ନୂଆଦିଲ୍ଲୀ:ସୁଧୁରୁନି ପାକିସ୍ତାନ । ଭାରତ ସୀମାରେ ପୁଣି ଉଡିଲା ପାକିସ୍ତାନୀ ଡ୍ରୋନ । ଗତକାଲି(ଶନିବାର) ରାତିରେ ସୀମା ସୁରକ୍ଷା ବଳ(BSF) ଯବାନ ଅମୃତସର ଠାରେ ଭାରତ ସୀମାରେ ପଶିଥିବା ଆଉ ଗୋଟିଏ ପାକିସ୍ତାନୀ ଡ୍ରୋନକୁ ଗୁଳି କରି ଖସାଇଛନ୍ତି । ଗତ ଦୁଇ ଦିନରେ ଏହା ହେଉଛି ଚତୁର୍ଥ ଘଟଣା । ଗତ ରାତିରେ ଠାବ ଡ୍ରୋନ ଦ୍ବାରା ନିଶାଦ୍ରବ୍ୟ ଚାଲାଣ କରାଯାଉଥିବା ଅନୁମାନ କରାଯାଉଛି । ଯବାନମାନେ ଡ୍ରୋନ ସହିତ ତିନୋଟି ପ୍ୟାକେଟ ଜବତ କରିଛନ୍ତି । ପ୍ୟାକେଟରେ ହେରୋଇନ ଭର୍ତ୍ତି ହୋଇଥିବା ସନ୍ଦେହ କରାଯାଉଛି । ଏନେଇ ଆଜି ବିଏସଏଫ ପକ୍ଷରୁ ସୂଚନା ଦିଆଯାଇଛି ।
ବିଏସଏଫ ବିବୃତ୍ତି ଅନୁଯାୟୀ, ଗତକାଲି ରାତି ପାଖାପାଖି ୮ଟା ୪୮ ମିନିଟ୍ ସମୟରେ ଅମୃତସର ଜିଲ୍ଲା ସ୍ଥିତ ଅନ୍ତର୍ଜାତୀୟ ବର୍ଡର ପାଖ ଧାନୋଇ କଲାନ ଗ୍ରାମ ନିକଟରେ ଡ୍ରୋନ ଉଡୁଥିବାର ଶବ୍ଦ ଶୁଣାଯାଇଥିଲା । ସେଠାରେ ମୁତୟନ ଥିବା ବିଏସଏଫ ଯବାନ ସଙ୍ଗେ ସଙ୍ଗେ ଡ୍ରୋନକୁ ଠାବ କରିବାକୁ ଚେଷ୍ଟା କରିଥିଲେ । ଏହାପରେ ଯବାନମାନେ ଡ୍ରୋନକୁ ଗୁଳି କରି ତଳକୁ ଖସାଇଥିଲେ । ସ୍ଥାନୀୟ ଅଞ୍ଚଳରେ ଛାନଭିନ୍ କରାଯିବା ପରେ ପାଖ ଚାଷଜମି ଭିତରୁ ଗୋଟିଏ ଡ୍ରୋନ ସହ ତିନୋଟି ପ୍ୟାକେଟ ଜବତ କରାଯାଇଥିଲା । ତେବେ ଏଥିରେ ହେରୋଇନ ଥିବା ନେଇ ସନ୍ଦେହ କରାଯାଉଛି । ଜବତ ସନ୍ଦିଗ୍ଧ ନିଶା ସାମଗ୍ରୀର ଓଜନ ପ୍ରାୟ ୩.୩ କିଲୋଗ୍ରାମ ହେବ ବୋଲି ବିଏସଏଫ ଜଣାଇଛି ।