ରାୟପୁର:ଛତିଶଗଡର ଦନ୍ତେଓ୍ବାଡାରେ ଏନକାଉଣ୍ଟରରେ ସୁରକ୍ଷା ବଳକୁ ସଫଳତା ମିଳିଛି । ଆଜି ଅପରାହ୍ନରେ ଆରମ୍ଭ ହୋଇଥିବା ଏନକାଉଣ୍ଟରରେ 3 ନକ୍ସଲଙ୍କୁ ନିପାତ କରିଛି ସୁରକ୍ଷା ବଳ । ସ୍ଥାନୀୟ ପୋଲିସ ଓ କେନ୍ଦ୍ରୀୟ ଫୋର୍ସ ଦାନ୍ତଓ୍ବାଡାର କେତେକାଲ୍ୟାନ ଥାନା ଅଧୀନରେ ଆସୁଥିବା ଦବ୍ବାକୁନ୍ନା ନିକଟବର୍ତ୍ତୀ ଦାନ୍ତଓ୍ବାଡା ଓ ସୁକମା ସଂଲଗ୍ନ ପାହାଡି ଜଙ୍ଗଲରେ ଏହି ମିଳିତ ଅପରେସନ ଆରମ୍ଭ କରିଥିଲେ । ପ୍ରଥମେ କମ୍ବି ଅପରେସନ ଆରମ୍ଭ ହୋଇଥିବା ବେଳେ ଜଙ୍ଗଲ ମଧ୍ୟରେ ନକ୍ସଲଙ୍କ ସହ ମୁହାଁମୁହିଁ ହୋଇଥିଲା । କିଛି ଘଣ୍ଟାର ଗୁଳି ବିନିମୟରେ ଏଥିରେ 3 ନକ୍ସଲଙ୍କ ମୃତ୍ୟୁ ହୋଇଥିବା ସ୍ପଷ୍ଟ ହୋଇଛି ।
ବସ୍ତର ରେଞ୍ଜ ପୋଲିସ ଆଇଜି ପି.ସୁନ୍ଦରରାଜଙ୍କ ସୂଚନା ଅନୁସାରେ, ଘଟଣାସ୍ଥଳରୁ 3 ନକ୍ସଲଙ୍କ ମୃତଦେହ ଜବତ କରାଯାଇଛି । ସେମାନଙ୍କ ଚିହ୍ନଟ ପ୍ରକ୍ରିୟା ଜାରି ରହିଛି । ଉକ୍ତ ଜଙ୍ଗଲରେ କିଛି ଦିନ ହେବ ନକ୍ସଲ କ୍ୟାମ୍ପ ଚାଲିଥିବା ନେଇ ପୋଲିସ ନିକଟରେ ସୂଚନା ରହିଥିଲା । ଘଟଣାସ୍ଥଳରୁ କିଛି ରାଇଫଲ, ବିସ୍ଫୋରକ ଓ ମାଓ ପୋଷାକ ସମେତ ଅନ୍ୟ ସାମଗ୍ରୀ ଜବତ ହୋଇଛି । ଅନ୍ୟ କିଛି ନକ୍ସଲ ଜଙ୍ଗଲ ମଧ୍ୟରୁ ଛତ୍ରଭଙ୍ଗ ଦେଇ ଖସି ପଳାଇଛନ୍ତି । ଏବେ ସମଗ୍ର ଜଙ୍ଗଲକୁ କର୍ଡନ କରାଯାଇ ସର୍ଚ୍ଚ ଅପରେସନକୁ ବ୍ୟାପକ କରାଯାଉଥିବା ସୁନ୍ଦରରାଜ କହିଛନ୍ତି ।