ଅଗରତାଲା: ପାଖେଇ ଆସୁଛି ତ୍ରିପୁରା ବିଧାନସଭା ନିର୍ବାଚନ । ଦିନ ଯେତିକି ପାଖଉଛି ପ୍ରସ୍ତୁତି ମଧ୍ୟ ସେତିକି ବେଗର ଆଗଉଛି । ଶନିବାର ବିଜେପି ଓ କଂଗ୍ରେସ ପ୍ରଥମ ପ୍ରାର୍ଥୀ ତାଲିକା ଜାରି କରିଥିବା ବେଳେ ଆଉ କିଛିଦିନ ପରେ ପ୍ରଚାରରେ କମ୍ପିବ ନିର୍ବାଚନୀ ମୈଦାନ । ଏହା ପୂର୍ବରୁ 40 ଜଣିଆ ଷ୍ଟାର କ୍ୟାମ୍ପେନର ତାଲିକା ଜାରି କରିଛି ବିଜେପି ।
ବିଜେପିର ଷ୍ଟାର କ୍ୟାମ୍ପେନର ତାଲିକାର ପ୍ରଥମରେ ରହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହାପରେ କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଅମିତ ଶାହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, କେନ୍ଦ୍ରମନ୍ତ୍ରୀ ନୀତିନ ଗଡକରି ଓ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗି ଆଦିତ୍ୟନାଥଙ୍କ ନାମ ରହିଛି । ସେହିପରି ଷ୍ଟାର କ୍ୟାମ୍ପେନରରେ ଆଶାମ ମୁଖ୍ୟମନ୍ତ୍ରୀ ହେମନ୍ତ ବିଶ୍ବ ଶର୍ମା, ଯୁବମୋର୍ଚ୍ଚା ସଭାପତି ତେଜସ୍ୱୀ ସୂର୍ଯ୍ୟ, ମିଥୁନ ଚକ୍ରବର୍ତ୍ତୀ, ମନୋଜ ତିଓ୍ବାରୀ, ହେମା ମାଳିନୀ ଓ ଲୋକେଟ ଚାଟାର୍ଜୀ ଷ୍ଟାର କ୍ୟାମ୍ପେନର ଭାବେ ନିର୍ବାଚନୀ ମୈଦାନକୁ ଓହ୍ଲାଇବେ ।
ତ୍ରିପୁରାରେ ଆସନ୍ତା ଫେବୃଆରୀରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ମୋଟ ୬୦ଟି ବିଧାନସଭା ଆସନ ମଧ୍ୟରୁ ୪୮ଟି ଆସନରେ ଲଢେଇ ପାଇଁ ବିଜେପି ପାର୍ଥୀ ଶନିବାର ପ୍ରାର୍ଥୀ ଘୋଷଣା କରିଥିବା ବେଳେ ଆଉ ୧୨ଟି ଆସନରେ ଖୁବଶୀଘ୍ର ପ୍ରାର୍ଥୀ ଘୋଷଣା କରିବ । ଟାଉନ ବୋର୍ଡୋୱାଲି ନିର୍ବାଚନମଣ୍ଡଳୀରୁ ପ୍ରାର୍ଥୀ ଭାବେ ମୁଖ୍ୟମନ୍ତ୍ରୀ ମାଣିକ ଶାହା ପ୍ରତିଦ୍ବନ୍ଦି କରିବା ନେଇ ଦଳ ତରଫରୁ ସୂଚନା ଦିଆଯାଇଥିଲା ।
ସେହିପରି ଧାନପୁରରୁ କେନ୍ଦ୍ରମନ୍ତ୍ରୀ ପ୍ରତୀମା ଭୂମିକା ପ୍ରାର୍ଥୀ ହୋଇଥିବା ବେଳେ ଏମଡି ମୋବୋସହର ଅଲ୍ଲି କୈଲାଶହର ଓ ବନମାଳିପୁରରୁ ରାଜ୍ୟ ବିଜେପି ମୁଖ୍ୟ ରାଜୀବ ଭଟ୍ଟାଚାର୍ଜୀ ପ୍ରତିଦ୍ୱନ୍ଦ୍ୱିତା କରିବେ ବୋଲି ଜଣାପଡିଛି । ଗତକାଲି କଂଗ୍ରେସ ମଧ୍ୟ ତ୍ରିପୁରା ବିଧାନସଭା ନିର୍ବାଚନ ପାଇଁ ପାର୍ଥୀ ଘୋଷଣା କରିଥିଲା । ୧୭ଜଣ ପାର୍ଥୀଙ୍କ ନାମ କଂଗ୍ରେସ ଘୋଷଣା କରିଥିବା ବେଳେ ଅଗରତାଲାରୁ ସୁଦୀପ ରାୟ ବର୍ମନ ପାର୍ଥୀ ହୋଇଛନ୍ତି ।
ଜାନୁଆରୀ18 ତାରିଖରେ ଉତ୍ତର-ପୂର୍ବ 3 ଟି ରାଜ୍ୟରେ ବିଧାନସଭା ନିର୍ବାଚନ ନେଇ ତାରିଖ ଘୋଷଣା କରିଥିଲେ ମୁଖ୍ୟ ନିର୍ବାଚନ କମିଶନର ରାଜୀବ କୁମାର । 60 ଆସନ ବିଶିଷ୍ଟ ତ୍ରିପୁରା ବିଧାନସଭା ନିର୍ବାଚନ 16 ଫେବୃଆରୀରେ ହେବ । ଏଥିପାଇଁ 21 ଜାନୁଆରୀରେ ବିଜ୍ଞପ୍ତି ପ୍ରକାଶ ପାଇଥିଲା । ଆସନ୍ତା ଜାନୁଆରୀ ୩୦ରେ ନାମାଙ୍କନ ଦାଖଲର ଶେଷ ଦିନ ରହିଛି । ଜାନୁଆରୀ 31ରେ ନାମାଙ୍କାନ ଯାଞ୍ଚ ହେବ । ଫେବୃଆରୀ 2 ରେ ନାମାଙ୍କନ ପତ୍ର ପ୍ରତ୍ୟାହାର କରି ପାରିବେ ପ୍ରାର୍ଥୀ । ମାର୍ଚ୍ଚ 2ରେ ନିର୍ବାଚନ ଫଳାଫଳ ଆସିବ ।
