ନୂଆଦିଲ୍ଲୀ:ଭାରତ- ଚୀନ ସେନା ମଧ୍ୟରେ ପୁଣି ତିକ୍ତତା ଦେଖାଯାଇଥିବା ବେଳେ ମୁହଁ ଖୋଲିଛି ଚୀନ । ଚୀନର ବୈଦେଶିକ ମନ୍ତ୍ରାଣାଳୟ ମୁଖପାତ୍ର କହିଛନ୍ତି ଭାରତ-ଚୀନ ସୀମାରେ ଶାନ୍ତି ବଜାୟ ରଖିବାକୁ ଚୀନ ସେନା ପ୍ରତିଶୃତିବଦ୍ଧ । ଆମେ ସେଠାରେ କୌଣସି ଅଶାନ୍ତି ଚାହଁ ନାହୁଁ ବୋଲି ଚୀନ କହିଛି ।
ସେହିପରି ସୀମାରେ ଉଭୟ ଦେଶ ସୀମାରେ ଶାନ୍ତି ପ୍ରତିଷ୍ଠା ଦିଗରେ ଆଗେଇବା ଆବଶ୍ୟକ । କୌଣସି ଉତ୍ତେଜନା ସୃଷ୍ଟିକାରୀ ଏକପାଖିଆ ପଦକ୍ଷେପରୁ ଉଭୟ ଦେଶ ନିବୃତ୍ତ ରହିବା ଜରୁରୀ ବୋଲି ଚୀନ କହିଛି । ସୀମା ଅଞ୍ଚଳରେ ଶାନ୍ତି ବଜାୟ ରଖିବା ପାଇଁ ବ୍ୟବହାରିକ ପଦକ୍ଷେପ ଗ୍ରହଣ କରିବ ବୋଲି ମଧ୍ୟ କହିଛି ଚୀନ ।
ଗତ କିଛି ମାସ ଧରି ଭାରତ-ଚୀନ ସୀମାରେ ଉତ୍ତେଜନାମୂଳକ ସ୍ଥିତି ଲାଗି ରହିଛି । ତେବେ ଉଭୟ ସେନା ମଧ୍ୟରେ ବହୁ ବାର ଆଲୋଚନା ମଧ୍ୟ ହୋଇଥିବା ବେଳେ କିଛି ସ୍ଥିର ସମାଧାନ ନବାହାରିବା ଚିନ୍ତାର କାରଣ ହୋଇଛି । ତେବେ ଉତ୍ତେଜନା ସ୍ଥଳରୁ ଚୀନ ସେନା ପଛକୁ ହଟୁ ବୋଲି ଦାବି କରିଛି ଭାରତ । ଚୀନ ବାରମ୍ବାର ଶାନ୍ତି ବଜାୟ ରଖିବା କଥା କହି କୁମ୍ଭୀର କାନ୍ଦଣା କାନ୍ଦୁଥିବା ବେଳେ ନିଜ ସୈନ୍ୟ ପଛକୁ ହଟାଇବାରେ ଆଗ୍ରହ ଦେଖାଉନଥିବା ଦେଖାଯାଇଛି ।
ଅନ୍ୟପଟେ ଭାରତ ମଧ୍ୟ ସୀମାରେ ଚୀନ ସେନାର କୌଣସି ମନ୍ଦ ଉଦ୍ଦେଶ୍ୟକୁ ପଣ୍ଡ କରିବା ପାଇଁ ପାଇଁ ସେନା ବାହିନୀକୁ ପ୍ରସ୍ତୁତ ରଖିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ