ସଂସ୍ଥା CID । ଲୋକେଶଙ୍କ ନାମରେ ଥିବା ଅମରାବତୀ ଇନର-ରିଂ ରୋଡ ଦୁର୍ନୀତି ମାମଲାରେ ଏହି ନୋଟିସ ଜାରି କରାଯାଇଛି । ଆଜି ଜାରି ନୋଟିସ ଅନୁସାରେ, ଲୋକେଶଙ୍କୁ ଆସନ୍ତାମାସ (ଅକ୍ଟୋବର) 4 ତାରିଖରେ ହାଜର ହୋଇ ଜେରାର ସମ୍ମୁଖୀନ ହେବା ପାଇଁ କୁହାଯାଇଛି । ଲୋକେଶ ଏବେ ଚନ୍ଦ୍ରବାବୁଙ୍କ ନେତୃତ୍ବାଧୀନ ଟିଡିପିର ଜାତୀୟ ସାଧାରଣ ସମ୍ପାଦକ ପଦରେ ରହିଛନ୍ତି ।
ମାମଲାର ତଦନ୍ତ କରୁଥିବା CID DCP କହିଛନ୍ତି, ଆଜି ତାଙ୍କୁ ନୋଟିସ ଜାରି କରାଯାଇଛି । ଆସନ୍ତା 4 ତାରିଖରେ ସେ ସିଆଇଡି କାର୍ଯ୍ୟାଳୟରେ ହାଜର ହୋଇ ଜେରା ହେବେ । ଗତକାଲି (ଶୁକ୍ରବାର) ଏହି ମାମଲାରେ ଆଗୁଆ ଜାମିନ ପାଇଁ ଆନ୍ଧ୍ର ପ୍ରଦେଶ ହାଇକୋର୍ଟରେ ହାଜର ହୋଇଥିଲେ ଲୋକେଶ । କୋର୍ଟ ତାଙ୍କୁ ଅଗ୍ରୀମ ଜାମିନ ପ୍ରଦାନ କରିବା ପାଇଁ ମନା କରିବା ସହ ପୋଲିସଙ୍କୁ ମାମଲାର ତଦନ୍ତ ଆଗକୁ ବଢାଇବା ପାଇଁ ନିର୍ଦ୍ଦେଶ ଦେଇଥିଲେ । ତାଙ୍କୁ ସିଆରପିସି ଧାରା 41A ଅନୁସାରେ ଏକ ନୋଟିସ ଜାରି କରିବା ପାଇଁ ମଧ୍ୟ କୋର୍ଟ କହିଥିଲେ ।
ସିଆଇଡି ଅଭିଯୋଗ କରିଛି ଯେ ଆନ୍ଧ୍ର ପ୍ରଦେଶର ରାଜଧାନୀ ଅମରାବତୀର ମାଷ୍ଟରପ୍ଲାନର ପରିକଳ୍ପନା ଅନ୍ତର୍ଗତ ରିଙ୍ଗ ରୋଡ୍ ଏବଂ ମୁଖ୍ୟ ସଡ଼କଗୁଡ଼ିକର ଆଲାଇନମେଣ୍ଟ ପ୍ରକଳ୍ପରେ ଏହି ଦୁର୍ନୀତି ହୋଇଥିଲା । 2014 ରୁ 2019 ମସିହା ମଧ୍ୟରେ ହୋଇଥିବା ଏହି ଦୁର୍ନୀତିରେ ଅନେକ ତତ୍କାଳୀନ ସରକାରୀ ଅଧିକାରୀଙ୍କର ମଧ୍ୟ ସମ୍ପୃକ୍ତି ଅଭିଯୋଗ ରହଛି । ଏହି ମାମଲାରେ ଅନ୍ୟତମ ଅଭିଯୁକ୍ତ ଭାବେ ପୂର୍ବତନ ମୁଖ୍ୟମନ୍ତ୍ରୀ ତଥା ଟିଡିପି ମୁଖ୍ୟ ଚନ୍ଦ୍ରବାବୁ ନାଇଡୁଙ୍କ ପୁଅ ତଥା ପାର୍ଟିର ସାଧାରଣ ସମ୍ପାଦକ ନାରା ଲୋକେଶଙ୍କ ନାମ ମଧ୍ୟ ରହିଥିଲା । ଲୋକେଶ ଗତକାଲି ଏହି ମାମଲାରେ ଆଗୁଆ ଜାମିନ ପାଇବାରେ ନିରାଶ ହେବା ପରେ ଆସନ୍ତା 4ତାରିଖରେ ତଦନ୍ତକାରୀ ସଂସ୍ଥା ଦ୍ବାରା ଜେରା ହେବାକୁ ଯାଉଛନ୍ତି ।