ଜୟପୁର: ବିବାହ ପାଇଁ କନିଆଁ ଯୌତୁକ ମାଗିବାରୁ ବରର ବାପାଙ୍କୁ ଆସିଲା ହୃଦଘାତ । ବାହାଘର ପାଇଁ ବର, ବରଯାତ୍ରୀ ସବୁ ପ୍ରସ୍ତୁତ ଥିବା ସମୟରେ କନିଆଁ ଯୌତୁକ ବାବଦକୁ ୨ ଲକ୍ଷ ଟଙ୍କା ମାଗିବାରୁ ବରର ବାପାଙ୍କୁ ହୃଦଘାତ ଆସିବା ଭଳି ଖବର ସାମ୍ନାକୁ ଆସିଛି । ଏପରି ଘଟଣା ଘଟିଛି ରାଜସ୍ଥାନର ରାଜଧାନୀ ଜୟପୁରରେ ।
ସୂଚନା ଅନୁଯାୟୀ, ଜୟପୁର ସାଂଗନେର ସଦର ଥାନା ଅଞ୍ଚଳର ଇନ୍ଦ୍ରାଜ ନାମକ ଜଣେ ବ୍ୟକ୍ତି ପାଖାପାଖି ଗୋଟିଏ ବର୍ଷ ହେବ କିରଣ ନାମକ ଜଣେ ଯୁବତୀଙ୍କ ସହ ବିବାହ ଠିକ୍ କରିଥିଲେ । ଚଳିତ ବର୍ଷ ଜାନୁଆରୀ ୨୬ ରେ ନିର୍ବନ୍ଧ ହେବା ପରେ ୨୦ ଫେବ୍ରୁଆରୀରେ ବିବାହ ପାଇଁ ଦିନ ଧାର୍ଯ୍ୟ କରାଯାଇଥିଲା । ଏହାପରେ ବିବାହ ପାଇଁ ସମସ୍ତ ପ୍ରସ୍ତୁତି ଆରମ୍ଭ କରି ଦେଇଥିଲେ ବର ଘର ଲୋକେ ।
ସେପଟେ ବାହାଘରର ପରଦିନ ୨୧ ଫେବ୍ରୁଆରୀରେ ଆଶିର୍ବାଦ ସଭା ଆୟୋଜନର ପ୍ରସ୍ତୁତି ମଧ୍ୟ ଚାଲିଥିଲା । ବିବାହ ପୂର୍ବରୁ କନିଆଁଙ୍କ ପିତା ବରର ପିତାଙ୍କୁ, ବାହାଘରରେ କିଛି ଟଙ୍କା କମ୍ ପଡୁଥିବାରୁ ସେ କିସାନ କ୍ରେଡିଟ କାର୍ଡରୁ ଲୋନ୍ ଆଣୁଥିବା କହିଥିଲେ । ଏଥିସହ ଏହି ଲୋନରେ ବରର ବାପାଙ୍କୁ ଗ୍ୟାରେଣ୍ଟର ହେବାକୁ କହିଥିଲେ କନିଆଁଙ୍କ ବାପା ।