ହାଇଦ୍ରାବାଦ: ଆସନ୍ତା ନଭେମ୍ବର 7ରୁ 5ଟି ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ନିର୍ବାଚନୀ ମୁହାଁ ତେଲେଙ୍ଗାନା ବିଧାନସଭା ନିର୍ବାଚନ ପାଇଁ ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଜାରି କରିଛି ବିଜେପି । ପ୍ରଥମ ପର୍ଯ୍ୟାୟରେ 52 ଜଣିଆ ପ୍ରାର୍ଥୀ ତାଲିକା ଜାରି କରିଛି ଭାରତୀୟ ଜନତା ପାର୍ଟି । ବିଧାୟକ ଟି. ରାଜା ସିଂଙ୍କ ଉପରୁ ନିଲମ୍ବନ ହଟାଇ ପ୍ରାର୍ଥୀ କରିଛି ଦଳ । ଗୋଶମହଲ ଆସନରୁ ଲଢିବେ ଟି. ରାଜା ସିଂହ । 3 ସାଂସଦ ବାପୁ ରାଓ, ଅରବିନ୍ଦ ଧରମପୁରୀ, ବାନ୍ଦି ସଞ୍ଜୟ କୁମାରଙ୍କୁ ପ୍ରାର୍ଥୀ କରିଛି ଦଳ । ଆସନ୍ତା ନଭେମ୍ବର 30 ତାରିଖରେ ତେଲେଙ୍ଗାନା ବିଧାନସଭା ନିର୍ବାଚନ ଅନୁଷ୍ଠିତ ହେବ । ଡିସେମ୍ବର 3 ତାରିଖରେ ଜନାଦେଶ ପ୍ରକାଶ ପାଇବ ।
ବିଜେପିର ପ୍ରଥମ ପର୍ଯ୍ୟାୟରେ 52 ଜଣିଆ ପ୍ରାର୍ଥୀ ତାଲିକାରେ 3 ଜଣ ସାଂସଦ ଏବଂ 12 ଜଣ ମହିଳାଙ୍କୁ ଟିକେଟ ଦିଆଯାଇଛି । ତେଲେଙ୍ଗାନା ଆଇଟି ମନ୍ତ୍ରୀ ତଥା ମୁଖ୍ୟମନ୍ତ୍ରୀ କେସିଆରଙ୍କ ପୁଅ କେ ଟି ଆରଙ୍କ ବିପକ୍ଷରେ ଦଳ ସିରସିଲା ଆସନରୁ ରାଣୀ ରୁଦ୍ରମା ରେଡ୍ଡୀଙ୍କୁ ପ୍ରାର୍ଥୀ ଘୋଷଣା କରିଛି । ସେହିପରି ଶାସକ ଦଳ ବିଆରଏସ ଛାଡି ବିଜେପିରେ ମିଶିଥିବା ଏଟେଲା ରାଜେନ୍ଦ୍ରଙ୍କୁ ହୁଜୁରାବାଦରୁ ଟିକେଟ ଦେଇଛି ବିଜେପି । ବିଜେପିରେ ସାମିଲ ହେବା ପୂର୍ବରୁ ସେ ଏହି ଆସନରୁ ବିଧାୟକ ଥିଲେ । 2018 ନିର୍ବାଚନରେ ବିଜେପି କେବଳ ଗୋଶାମହଳ ଆସନରୁ ଜିତିଥିଲା ।
ଟିକେଟ ପାଇବା ପରେ ପ୍ରତିକ୍ରିୟା ରଖି ଟି.ରାଜ ସିଂହ କହିଛନ୍ତି, ‘‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହାଙ୍କୁ ଧନ୍ୟବାଦ । ମୋ ଉପରୁ ନିଲମ୍ବନକୁ ହଟାଇ ଦଳ ମୋତେ ପୁଣି ସୁଯୋଗ ଦେଇଛି । ଗୋଶମହଲ ଆସନରୁ ଦଳ ମୋତେ ପ୍ରାର୍ଥୀ କରିଛି ଏ ନେଇ ଦଳକୁ ବହୁତ ବହୁତ ଧନ୍ୟବାଦ । ଗୋଶାମହଳ ବିଧାନସଭା ନିର୍ବାଚନମଣ୍ଡଳୀ ହାଇଦ୍ରାବାଦ ପାର୍ଲାମେଣ୍ଟ ଅଧୀନରେ ଆସେ । ଏଠାକାର ସାଂସଦ ୱୱେସି ଜଣେ ଦେଶଦ୍ରୋହୀ । ସେ ଜଣେ ବ୍ୟବସାୟୀ । ସେ ମୁସଲମାନଙ୍କ ଭୋଟକୁ କଂଗ୍ରେସକୁ ବିକ୍ରି କରୁଥିଲେ ଏବେ ବିଆରଏସକୁ ବିକ୍ରି କରୁଛନ୍ତି । ମୁଁ ଏଠାରୁ ନିଶ୍ଚିନ୍ତ ବିଜୟୀ ହେବି ଓ ଏପରି ଦେଶଦ୍ରୋହୀଙ୍କୁ ଜବାବ ଦେବି ।''