ପାଟନା: ‘ଚାକିରି ପାଇଁ ଜମି’ ଦୁର୍ନୀତି ମାମଲାରେ ବିହାର ପୂର୍ବତନ ମୁଖ୍ୟମନ୍ତ୍ରୀ ତଥା ଆରଜେଡି ସୁପ୍ରିମୋ ଲାଲୁ ଯାଦବଙ୍କ ପରିବାରକୁ ଆଜି ଜାମିନ ମିଳିଛି । ଲାଲୁ, ପତ୍ନୀ ଓ ଝିଅ ଆଜି ବେଲ ପାଇବା ପରେ ଆଜି ବିହାର ବିଧାନସଭା ପରିସରରେ ଲଡୁ ବାଣ୍ଟି ଖୁସି ଜାହିର କରିଛନ୍ତି ଆରଜେଡି ବିଧାୟକମାନେ । ଏହି ସମୟରେ BJP-RJD ନେତାଙ୍କ ମଧ୍ୟରେ ମୁହାଁମୁହିଁ ସ୍ଥିତି ଦେଖିବାକୁ ମିଳିଛି । ଆରଜେଡି ବିଧାୟକଙ୍କ ଲଡୁ ପ୍ଲେଟ ଫିଙ୍ଗି ଦେଇଥିଲେ ଜଣେ ବିଜେପି ବିଧାୟକ । ବିଧାନସଭା ପରିସରରେ ଏପରି ଘଟଣା ଦେଖିବାକୁ ମିଳିଥିଲା ।
ବିହାର ବିଧାନସଭାରେ(ଆଜି) ବୁଧବାର ଆରଜେଡି ଏବଂ ବିଜେପି ବିଧାୟକଙ୍କ ମଧ୍ୟରେ ତୀବ୍ର ଯୁକ୍ତିତର୍କ ହୋଇଥିଲା । ଏହି ସମୟରେ ବିଜେପି ବିଧାୟକ ହରିଭୂଷଣ ଠାକୁର କ୍ରୋଧିତ ହୋଇ ଆରଜେଡି ସଦସ୍ୟ ଧରିଥିବା ଲଡୁ ପ୍ଲେଟ ଫିଙ୍ଗି ଦେଇଥିଲେ । ଉଭୟ ପକ୍ଷର ବିଧାୟକ ମୁହାଁମୁହିଁ ସ୍ଥିତିକୁ ଆସିଥିଲେ । ଆରଜେଡି ନେତାମାନେ ଜବରଦସ୍ତି ଲଡୁ ବାଣ୍ଟୁଥିବା ନେଇ ବିଜେପି ଅଭିଯୋଗ କରିଛି ।
ଆଜି ଦିଲ୍ଲୀର ରାଉଜ ଆଭିନ୍ୟୁ କୋର୍ଟରୁ ‘ଲ୍ୟାଣ୍ଡ ଫର ଜବ’ ଘୋଟାଲାରେ ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ, ପତ୍ନୀ ରାବଡି ଦେବୀ ଓ ଝିଅ ତଥା ରାଜ୍ୟସଭା ସାଂସଦ ମିସା ଭାରତୀଙ୍କୁ ଜାମିନ ମିଳିଥିଲା । ତିନିଜଣଙ୍କୁ ୫୦ ହଜାର ଟଙ୍କା ମୁଚାଲିକାରେ ଜାମିନ ଦେଇଥିଲେ କୋର୍ଟ । ମାର୍ଚ୍ଚ ୨୯ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ପାଇଁ ତାରିଖ ଧାର୍ଯ୍ୟ ହୋଇଛି । ଏହାସହ ଏହି ମାମଲାରେ ଅଭିଯୁକ୍ତ ଥିବା ମୋଟ ୧୪ଜଣ ଦିଲ୍ଲୀ ରାଉଜ ଆଭିନ୍ୟୁ କୋର୍ଟରେ ହାଜର ହୋଇଥିଲେ । ଏହି ଦୁର୍ନୀତି ମାମଲାର ତଦନ୍ତ କରୁଥିବା ସିବିଆଇ ୧୪ ଜଣଙ୍କ ବିରୋଧରେ ଚାର୍ଜସିଟ୍ ଦାଖଲ କରିଥିଲା ।