ନୂଆଦିଲ୍ଲୀ:ନିକଟରେ 5 ରାଜ୍ୟରେ ବିଧାନସଭା ନିର୍ବାଚନ ଶେଷ ହେବା ପରେ ଆଜି (ମଙ୍ଗଳବାର) 4ଟି ରାଜ୍ୟରେ ଆରମ୍ଭ ହୋଇଛି ଉପନିର୍ବାଚନ । ଗୋଟିଏ ଲୋକସଭା ଏବଂ 4ଟି ବିଧାନସଭା ଆସନରେ ଉପନିର୍ବାଚନ ଆରମ୍ଭ ହୋଇଛି । ପଶ୍ଚିମବଙ୍ଗରେ ଗୋଟିଏ ଲୋକସଭା ଆସନ ଓ ଗୋଟିଏ ବିଧାନସଭା ଆସନରେ ଚାଲିଛି ମତଦାନ ।
ସେହିପରି ବିହାର, ଛତିଶଗଡ ଓ ମହାରାଷ୍ଟ୍ରରେ ମଧ୍ୟ ବିଧାନସଭା ଉପନିର୍ବାଚନ ପାଇଁ ଭୋଟ ପଡୁଛି । ସକାଳ 7ଟାରୁ ମତଦାନ ଆରମ୍ଭ ହୋଇଛି । ପଶ୍ଚିମବଙ୍ଗର ଆସନସୋଲ ଲୋକସଭା ଆସନରେ ମତଦାନ ଆରମ୍ଭ ହେବା ସହିତ ବିଜେପି ପ୍ରାର୍ଥୀଙ୍କ କାର ଉପରକୁ ଏବଂ ସୁରକ୍ଷାକର୍ମୀଙ୍କୁ ଆକ୍ରମଣ ହୋଇଥିବା ଅଭିଯୋଗ ହୋଇଛି । ଏପଟେ ବଙ୍ଗର ବାଲିଗଞ୍ଜ ସମେତ ଛତିଶଗଡର ଖାଇରାଗଡ, ବିହାରର ବୋଚାହାନ ଏବଂ ମହାରାଷ୍ଟ୍ରର କୋଲହାପୁର ଉତ୍ତରରେ ଉପ-ନିର୍ବାଚନ ପାଇଁ ମତଦାନ ଚାଲିଛି ।
ପଶ୍ଚିମବଙ୍ଗ...
- ପଶ୍ଚିମବଙ୍ଗର ଆସନସୋଲ ଆସନରେ ପୂର୍ବରୁ ବିଜେପି ଟିକେଟ୍ରେ ନିର୍ବାଚନ ଜିତିଥିଲେ ବାବୁଲ ସୁପ୍ରିୟୋ। ପରେ ସେ ଟିଏମ୍ସିରେ ମିଶିବା ପରେ ଏହି ଆସନ ଖାଲି ପଡିଥିଲା। ଏହାପରେ ଟିଏମ୍ସି ସୁପ୍ରିମୋ ଅଭିନେତା ଶତ୍ରୁଘ୍ନ ସିହ୍ନାଙ୍କୁ ଏହି ଆସନରୁ ଲଢ଼ିବା ପାଇଁ ଟିକେଟ୍ ଦେଇଥିଲେ। ଶତ୍ରୁଘ୍ନଙ୍କୁ ଟକ୍କର ଦେବା ପାଇଁ ବିଜେପି ଅଗ୍ନିମିତ୍ରା ପଲ୍ଙ୍କୁ ଏଠାରେ ପ୍ରାର୍ଥୀ କରିଛି।
- ନିର୍ବାଚନ ସମୟରେ ହିଂସା ଦେଖା ଦେଇଛି । ଆସନରୁ ବିଜେପିର ପ୍ରାର୍ଥୀ ହୋଇଥିବା ଅଗ୍ନିମିତ୍ରା ପଲ୍ଙ୍କ ଉପରେ ତୃଣମୂଳ କଂଗ୍ରେସର କର୍ମୀମାନେ ଆକ୍ରମଣ କରିଥିବା ଅଭିଯୋଗ ହୋଇଛି।
- ଟିଏମ୍ସି ସମର୍ଥକମାନେ ଲୋକଙ୍କୁ ଭୋଟ୍ ଦେବାରେ ବାଧା ଦେଉଛନ୍ତି । ପୋଲିସ ଏଠି ମୁକ ପାଲଟିଥିବା ନେଇ ବିଜେପି ପ୍ରାର୍ଥୀ ଅଭିଯୋଗ କରିଛନ୍ତି । ଏହି ଘଟଣା ପରେ ନିର୍ବାଚନ କମିଶନ ଜିଲ୍ଲା ନିର୍ବାଚନ ଅଧିକାରୀଙ୍କୁ ଆକ୍ସନ ରିପୋର୍ଟ ମାଗିଛନ୍ତି ।