ନୂଆଦିଲ୍ଲୀ:ଆରମ୍ଭ ହେଲା ଚନ୍ଦ୍ରଯାନ-୩ ମହାକୁଇଜ୍ । ଭାରତୀୟ ମହାକାଶ ଗବେଷଣା ସଂସ୍ଥା ଇସ୍ରୋର ସଫଳତାକୁ ସେଲିବ୍ରେଟ କରିବା ଲାଗି ଭାରତୀୟଙ୍କୁ ମିଳିଛି ସୁଯୋଗ । ଦେଶର ଏହି ଐତିହାସିକ ମହାକାଶ ଅନୁସନ୍ଧାନ ଯାତ୍ରାକୁ ସମ୍ମାନ ଜଣାଇବା ଅର୍ଥେ ଦେଶବାସୀଙ୍କୁ ଏହି ସୁଯୋଗ ଦେଇଛନ୍ତି କେନ୍ଦ୍ର ସରକାର । ଏହି ପ୍ରତିଯୋଗିତାରେ ଅଂଶଗ୍ରହଣ କରି ଦେଶବାସୀ ବିଜ୍ଞାନ ଓ ପ୍ରଯୁକ୍ତିବିଦ୍ୟା, ମହାକାଶ ଏବଂ ଚନ୍ଦ୍ରର ରୋଚକ ତଥ୍ୟ ଜାଣିପାରିବେ । ପ୍ରତିଯୋଗିତାରେ ବିଜେତାଙ୍କୁ ୧ ଲକ୍ଷ ଟଙ୍କା ପୁରସ୍କାର ରାଶି ଦିଆଯିବ ବୋଲି କେନ୍ଦ୍ର ସରକାରଙ୍କ ପକ୍ଷରୁ ଘୋଷଣା କରାଯାଇଛି ।
ଦେଶର ଶାସନ ଓ ବିକାଶରେ ପ୍ରତିଟି ନାଗରିକଙ୍କୁ ଯୋଡ଼ିବା ଲାଗି ୨୦୧୪ ମସିହାରେ ଆରମ୍ଭ ହୋଇଥିବା ମୋ ସରକାର ବା MyGov.in ପକ୍ଷରୁ ଏହି ପ୍ରତିଯୋଗିତା ଆୟୋଜିତ ହୋଇଛି । ଏ ନେଇ ଇସ୍ରୋ ପକ୍ଷରୁ ଟ୍ବିଟ କରି ସୂଚନା ଦିଆଯାଇଛି । ଏ ନେଇ ଇସ୍ରୋ ପକ୍ଷରୁ ଟ୍ବିଟ କରି କୁହାଯାଇଛି, " ଦେଶର ଏହି ଐତିହାସିକ ମହାକାଶ ଅନୁସନ୍ଧାନ ଯାତ୍ରାକୁ ସମ୍ମାନ ଜଣାଇ @mygovindia ପକ୍ଷରୁ ଆରମ୍ଭ ହେବାକୁ ଯାଉଛି ଚନ୍ଦ୍ରଯାନ-୩ ମହାକୁଇଜ୍ । ଆସନ୍ତୁ ସମସ୍ତେ ମିଳିମିଶି ଚନ୍ଦ୍ର ଯାତ୍ରାକୁ ସେଲିବ୍ରେଟ କରିବା ।"
କେମିତି ନେବେ ଭାଗ ? :-
- MyGovରେ ଏକ ଆକାଉଣ୍ଟ ଖୋଲନ୍ତୁ ।
- ନିଜ ପ୍ରୋଫାଇଲ ପେଜ୍ରେ ସମସ୍ତ ଆବଶ୍ୟକୀୟ ତଥ୍ୟ ପ୍ରଦାନ କରନ୍ତୁ । ଏହି ତଥ୍ୟ ଆଧାରରେ ପ୍ରତିଯୋଗୀଙ୍କୁ ଯୋଗାଯୋଗ କରାଯିବ । ପ୍ରୋଫାଇଲରେ ପଚରା ଯାଇଥିବା ତଥ୍ୟକୁ ନ ଭରିଲେ ପ୍ରତିଯୋଗୀ ଜଣକ ଯୋଗ୍ୟ ବିବେଚିତ ହେବେ ନାହିଁ ।
- ୟୁଜର ଏକ ବୈଧ ମୋବାଇଲ ନମ୍ବର ଦେବା ଉଚିତ । ଏହି ନମ୍ବରରେ OTP ଯିବା ପରେ ଆପଣ କୁଇଜ୍କୁ ଆରମ୍ଭ କରିପାରିବେ । ଅନ୍ତର୍ଜାତୀୟ ସ୍ତରର ୟୁଜର ଏକ ବୈଧ ମୋବାଇଲ ନମ୍ବର ଦେବା ଉଚିତ ।
- ଗୋଟିଏ ମୋବାଇଲ ନମ୍ବରକୁ ଏକାଧିକ ପ୍ରତିଯୋଗୀ ବ୍ୟବହାର କରାପାରିବେ ନାହିଁ । ଯଦି ୨ଥର ଗୋଟିଏ ମୋବାଇଲ ନମ୍ବରରେ ପେଜ ଖୋଲାଯାଉଛି, ତେବେ ପ୍ରଥମ ପ୍ରତିଯୋଗୀଙ୍କୁ ଯୋଗ୍ୟ ବିବେଚିତ କରାଯିବ ।
- ଥରେ କୁଇଜ୍ ପ୍ରତିଯୋଗିତାରେ ଭାଗ ନେଲେ, ଏଥିରେ ଥିବା ସମସ୍ତ ସର୍ତ୍ତାବଳୀକୁ ପ୍ରତିଯୋଗୀ ମାନିବା ଆବଶ୍ୟକ ।
- ପ୍ରତିଯୋଗୀ 'Submit' ବଟନ୍ରେ କ୍ଲିକ କରିବା ମାତ୍ରେ କୁଇଜ୍ ପ୍ରତିଯୋଗିତା ଆରମ୍ଭ ହେବ । ସଠିକ OTP ଦେବା ପରେ ପ୍ରତିଯୋଗିତା ଆରମ୍ଭ ହେବ ।
- ସ୍ବୟଂଚାଳିତ ଭାବେ ଗୋଟିଏ ପରେ ଗୋଟିଏ ପ୍ରଶ୍ନ ପ୍ରତିଯୋଗୀଙ୍କ ନିକଟକୁ ପଠାଯିବ ।
- କୁଇଜ୍ ଶେଷ ହେବା ପରେ ୨୪ ଘଣ୍ଟା ମଧ୍ୟରେ ପ୍ରତିଯୋଗୀଙ୍କ ମୋବାଇଲ ଓ ଇ-ମେଲକୁ ଏକ ମେସେଜ ଯିବ । ପ୍ରତିଯୋଗିତାରେ ଅଂଶଗ୍ରହଣ କରିଥିବା ଲାଗି ଏକ ସାର୍ଟିଫିକେଟ ମଧ୍ୟ ଡାଉନଲୋଡ କରିପାରିବେ ୟୁଜର ।
- ଏହି ପ୍ରତିଯୋଗିତାକୁ ନେଇ ଅପଡେଟ ଜାଣିବା ଲାଗି ପ୍ରତିଯୋଗୀମାନେ ପ୍ରତିଦିନ ୱେବସାଇଟ ଯାଞ୍ଚ କରିବା ଆବଶ୍ୟକ ।
- ପ୍ରତିଯୋଗିତାର ବିଜେତାଙ୍କୁ ପୁରସ୍କାର ରାଶି ପ୍ରଦାନ କରାଯିବ ।